Jerita Bujang Mit

Bujang Mit

BUJANG MIT

Tusun 1

  Pagi siti endang baka selama mega orang,bala sida Sempurai Munti Gerai Simbang Jerungkang,sida Sepatu Manok Antu Sabung Keling Enda Kala Nikal ke Belakang,sida Sempungga Aka Sebila daun Sabang.
  "Aram ! Mandi buat !" ku Sempurai nganu Sempungga.Iya meh seduai baru deka nurun mandi,nembiak pan datai bepadah ka rumah.
  "Apu ! Aya Sempurai,aya Sempungga,aya Keling,aya Laja !" pia ku nembiak
"Batang pemadu pemesai mesai nekat Ai Panggau kitai,nyau melintang"
"Batang nama?" ku Sempurai."Aram tua buat matak iya !"
    Lalu nurun meh Sempurai seduai Sempungga ninga nembiak nyau begau madahka batang nyau tepanggai ba tebing ai nya.Datai seduai din meda batang galau udah melintang tepian sida
 
    "Akai akai !" ku Sempurai.
Tak lalu terejun Sempurai seduai Sempungga lalu deka di san seduai ke pantai kayu nya tadi.Deka ditangkap seduai iya batang kayu nya,batang nyau lari ke ulu.Deka ditangkap Sempurai ari ulu,batang nya lari kili.Dilampat seduai iya ari ili,batang nya lari kulu baru.Batang nya baka ti nemu bejalai.Lalu nadai ulih ditangkap seduai
   "Nama batang tu bangat bakatu" ku Sempurai
"Bedau meh kala ngelama mangkang Panggau Libau Lendat Dibiau Gerempung Isang,Mangkang Merawa Lama Munyi Merimba Mungga Nebang !
Uji padahka sida Buat Keling Gerasi Nading Bujang Berani Kempang ! Uji padahka Buat Datu Au Penyanga Punggu
Berangan Ninggang ! Apai Mapai Tegar Ngagai Burung Terbang !
    Nyau kenu nembiak madah ke Keling
"Apu ! Aya !Seduai tu deras agi mandi nyaup Sempurai seduai Sepungga matak batang di tepian ai kitai din.Ukai mit mit batang nya.Bela enggau peninggi bangkai iya" pua ku nembiak

Lalu nurun kenu Keling Gerasi Nading seduai Laja Jelinga Tinggi Merabung Kajang Patah Dabung Penyukung Rang.
Datai seduai diau din,meda Sempurai seduai Sepungga betenginggak chelap laban puas deka nangkap batang ti lalu nadai ulih
  Tak lalu nurun Keling seduai Laja.Laja nengah ujung,Keling nengah pun.Batang ti agi nyengkar ai nya ditangkap seduai lslu dibatak ke pantai.Sempurai seduai Sempungga bela enggau matak enggai enda ampit
   "Akai akai ! Tu baru ngena amai buat,endur kitai manggai ka gari,manggai ka baju,manggai ka sirat,manggai ka labung ! Udah kitai mandi bediri ditu " ku Sempurai

Kelengah lengah sida empat bejalai jalai niti batang nya,dia sida tepeda lubang dalam batang nya.
"Lau" ku Sempurai "Bisi lubang batang tu buat"
  "Tu enggi aku" ku Keling
  "Tu engku" ku Laja ga
  "Tu engku !" ku Sempurai
  "Tu engku ga" ku Sempungga
Empat iti lubang sarang tiung ditemu sida dia

"Akai, ngena amai buat,enti kitai temu ka bira,ka kemi maya mandi ditu,diau ditu.Ngena amat batang tu rarat" pia ku Sempurai
"Dini tau endur kemi endur bira,endur nama tu !" ku Laja
Nyau baka cheremin pemadas lubang tiung tu tadi.Udah mandi udah utau sida empat lalu pulai ke rumah.Orang ti tepeda ke lubang tiung nyau penuh
  "Nyadi kita anang mantap mantap batang tu" ku Sempurai
"Maya ti indu,lelaki,tuai enggau nembiak.
Kita,enti aku meda,kita aku tetak dua
Tu kami sa buat ngempu tu.Diau ditu nadai salah.Mantap iya aja enda tau !
Ngunsut iya enggau tanah enggau latak pan enda meh tau !" pia ku Sempurai nganu sida kedia enggau mata meluk mesai telu kanggan.

  Udah nya pulai meh orang.Datai di rumah nyau tinduk,gali,nyau makai nyumai baka selama mega sida.Nyadi mandi mandi bala Keling nemu ke lemai,
nemu ka pagi,nemu ke tengahari sigi nyau dayau dayau kemi ka alam tapak lubang tiung tu tadi.Sempurai pan bakanya,Laja pan bakanya,nya ga sama bisi lubang siti siti.
   Nyadi nyau kelama bakanya,nyau bisi sebulan nandan di langit,nyau bisi setaun nampun di bukit,Kumang ti dalam lubang tiung tadi nyau nemu bendar ngelalai ke diri.Maya orang nadai mandi,baru Kumang mandi.Maya orang nadai dipeda,baru iya ngambi ai.Iya endang tinduk gali diau din,makai nyumai dalam lubang tiung nya nadai bisi temu orang.

Nyau kelama temu meh Kumang nyau ngandung dalam bungkung kayu nya tadi kena panching Keling.Udah sembilan bulan ada meh anak Kumang.Dipeda Kumang anak iya lelaki,
pemadu pemadas madas gamal nembiak nya,endang sigi baka gamal Keling.Maya orang nadai mandi baru Kumang meri iya mandi.Enti orang nadai dipeda Kumang,baru Kumang pansut ga nengah
bungkung kayu.
   Nyau ga besai anak Kumang,tau duduk,tau bediri nyau tau belawa.Anak Kumang tu tadi nadai bisi temu orang.Dini pan kitai tetiap ke pengidup
seduai mindai dalam bungkung nya,baka
singkap pinggai lelayang,tesebut enggau mulut nyambut entupang.
Kenama seduai iya enda ngara diri dia nunda leka pelaga gitang

Lengka ke dia meh Kumang,sesempa rampang pinang,dudi ka sekaki sebalang
singkang,nyau ngading sida Keling Gerasi Nading Bujang Berani Kempang,
Datu Au Penyanga Punggu Berangan
Ninggang

(Besambung...)