الحلقة 4
بعد ما خرج المدير ولا الاسم لي خيرتهولو دراكولا لانو غول كيفو مصاص دماء نعتولي خدمتي لي نخدمها يعني خدمة تاع عبيد 
:'( لكن الخلاص تعها مليح معليش نتحمل كلشي يهون علا خاطر سلين لازمني الخدمة منقدرش مانخدمش لازمها حليب و كوش وثياب جديدة راهي تكبر بسرعة ثيابها رجعت صغيرة عليها دخلت للكوزينة هذيك و بديت الماعون لي يجي نغسلو و المقالي آه يا ربي منذكرش غسلت في حياتي كلها كيف لي غسلتو في نهار واحد وصلت الخمسة تاع العشية دخلت بدلت وخرجت سلطانة اكيد راح تفرح كي تعرف بلي نكمل على الخمسة
في الوقت لي كانت فيه خارجة شهاب كان خارج هو تاني شافها خرج ڨارو شعلو وطلع في الطوموبيل تاعو وراح.
رحت الحانوت قضيت لي ناقني في الدار و رجعت للحومة دخلت للبناية تاع سلطانة ايمن كيف العادة
ايمن: اسمعي البارح راني سكتلك كي خبرتي امي عليا مرة أخرى منسكتش و بزيادة راني بطلت على بنتك منديهاش كي نكبر
ضحكت من قلبي عليه وحطيت يدي على شعرو فرفشتو - بنتي لي ماتشوفش في من اصلو بعد هكذا ..كملت طلعت لعند سلطانة كيف العادة تحكي
سلطانة: اصبرو شكون هذا راني جيت
حلت الباب عقدت حواجبها
سلطانة: متقوليليش حاوزوك ؟ راني منحكمش بنتك بلا دراهم
ضحكت عليها تخمامها كلو في الدراهم - لا يا سلطانة راني نكمل هاذ الوقت جيت ندي سلين
سلطانة: اه مليح مليح والله فرحتيني استناي راح نجيبهالك
جابتها قابلتني بضحكتها كيف كل مرة هزيتها نبوس فيها - يا روح ماما هيا هيا نروحو لدارنا
وصلت للدار نفس الروتين تاع كل يوم رضعت سلين خليتها تلعب وجدت عشا ليا حطيت ثيابي غسلتها وغسلت توني تاع الخدمة قالو لازم تكون نظيفة مفيها حتى طاش والا دراكولا ياكلنا هههه وقفت نتفرج في الحومة من الشباك في يدي كاس تاع الفيتامين نشرب فيهم والا محال نكمل اصلا هوما لي مخلييني نتحرك الماكلة لي ناكل فيها ما تزيد فيا حتى شي ناكل بش منجوعش الاولوية ل سلين تلفت نشوف فيها راقدة علا السرير وجها تاع ملايكة نعشق في خدودها الروز يوم قررت نحتفظ بيها كان احسن قرار درتو في حياتي تنهدت ورحت تمديت قدامها رقدت لازم نرقد في الوقت لي ترقد هي فيه والا منشوفش النوم هذا كيفاه
...الصباح نضت فطرت هزيت سلين و خرجت بكري شوية مش حابة نتوخر كيف البارح وصلت بدلت ثيابي و رحت نجري وقفت معاهم يستناو دراكولا يعدي
دخل سكوت تام وقف بعيد مش نشوف فيه طبست نطل عليه حكمتني لي قدامي وعملتلي بعينيها لا نسمع في صوتو لي كيف الرعد على قلبي
شهاب: مدموزال نجوى ارواحي هنا
قلبي بدا يضرب مشيت لعندو كان واقف مربع يديه يخزر فيا وانا نشوف مع كل بلاصة غير معاه
شهاب: خير مدموزال علاه راكي طلي عليا عندك حاجة تحبي تحكيها متقدرش تستنا
بداو يضحكو في ضحكات خفيفة وانا نحس النار خارجة من خدودي مت من الحشمة بداو الدموع يتجمعو في عينيا شبيه هكذا بارد قلبو ميت علاه يتصرف هكذا نكرهو
شهاب: مسمعتش جوابك
تلفت ليهم شهاب: بكمة مسكينة هههه
ضحكو كلهم وانا نبلع في غصتي كون مش محتاجة خدمة نبهدلك هنا وش تحسب في روحك
شهاب: ارجعي لبلاصتك اخر مرة فهمتي
حركت راسي ايه و مشيت رجعت وقفت كمل هو عدا شافهم و مشا كل واحد ....لخدمتو
الحلقة 5
