_الحكاية بدأت من 5 شهور بالتقريب..
اعرفكم بنفسي انا "داليدا'' في كلية هندسة بقالي كتير فيها بصراحة يلا مش مهم.
_ظبط المنبه ودخلت الاوضة عشان كالعادة عندي محاضرات الصبح ونمت..
_ ايه الصوت ده !! المنبه هو انا لاحقت ربنا ينتقم من محاضرات 7 الصبح دي.. ايه ده بس ده مش صوت المنبه ده تلفوني بيرن !! فتحت عيني كان اللي بيرن قفل ، مسكت الفون ايه ده الساعة 4 الفجر..!! مين المزعج اللي بيرن في الوقت ده ولسه مكملتش الجمله لاقيت الفون بيرن تاني..
_ الوو مين الوو مفيش حد بيرد قفلت السكة وعرفت ان حد بيعاكس حطيت الفون جنبي ولسه هبدأ انام الفون رن
_ اااه انا عارفة مش هنام انهاردة بقي.. الوو الوو محدش بيرد بردوا بس ايه ده..! انا سامعة صوت..! في صوت غريب مش عارفه افسره صوت حد بيتنفس طيب هترد ولا اقفل مفيش غير صوت النفس ده بس.. قفلت السكة وفضلت صاحية لان مش فاهمة ايه اللي بيحصل سيبت الفون وقومت اشرب رجعت لاقيت مسج من نفس الرقم..!!!!
تتبع....
الجزء الثاني
"سيبت الفون وقومت اشرب رجعت لاقيت مسج من نفس الرقم..!
"اللي جاي سواد يا داليدا "
_سيبت كوباية المياة علي الارض جنب سريري و بصيت للمسج ب استغراب بس انا حاسه ان الموضوع هزار اكيد مقلب من صحابي بس مش معقول في الوقت ده اكيد حاجة سخيفة جدا.. بس بصراحة منكرش ان خايفة خصوصآ ان بقالي فترة خايفة من كل اللي حواليا مش مطمنة.. في حاجة غلط بتحصلي بس بردوا كالعادة محطتش في بالي وحطيت رأسي علي المخدة ونمت..
_صوت المنبة المزعج مع ضوء بسيط داخل من الشباك فتحت عيني واول حاجة عملتها ان مسكت الفون فضولي هيموتني اعرف اتصل و بعت مسج تاني ولا لا.. فتحت المسجات ايه ده..!
_فين المسج مفيش اثر ل اي مسج اتبعت فتحت المكالمات بردوا مفيش اثر للرقم ده.. معقول بحلم مثلا..! بس انا متاكده ان كنت صاحية انا مكنتش بحلم..
_سيبت الفون من ايدي ونزلت من سريري و يدوب لسه بتحرك شوط كوباية المياة اتكسرت ميت حته علي الارض وقفت مكاني مذهولة مش من كسرة الكوباية ولا من صوتها نهائي..
_اهو يعني الكوباية مكانها وفيها بقيت المياه اللي مشربتهاش معني كده ان مكنتش بحلم مسكت رأسي هو انا ايه اللي بيحصلي ده يارب عقلي هيشت و في نفس اللحظة وانا بقول كده ماما فتحت الباب..
=داليدا انتي كويسة..!!
_نزلت ايدي من علي رأسي وبصوت كله خوف اه كويسة يا ماما متقلقيش انا بس الكوباية اتكسرت غصب عني
=طيب فداكي.. مالك مخضوضة كده ليه اخرجي بره وانا هشيل اللي اتكسر ده.
_خرجت من الاوضة ودخلت اخدت شاور وخرجت لاقيت ماما واقفة قدامي بتقولي تلفونك مش ساكت كل شوية رن وانا بشيل اللي كسرتيه في اوضتك ولسه بتتكلم.. جريت علي الاوضة.
_مسكت الفون بسرعة وانا متاكده ان اكيد نفس الشخص اللي بعت الرسالة هو اللي بيتصل فتحت بس مش هو دي.. "ميرنا"
"ميرنا احنا الاتنين قد بعض ومعايا في كلية هندسة صحاب بقالنا سنة بالظبط"
_اتصلت بيها الو ايوه يا ميرنا
=انتي فين يا بت اتأخرتي ليه انهاردة انا واقفة بقالي تلت ساعة عند الكلية
_ربع ساعة وهكون عندك يا ميرنا هفهمك اتأخرت ليه باي.
_لابست هدومي بسرعة ونزلت وانا في الطريق مش بفكر غير في اللي حصلي وان مش حلم انا متاكدة ان مش حلم انا كنت حاسه انا بعمل ايه والكوباية اللي كانت في مكانها دي اثبتتلي ده.. تفكير وخوف هيموتني ورعشة ايدي اللي مش عارفة اسيطر عليها
_وصلت لاقيت ميرنا واقفة قدام الكلية مستنياني ومتنرفزة..
_ايه يا زفتة كل ده تأخير
=معلش حصل كام حاجة كده عطلوني المهم بقولك ايه انا مش قادرة احضر المحاضرة دي تيجي نروح نقعد في مكان سوا عايزه اتكلم معاكي
_مالك يا داليدا وشك مخطوف وايدك بتترعش كده ليه في ايه..!!
=يلا بس يا ميرنا نمشي من هنا ولسه بشدها من ايدها لاقيت مسج وصلت سيبت ايديها و فتحت الشنطة بسرعة رهيبة وطلعت الفون اهو.. هو نفس الرقم يعني انا مكنتش بحلم بس المره دي المسج كان علي الواتساب.. فتحت بسرعة لاقيت صورة بتحمل و وقت ما الصورة حملت.." فقد الوعي بس سامعة صوت ميرنا بتقول فوقي يا داليدا.. الحقووني "
تتبع..الجزء الثالث والاخير .
