الحلقة الخامسة عشر
#دوارالعمدة
#بوسي
..........
رجعت هنادي البيت مع رسمية وأول مدخلت قابلته محسن نازل من علي السلم
محسن لرسميه بضيق / كنتي فين لحد دلوقتي
رسميه/ شيعتني الحاجة علشان اروح للست هنادي بيت أبوها
محسن بسخرية /ست
هنادي بتحاول تتجاهل نظراته ليها
محسن/ وانتي بقي قولتي لحد في البيت إنك رايحه لبيت ابوكي
هنادي بحده/ طارق عارف واني كمان استاذنت من ابويا الحاج
تخرج الحاجة أمينه /هنادي انتي جيتي يا بنتي
هنادي /مساء الخير ياامه الحاجة
الحاجة امينه / مساء النور يا بنتي ادخلي علشان تتعشي
ادخلي يارسميه ساعدي البنات في المطبخ
هنادي/ لأ اني مش هقدر اتعشي هطلع اذاكر شوية وانام
الحاجة امينه/ مينفعش تباتي من غير عشا حتي علشان اللي في بطنك ادخل يا محسن ياابني انت رايح فين كده
محسن / رايح مشوار كده علي السريع وجاي علي طول
هنادي/ تصبحو على خير
الحاجة أمينه /بردو مش هتتعشي؟!
دماغك ناشفه اني هقول لجوزك يشوف حل معاكي
تطلع هنادي شقتها
محسن/ ماعنها متعشيت ياامه انتي مضايقك نفسك ليه
الحاجة امينه/ ليه بتتكلم كده ياابني مش عيب دي مرات اخوك وميصحش كده
محسن/ يصح ايه وميصحش ايه ياامه
انتي عماله تعزمي عليها وهي بتتكبر عليه مش عارف
لتكون فاكره انها هتجيب الديب من ديله ولا اول اللي هيخلفوا
الحاجة امينه/كلامك مش عاجبني يا محسن احسنك متكونش فرحان لاخوك
محسن/ واني افرح ولا ازعل ليه مش هو اللي اختارها وجابهالنا تعيش معانا
الحاجة امينه/ روح يا ابني شوف وراك أيه الكلام معاك مش هيجيب نتيجة
......................
هنادي في التليفون / لسه جايه من عند امي دلوقتي
طارق /متبقيش تتاخري كده تاني
هنادي /حاضر بس امي مسكت فيه علشان اتعشي معاها وهو ده اللي اخرني
طارق/ يعني متعشتيش مع الجماعة تحت
هنادي/ شبعانه ومش قادرة احط حاجة في بوقي
طارق/ بتعملي ايه دلوقتي
هنادي/ كنت لسه هفتح الكتاب علشان اذاكر
طارق/ طيب هسيبك علشان تذاكري
هنادي/ لا يا طارق خليك معايا شوية
طارق /يا حبيبتي انا عايز ابقي معاكي علي طول بس علشان خاطر السنه دي تعدي علي خير وتنجحي لازم نضحي شوية ومش عايز دلع ذاكري كويس وركزي في الإمتحان
هنادي /هركز ازاي واني ببقي قاعدة في الامتحان بفكر فيك وبشوف صورتك في ورقة الأسئلة
طارق /هههههه أنتي
آه منك. ..بتاكلي بعقلي حلاوة بالكلمتين دول
هنادي/ لا بجد هو دا اللي بيحصل
طارق/ يعني ايه مبتحليش في ورقة الاجابة
هنادي/ لا بحل ماهو انا لما بشوف صورتك بفتكر الاجابة علي طول
طارق /ههههههه بجد مش عايز اقفل معاكي بتوحشيني اوى بس هعمل ايه مستحمل بس علشان خاطرك
هنادي/ بتحبني يا طارق
طارق / مش هجاوبك علشان السؤال ده مش مفروض تساليهولي مفروض تبقي عارفة الاجابة لوحدك
هنادي/ يعني عمرك مهتسيبني
طارق /ايه الكلام ده يا هنادي
هنادي/ مش عارفة ليه دايما عندي إحساس إن السعادة اللي اما فيها دي مش هتدوم
طارق /ليه كده يا هنادي
هنادي ببكاء / مش عارفة إحساس بيجيني
انا كده من وانا صغيرة مفيش فرحه ليه كملت للآخر
طارق / ادخلي اغسلي وشك وصحصحي وذاكري كويس علشان الاسبوع الجاي هاخدك معايا مصر تقعدي لحد مخلص امتحانات في المدرسة ونرجع نقضي الاجازة في بيتنا
هنادي بفرحه/ بجد يا حبيبي
طارق /بجد ياروحي
هنادي/ ونرمين ؟
طارق/ مالها ؟
هنادي/ هتبقى معانا
طارق/ اه ليه
هنادي/ لا ولا حاجة
طارق /نرمين مبتقعدش في الشقة لانها بترجع من الجامعة متأخر والوقت اللي بتقعده هنا بتبقي في اوضتها احنا تقريباً مبتقعدش مع بعض غير ساعة الغدا بس
هنادي/ طيب
طارق/ هقفل علشان تذاكري تصبحي علي خير يا حبيبتي
هنادي/ وانت من أهل الخير يا حبيبي
سلام
طارق / سلام
ينتظر شوية وبعدها
طارق /مبتقفليش ليه
هنادي/ لما تقفل انت الأول
طارق/ اقفلي يا مجنونه هههههه
هنادي/ بصراحة مش عايزة اقفل
طارق/ لو مقفلتيش ودخلتي اتذاكري هتعيطي الصبح
هنادي/ بتفكرني علشان اقفل يعني طيب مش قافله
طارق/ طيب انا اللي هقفل ايه رأيك بقي
يقفل طارق التليفون
هنادي بحزن/ كنت خليك شوية يا طارق
مع السلامة يا حبيبي هتوحشني لحد مسمع صوتك بكره
وتدخل اوضتها تذاكر
.............
في شقة وائل
وائل / يوووووه انتي ايه مبتزهقيش من الكلام في الموضوع ده بثينه / هو في أهم منه في حياتنا
واءل/ اه فيه
بثينه / طب قولي انت ليه مش مهتم
انا عملت التحاليل وطمنتك ليه انت متعملش وتطمني
وائل / وانا بقولك اطمني
ومتفتحيش الموضوع دا تاني
بثينه / يا حبيبي ماهو لازم انا وانت تطمن علشان لو الأمور طبيعيه يبقي خلاص نسكت ونستني
وائل / بردو مصره يبقي كلامنا في الموضوع ده وبس
قوليلي بقي سحبتي الفلوس من البنك
بثينه / بصراحة لأ
وائل / ليه
انتي مش مستامناني عليها
بثينه / لأ طبعا يا حبيبي بس يعنى الموضوع دا محتاج تفكير شوية
وائل / مش انتي صاحبة الاقتراح من الأول
بثينه / اه انا قولتلك تعمل مصنع علي قدك بس مش دلوقتي يعني بعدين تكون جمعت مبلغ كويس علشان متكونش مديون لحد
وائل / وانا قولتلك فلوسك هرجعها بعد ميبدأ المصنع يشتغل
بثينه / المبلغ اللي معايا ميكفيش
وائل/ اسحبيه وانا هتصرف
بثينه بتردد/ اوك بس الاسبوع الجاي
وائل / براحتك انا مش مستعجل
بثينه / هروح احضرلك العشا
تدخل بثينه المطبخ
بثينه تحدث نفسها/هو ايه اللي انا بعمله في نفسى ده ازاي ضعيفة كده قدامه ومش قادرة أقوله لأ
حتي حقي اني ابقي أم مش عارفة اواجهه واقوله لازم يعمل التحاليل
ياترى في ايه مخبيه عليه يا وائل
اخدت كل حاجة الشقة والعربية حتي فلوسي اللي في البنك عايزها
بس هو بيحبني وبيعمل كل ده علي مستقبلنا
انتي بتضحكي علي نفسك يا بثينه أنهي مستقبل ده وانتي مش عارفة تجيبي طفل منه ولا حتي راضي يكشف لو في حاجة حتي يتعالج
ولا يمكن مش عايز يجيب منك اطفال
يدخل وائل المطبخ تفزع بثينه
وائل / في ايه يا حبيبتي مالك اتخضيتي كده ليه
بثينه / لا مفيش
وائل/ طب بسرعة بقي علشان عندي شغل الصبح بدري
بثينه / حاضر يا حبيبي ثواني والعشا يبقي جاهز
........................
في أحد الأيام
في منزل صفيه
كامليا / اني قولتلك ياامه لأ معرفش انتي مصره ليه
صفيه/ خالك جاي دلوقتى يتكلم معاكي واني قولتله إنك هنا
كامليا /ليه كده ياامه بتحرجيني معاه
صفيه /طب اسمعي منه وبس ومحدش هيغصبك علي حاجة يا بنتي
كامليا باستسلام/ حاضر ياامه
الباب يخبط تفتح صفيه
صفيه / اتفضل يا جلال. ..انت يا عمر ياابني
كامليا توقف بارتباك
جلال ببتسامة/ ازيك يا كامليا
كامليا / الحمد لله. . ياخالي بخير
عمر/ ازيك يا بنت عمتي
كامليا / الحمد لله
صفيه/ اقعد يااخويا واقف ليه
جلال / طب ممكن عمر يقعد مع كامليا يتكلم معاها شوية
صفيه/ وماله يااخويا
جلال / خلاص نسيبهم يتكلموا هنا براحتهم واني عايزك في كلمتين
صفيه / تعالي نقعد هنا
تقعد صفيه وجلال في ركن بعيد عنهم
عمر ل كامليا / عامله ايه في درستك
كامليا / كويسه النهاردة اجازة ومسافرة الصبح بدري
عمر/ اني أدخل في الموضوع علي طول علشان مطولش عليكي انتي اكيد عندك علم احنا جايين ليه
كامليا/ عمر اني بقول
يقاطعها عمر/ معلش يا بنت عمتي اسمحيلي أكمل كلامي وبعدين اتكلمي انتي براحتك
كامليا/ اني مقصدش حاجة بس حابه أوفر عليك واقولك متزعلش مني طلبك يعني
عمر /سكتي ليه
لسه بتفكري في وائل ابن عمتي
كامليا / اني! !!
لأ طبعا
عمر/ ممكن اعرف ليه رفضاني
كامليا / اني مش رفضاك انى رافضة الموضوع من الأساس ومبفكرش فيه دلوقتي
عمر/ إن كان يعني تقصدي الجامعة وكده وقعادك في مصر فاني معنديش مانع انتي بنت عمتي ومش هلاقي واحده في اخلاقك واحنا عارفين بعض كويس يعني لو فيه عيب قوليلي عليه
كامليا / عمر انت الف واحده تتمناك والموضوع ملوش علاقة بيك اني قولتلك مبفكرش في الموضوع ده
عمر /يعني مفيش فايدة
مفيش أمل تراجعي نفسك
كامليا/ عمر اني آسفة
عمر/ وعلي ايه الأسف يا بنت عمتي الجواز مفهوش غصبنيه بالعكس لو مفيش رضا عمرك مهتبقي سعيدة بس اني حابب اقولك كلمتين واعتبري اني مش اتقدمتلك نهائي
هقولك اوعى تشتري اللي باعك في يوم لان اللي باع مره هيبقى الف مرة وافتكري اني قولتلك
كامليا / متشكرة علي نصيحتك دي وانت اخويا يا عمر واوعي تزعل
عمر/ مش زعلان بالعكس اني بتمنالك السعادة كل قلبي
ويبتعدت عمر عنها قائلاً / يلا ياابه
صفيه/ ايه ياابني مستعجل ليه اقعدوا اتعشوا معانا علي زمانه جاي يلا يا كامليا ندخل نجهز العشا.
جلال / لا معلش يا صفيه اني عندي مشوار كده لازم اروحه مره تانية بقي
يخرج جلال وعمر من المنزل يقابلوا علي بالخارج
علي/ علي فين يا جلال ازيك يا عمر
عمر/ الحمد لله
جلال / مروحين البيت كنا جايين نطمن علي صفيه ازيك محدش شافك من زمان مختفي فين
علي /ابدا يااخويا انت عارف من البيت للغيط
جلال /ابقي هات صفيه وتعالوا اقعدوا معانا شوية
علي /طيب متدخل نتعشي سوا
جلال / لا معلش
انت عارف أم العيال مبتاكلش من غيري
علي/ ههههه ماشي يا عم مع السلامة
............ ......
في منزل العمدة
الكل مجتمع علي السفرة ماعدا هنادي والعمدة
الحاجة أمينه لهدي/'اطلعي يا بنتي لهنادي خليها تنزل تتعشي
سعيد/'وتطلع ليه ياامه متنزل لوحدها
الحاجة أمينه /يمكن نايمه يا ابني يعني محدش يطلع يشوفها يمكن تعبانه ولا حاجة
هدي/ حاضر ياامه الحاجة
سعيد بحده/ لأ مش هتطلعي
ينظر محسن لشوق بغمز
محسن/ سبيها ياامه براحتها لو جعانه هتنزل لوحدها
الحاجة أمينه / يعني مفيش حد منكو عايز يطلع طيب اني اللي هطلع
محسن بغضب/'خليكي ياامه اطلع يا واد يا محمود خبط علي مرات عمك خليها تنزل تتعشي
يطلع محمود فوق عند هنادي
الحاجة امينه/ انتوا مالكو عاملين ليه كده هي دي مش مرات اخوكو يعني مفروض مسؤلة مننا علشان اخوك مش موجود
محسن/ ياريت ياخدها معاه لما يجي كل واحد فيه اللي مكفيه ومكناش ناقصينها هي كمان
ينزل محمود
محمود/ طلعت يا ستي محدش بيرد
هدي/ اني هطلع ياامه الحاجة
ينظر لها سعيد بغضب
الحاجة امينه/ اطلعي يا بنتي طمنيني بدأت اتوغوش عليها
تطلع هدي وتخبط علي شقة هنادي محدش يرد ترن الجرس كتير
تقوم هنادي بكسل وتعب تفتح الباب
هدي/ ايه يا هنادي قلقتينا عليكي انتي نايمه من وقت مجيتي من الامتحان
هنادي بتعب/ اه
هدي/ مالك انتي مش حليتي ولا ايه
هنادي/ لا حليت
هدي/ الحمد لله
اديكي خلصتي الامتحانات متفضليش بقي قاعدة في الشقة كده علي طول أنزلي نتعشا ونسهر مع بعض الليلة
هنادي/ مش قادرة ياهدي أنزل ومليش نفس للأكل
هدي/ ليه مالك
هنادي/ مش عارفة بطني بتوجعني من وقت مجيت من بره ومش قادرة اتحرك
هدي/ طيب هجيبلك العشا هنا وريحي انتى علي السرير
هنادي / وجع جامد قوي مش قادرة استحمله
هدي/ طب وبعدين الوقت اتاخر ومش هنلاقي دكاترة دلوقتي اصبري للصبح
هنادي تصرخ/ مش قادرة أتحمل علشان خاطري يا هدي اعملي أي حاجة.
تنزل هدي جري
الحاجة امينه/'في ايه يا بنتي
هدي وهي بتاخد نفسها/ هنادي تعبانه قوي لازم تروح للدكتور دلوقتي
سعيد/ دكتور ايه واحنا هنلاقي دكاترة دلوقتي
محسن/يلا يا شوق تصبحو علي خير
الحاجة أمينه / بقي كده محدش فيكو عايز يتحرك يعني اصحى ابوكو هو اللي يروح بيها ولا أكلم اخوكو يجي يكشف عليها
سعيد/ يعني نعمل ايه ياامه
الحاجة أمينه / يعني شغل العربية خلينا نوديها لأي دكتور واني هطلع اشوفها
.....................
في المستشفي
هنادي بتعيط
هدي/ يا حبيبتي بطلي عياط مش كده
الحمد لله. ..انك بخير كل حاجة تتعوض
الحاجة أمينه بغضب/ مااني مية مرة أقولها تمشي علي مهلها مبتسمعش الكلام أدي اللي خدناه من العند بتاعها
تعيط هنادي اكتر تخرج الحاجة أمينه من الغرفة
هدي / معلش يا هنادي متزعليش نفسك
يااختي بكره تزهقي عيال
هنادي/ طارق هيزعل قوي يا هدي
هدي/ انتي شيلتي حاجة تقيله
هنادي/ اني معملتش حاجة النهاردة اديكي شايفة روحت الامتحان ورجعت علي طول وبمشي براحه من أول الحمل شوفتي الحاجة قالت ايه
هدي/ متزعليش منها الحاجة قلبها ابيض بس هي زعلانه شوية
هنادي /يعني اني مش زعلانه انى كمان؟!
هدي/ خلاص يا حبيبتي اللي حصل حصل انتي لسه صغيرة وبكره تجيبي لما تزهقي وكويس إنك بخير
..................
تاني يوم
في منزل العمدة في شقة هنادي
سعدية/ يعني محدش يقولي يابنتي
هنادي/ معلش ياامه أهو اللي حصل
سعدية/ جوزك عرف
هنادي/ اني مقولتش حاجة بس هو اللي اتصل علشان يطمن عليه اكيد هما اللي قالوله
جرس الباب يرن تطلع سعدية تفتح
طارق/ مساء الخير يا خاله
سعدية/ مساء النور ياابني نورت بيتك
يدخل طارق /هنادي عامله ايه
سعدية /كويسه ياابني هي جوه في الأوضة
يدخل طارق لهنادي
طارق بلهفة/ ايه يا حبيبتي عامله ايه
هنادي ببكاء/ الحمد لله
طارق /ليه بس العياط ده
المهم إنك بخير
هنادي/ يعني مش زعلان يا طارق
طارق/ أهم حاجة سلامتك يا حبيبتي. ..الحمد لله. ..إنها جات علي قد كده
جرس الباب يرن
تدخل الحاجة أمينه ومعاها رسمية
سعدية/ اني همشي بقي يا بنتي وهجيلك الصبح مش عايزة حاجة مني
طارق/ تمشي ازاي لازم تتعشي معانا
سعدية / معلش ياابني مش هقدر
تخرج سعدية
الحاجة أمينه / هتاكل هنا يا ابني ولا هتنزل تاكل مع اخواتك تحت
طارق /هغير هدومي الأول
الحاجة أمينه / علي العموم العشا جاهز تحت لو حبيت تاكل أنزل اخواتك قاعدين تحت
طارق يتبع والدته خارج الغرفة
طارق / ايه ياامه مالك انتي تعبانه
الحاجة امينه/ تعبانه ياابني من اللي حصل كان نفسى الحمل يكمل علي خير بس نقول ايه بقي في مراتك
طارق/ وهنادي مالها ياامه
الحاجة أمينه / ماهي السبب لو بتمشي علي مهلها كان الحمل ثبت
تخرج هنادي من الغرفة
هنادي/ دي تاني مره يا حاجة تقولي نفس الكلام وانتي عارفة إن ده محصلش
الحاجة أمينه /يعني اني كدابه؟ !...سامع ياابني
طارق/ ياامه هنادي متقصدش
الحاجة أمينه / وكمان بتحاميلها
هنادي/ يا حاجة اني من وقت مجيت من المستشفى وانتي مش طايقاني
الحاجة أمينه / واني مش هطيقك ليه
هنادي /معرفش بقي انتي ادرا
الحاجة امينه/ شايف مراتك بتكلمني ازاي
طارق/ معلش ياامه حقك عليه اعذريها هي تعبانه
هنادي/ حق مين يعني مش شايف عماله تغلط فيه وانت واقف ساكت
الحاجة أمينه /لا خليه يضربني علشان تستريحي
طارق بغضب/ هنادي ادخلي جوه دلوقتي
هنادي/ يعني بقيت اني اللي غلطانه دلوقتي
الحاجة أمينه /اني سيبهالك ونازله
طارق/ استني ياامه رايحه فين
هنادي ممسكه ايد طارق /انت رايح فين
طارق /نازل تحت ايه عندك مانع
هنادي/ انت بتكلمني كده ليه يا طارق
طارق /علشان انتي مش حاسه بالظروف اللي احنا فيها ابويا نايم تعبان تحت والدكاترة رايحه جايه عليه ومش عارفين عنده ايه وانتي عايزة بس تعملي مشاكل وخلاص
هنادي/اني بعمل مشاكل دا بدل متطيب خاطري بكلمتين واني تعبانه
طارق /معلش يا هنادي ادخلي استريحي دلوقتي وانا هنزل اطمن على ابويا
هنادي/ مش هاكل إلا لما تيجي
طارق/ مش عارف ممكن اتاخر تحت هبعتلك هدى تقعد معاكي شوية
.....................
تليفون هنادي يرن
هنادي وهي بتمسح دموعها/ الو ازيك يا كامليا
كامليا /الحمد لله. ..انتي اللي عامله ايه دلوقتي عرفت من امي من شوية إنك كنتي تعبانه ودخلتي المستشفى
هنادي/ الحمد لله على كل حال
كامليا/ يعني انتي كويسه دلوقتي
هنادي/ آه
بس الحمل نزل
كامليا/ متزعليش يا حبيبتي أهم حاجة سلامتك
هنادي ببكاء /'اني تعبانه قوي يا كامليا
كامليا/ ليه يا حبيبتي علشان يعني اللي حصل
معلش يا هنادي أهو اللي حصل
هنادي/ مخنوقة قوي من كل حاجة حواليه حاسه اني اتسرعت
كامليا /اتسرعتي في ايه
هنادي/ فاكره يل كامليا لما كنتي تقعدي تقولي الواحده تخلص تعليمها وتتجوز و البنت ملهاش إلا بيت جوزها
كامليا /كان كلام امي وكنت بردده من غير مفكر
هنادي/ واني اللي كنت اقولك لا انا هدخل ثانوي وجامعه والجواز ده يجي بعدين شوفتي اديكي انتي اللي كلمتي تعليمك واني اللي اتجوزت
كامليا / ادعي لاخوكي هو اللي فوقني من اللي كنت فيه
هنادي/ لسه بتفكري فيه
كامليا / اني لا طبعاً خلاص كل واحد راح لحاله
قوليلي يا هنادي انتي مبسوطه في حياتك
هنادي/ هتصدقيني لو قولتلك اني مش عارفة إن كنت مبسوطة ولا لأ
كامليا /جوزك بيحبك
هنادي/ مش عارفة بردو
كامليا / ايه الكلام اللي بتقوليه ده ازاي مش عارفة دي حاجات كده بتتحس
هنادي/ معلش يا كامليا أصلي لسه تعبانه وكل حاجة عندى متلخبطه ومش عارفة أركز ولا أفهم انا عايزة ايه بالظبط ولا حاسه بايه
كامليا/ الف سلامة عليكي هبقي اكلمك لما تهدي كده وتروقي .......... . ..........
في شقة وائل
بثينه / الفلوس كله عندك شوف المبلغ كده مظبوط
وائل بفرحه/ المبلغ مظبوط متشكر اوي يا حبيبتي
وادي وصلات الأمانة زي ماقولتلك انا مبكلش حق حد
بثينه / ايه دا يا وائل بقي انا همضي جوزي علي وصلات امانه
وائل / دا ضمان لحقك يا حبيبتي
بثينه/وانت يعني وجودك في حياتي مش أكبر ضمان ليه وبعدين انت بتعمل المشروع دا لمين مش لينا ولولادنا بعدين
وائل / طبعا يا حبيبتي بس في مشكلة صغيرة
بثينه / مشكلة ايه
وائل / المبلغ ناقص متين وخمسين ألف
بثينه / طب هتجيبهم منين
ينظر وائل لبثينه بحب/ انا بقول تبيعي حاجة من الدهب اللي عندك وانا هجيبهملك تاني متقلقيش
بثينه / بس انت عارف إن الدهب ده كان جايلي هدية من ماما
وأنا مقدرش افرط فيه
وائل / طب وبعدين
بثينه / انت قولت إنك هتتصرف في باقي المبلغ
وائل /'كنت هستلف من واحد صاحبي بس مش معاه المبلغ كله
بثينه / طب متقول لباباك واكيد يعني مش هيمانع
وائل /هشوف
..................بعد كام يوم
في شقة طارق
طارق/ خلصتي يا حبيبتي
هنادي /آه خلاص لبست
طارق /ايه الشنطة دي كلها دول هما أسبوع اللي هنقضيهم في الشقة وهنرجع
ترن نرمين الجرس
طارق/ ايه الشياكة دي كلها
نرمين/ طبعا ياابني انا اصلا طول عمري شيك
تخرج هنادي من الغرفة
هنادي/ ازيك يا أستاذة نرمين
نرمين /ايه اللي انتي لابساه ده
هنادي /ايه مش عاجبك
نرمين/ شكلوا فلاحى اوي
هنادي/ بس دا ذوق طارق وعاجبه اوي
طارق/ متخلصوني ووسعوا بقي انا هنزل أسلم علي الجماعة تحت
هنادي تقرص طارق من أيده
نرمين/ طيب انا نازله بعد اذنكو
طارق/ ايه في ايه
هنادي /انت مسمعتش اختك قالتلي ايه مش عاجبها اللي انا لابساه
طارق /بس عاجبني انا وبعدين نرمين طالما علقت علي حاجة يبقي عاجباها وهتطلع من عينها بس هي مبتحبش تبين
هنادي/ يا سلام
طارق/ اختي وانا عارفها يلا كملي لبس وانا مستنى تحت متتاخريش لا امشي واسيبك
هنادي /طب ابقي اعملها كده
طارق/'ايه هتعملي ايه
هنادي/ هتعرف وقتها.
طارق/ يا واد انت يا شراني هههههه
هنادي /عند شك في كده
طارق/'اكيد. ...مستحيل الوش الجميل دا يطلع منه أي شر
هنادي/ ايوه ثبتني بكلمتين
طارق /في زعيق تحت هنزل اشوف في ايه
ينزل طارق جري علي السلم يوقف عند شقة محسن
العمدة جوه بيزعق
العمدة/ يعني ايه يا واد اللي انت بتقوله ده
محسن/ دا حقى ياابه واني اخدته ومحدش ليه حاجة عندي
سعيد/ لا يا محسن بس مش كل ده حقك
محسن/ محدش فيكو تعب زي مااني تعبت الأرض دي اني كبرتها بتعبي وعرقي ومش هفرط فيها ابدا
العمدة/ وحقك اللي بتقول عليه ده تاخده بالسرقة
تسرق الختم بتاعي وتبيع لنفسك كل الأرض اللي امتلكها
يدخل طارق
محسن / أهو الأفندي بتاعك جه اهوه
طارق/ أتكلم مع أبوك كويس يا محسن
محسن/'معلش يا استاذ يا متعلم اصلنا متعملناش زيك علشان نعرف نتكلم
طارق /الذوق والأدب واحترامك لابوك مش محتاج علام يا محسن محسن/ ايه هتديني درس في الأخلاق كمان
العمدة/ أخرس متنطقش خالص كفاية اللي عملته
ياريت بقي تجيب العقد وتقطعوا قدامي
محسن/ دا لا يمكن يحصل ابدا اني خدت حقي
العمدة /حق ايه واني لسه عايش علي وش الدنيا
محسن/ مش هستني لما الاقي الكل بيقاسمني في عرقي وتعبي ياابه
العمدة/ انت كده بتظلم اخواتك
محسن/ اني مظلمتش حد
كوثر وصباح شاهدين علي العقد والبيع مش ليه لوحدي البيع ليه اني وسعيد
ينظر العمدة لسعيد
سعيد / اني معرفش حاجة عن الموضوع ده ياابه
العمدة/ يعني كلكو اتفقتوا عليه
محسن/ حق امي ونرمين وباقي اخواتي البنات محفوظ
العمدة بسخرية/ لا حقاني قوي واخوك طارق
محسن/ طارق خد حقه اتعمله شقة متعملتش لحد فينا وفرشتهاله أعلي فرش والعربية اللي بيتمنظر بيها دي من تعبي اني بس مش مهم هعتبرها هدية منه له وعليهم الشقة اللي في مصر يبقي كده خالصين
طارق /اني مش عايز حاجة طول ماابويا حسه في الدنيا بس انت كده تبقي ظالم لان دا ملك أبوك
محسن/ محدش اتعلم زيك
علام ووظيفة كويسه عايز ايه تاني
العمدة يقعد علي الكرسي بتعب
طارق /أني ماشي واللي عايز تعمله اعمله وانت ضميرك
يخرج طارق من الشقة
محسن/ آه نسيت وكمان الدهب اللي في ايد مراتك وبتتمنظر بيه ده من حق ولادي بس بردو مش خسارة فيك انت اخويا بردو طارق / متشكر يااخويا لو عايزة كمان هجبهولك
.......
يطلع طارق الشقة / يلا يا هنادي لسه مخلصتيش
هنادي/ ايه يا طارق اللي بيحصل تحت ده؟
طارق/ يلا يا هنادي
هنادي/ انت موافق علي اللي اخوك بيقوله ده
طارق /مش عايزك تدخلي في حاجة بينى وبين أخواتي
هنادي/ بس دا حقك
طارق /طول ماابويا عايش مليش حق ويلا بقي لو كنتي عايزة تيجي معايا
.......................
في الجامعة
وائل واقف منتظر بالخارج ينظر نحو البوابة
تخرج كامليا ينزل وائل من العربية
وائل / كامليا استني رايحه فين
كامليا تتلفت / وائل! !...انت ايه اللي جابك هنا
وائل / قلبي
كامليا بسخرية/ طب قول لقلبك يختشي علي دمه ويمشي من هنا
وائل / بس قلبي معندوش دم وواقف هنا ومش هيتتعتع من مكانه
كامليا/ طيب خليه واقف
وائل يمسك ايدها / رايحه فين
كامليا / انت اتجننت ازاي تمسك أيدي كده
وائل / اعمل ايه غصب عني انتي السبب كامليا انا بحبك ومش قادر علي البعد ده انتي ليه بقيتي قاسية كده
كامليا / بجاحتك يااخي بتدهشني بجد انت عايز مني ايه يا ابن خالتي
وائل / نرجع زي الأول
كامليا / ههههههه بجد ضخكتني بامارة ايه نرجع زي الأول
بامارة كلامك معايا وانك مش قد مصاريف الجواز وعلشان تبنى مستقبلك لازم تتجوز من بنت غنيه ومشاعري وكل السنين اللي فاتت دي مفرقتش معاك وجاي دلوقتي تقولي نرجع دا انت بجاحتك وصلت لأبعد الحدود
وائل / كامليا انا مستعد اتجوزك دلوقتى
كامليا / وائل انت آخر واحد ممكن أفكر اني اتجوزه اوعى تكون مفكر إني كامليا بتاعت زمان وهتضحك عليه بكلمتين بتقولهم واحنا بنتمشي علي جسر ترعة بلدنا وانا أصدق واروح بيتنا أعيش في الأحلام اللي عايشتهالي وارسم في الخيال احلي صورة لحياتنا مع بعض أنسى كامليا دي علشان ماتت
وائل / وانا ممكن ارجعها تاني بس افتحيلي قلبك زي زمان.
كامليا /قلبي خلاص اقفلته وياريت تنساني بقي وتبعد عني كفاية كده
تتركه كامليا وتوقف تاكسي وترجع لمكان سكنها
........................
في منزل كامل
كامل/ شوفتي ابنك يا سعدية
سعدية /وائل؟ .. ماله
كامل / عايز يبيعني حتة الأرض اللي حيلتي
سعدية/ ليه
كامل/ بيقول بياسس مصنع وناوي يسيب الشغل في مصنع حماه
سعدية /طيب ماهو كده كويس يا ابو وائل وافق يااخويا مغيهاش حاجة هي الأرض مش في الآخر ليهم بردو
كامل/ ياوليه دي حتة الأرض اللي حيلتنا هنصرف منين لو بعناها لا بصرف معاش ولا حتي ابني بيديني جنيه
سعدية /ماهو لما المشروع اللي بتقول عليه ده ينجح اكيد هيرجعك الفلوس.
كامل/ يرجع ايه ماانتي عارفة ابنك يا سعدية
سعدية / اتكلم معاه قوله يدخلك شريك في المصنع علشان تضمن حقك
كامل/ وعلى ايه وجع القلب ده اني مش بايع
سعدية/ انت حر يااخويا مالك وانت حر فيه
كامل/ هي هنادي لسه مجاتش من مصر
سعدية/ جات امبارح بقولك ياايه متيجي نروحلها نقعد معاها شوية
كامل /بكره
سعدية/ وليه مش النهاردة
كامل/ مش لازم نشتريلها حاجة ولا هندخل عليها كده
سعدية/ معاك حق فاتتني دي
...............
ومرت الأيام والشهور
وبدأت الدراسة وهنادي حامل للمرة التانية
والعمدة راقد في بيته مبيتحركش بعد اللي عمله محسن معاه
ومحسن ومراته قاعدين في شقتهم مبينزلوش
وفي يوم
هنادي واقفه في المطبخ
هدي/ بتعملي ايه يا هنادي
هنادي/ بدخل طقم الطباق ده في المطبخ
هدي / طب هاتي عنك انتي
تنزل شوق
شوق/ بتتعازموا علي ايه مش ده الطقم بتاعي بردو
هدي / ومن أمتي حد فينا ليه حاجة هنا ماكلنا بناكل في طبق واحد مع بعض
شوق/ ده كان زمان إنما دلوقتي اني باكل اني وعيالي في شقتي يبقى اخد كل اللي ليه تحت ماهو ده كله من فلوس ابويا تدخل الحاجة امينه/ اديها حاجتها كلها يا هدي
شوق / متزعليش مني يا مرات عمي بس اني مش هروح أشتري واني عندي حاجتي ولا هي فلوس وخلاص
الحاجة امينه / لأ واشتري ليه ولادك أولا بالفلوس دي
هاتي يا هنادي الحاجة اللي في ايدك اديها لها
تقرب هنادي من شوق يوقع الطقم كله على الأرض
شوق تزعق بصوت عالي/ انتي يااللي مبتفهميش كسرتي الطباق كلها
هنادي بخوف/'معلش اني مكانش قصدي
الحاجة امينه /خلاص يا بنتي حصل خير
شوق/ حصل خير ازاي يا مرات عمي دي قاصدة توقعهم علشان تغيظني
هنادي /اني!!..دول وقعي غصب عنى
الحاجة امينه 'خلاص يا شوق هجبلك غيرهم
شوق/ لأ هي اللي تروح تجيبلي من فلوس أبوها
هنادي/ هطلع اجيبلك الطقم بتاعي
شوق بسخرية / ودا بقي اللي كان ابوكي جايبه إلا ماجابلك معلقة
هدي/ عيب كده يا شوق
شوق / اسكتي انتي يا هدي متدخليش
هي تروح دلوقتي تجيبلي فلوس من أبوها واني أشتري طقم غيره
الحاجة امينه /اسكتي يا شوق أنتي مش عايزة تجبيها لبر
شوق/ اني ولا هي
الحسوده اللي بتحقد عليه وعلي ولادي اكمن احنا احسن من عيلتها وليه عزوه إنما الدور والباقي عليها إلا ما بنشوف حد من أهلها تلاقيهم بيخافوا يجوا علشان ميغرموش حاجة وهما جايين
الحاجة امينه / لا بقي انتي زودتيها قوي واني مش هسكتلك
تطلع هنادي جري علي شقتها
الحاجة امينه / حسبي الله ونعم الوكيل
انتي ايه مبتحسيش بالكلام اللي بتقوليه
شوق/ سبيني يا مرات عمي افضفض عن اللي جوايا شوية
الحاجة امينه / واني مش هسكت علي اللي عملتيه
شوق/ هتشتكيني لمحسن؟!
الحاجه امينه/ لأ هشتكي لابوكي محسن اني عارفاه مش هيعمل حاجة تلاقيه هو اللي مفطمك علي الحوار دا كله
شوق/ ابويا قاعد في الدار تحبي أجي معاكي
تطلع هدي جري لشقتك هنادي تخبط بكل قوتها تفتح هنادي وهي بتصرخ
هدي/ ايه ده يا هنادي
هنادي/ الظاهر بنزف يا هدي الحقيني
هدي/ اقعدي بس استريحي اني مش قولتلك الزعل غلط عليكي علشان الحمل
هنادي ببكاء /هعمل ايه نصيبي كده
هدي/ طيب تعالى اغيرلك هدومك
تدخل هدي مع هنادي الغرفة
هدي بقلق/ هنادي دا سقط اقعدي لما اشوف حد يروح معانا
المستشفى
..................
#دوارالعمدة
#بوسي
أنت تقرأ
دوار العمدة 🌱🌾🌷
Romanceاجتماعية _رومانسية (حياة الريف) فتاة تزوجت في سن مبكر لـ ابن العمدة ولانها بنت فلاح بسيط فنظرة اخوات زوجها لها كانت تؤلمها نفسياً لكن حاولت أن تتعايش مع الوضع ثم تحدث لها مواقف كثيرة داخل منزل العمدة بينا نشوف هنادي هيحصلها ايه.
