"خالد"
جنة عايشين بقرية بسيطة كل الوارد البيهة يعتمد على اليجنوه الاهالي ، بس قريتنة عدهة مشكلة صغيرة طبعاً غير الكهرباء والنفط والمي والخدمات وهل مشكلة هي بوري مكسور، براس القرية اكو بوري كبير ينقل المي الباقي القرية بس هل بوري مكسور صارلة عشر سنوات ، هل بوري تمر عليه ايام وسنين ومحد يصلحه لا عمدة ولا اهل القرية، حتى تأقلمنة على الوضع ومحد اشتكة من تسرباته ولا ذكره.
بس ورة ماتغير العمدة بدت القرية تعاني ، رسوم هواي جاي تنوخذ منهة على كل شي حتى دخل اهل القرية صار ضعيف اكثر من اي فترة مرت ، طبعاً مو بيدهم يسوون شي غير التأقلم فتاقلمو وقللو من مصروفهم العادي بس هل عمدة زاد الرسوم وفاجأهم بسالفة جديدة رسوم شهرية على المي ! احنة عايشين على المي شلون ياخذ رسوم على المي مادري ! كل اهل القرية ضاجو وحجو عليه بكعداتهم وسهراتهم وشتكو منة كل يوم.
اكو ناس جانت متهتم للمي صارت حريصة عليه تحسب مي السبح ومي الري ومي الشرب تحسبله مية حساب وحساب بس رغم هذا بقت الرسوم كبيرة على المي كل اهل القرية صارو يشتكون " حتى سبح مسابحين منين هل رسوم مادري !...صايمين احنة المي نعوضه ببرتقالة لو رگية شوكت ينزل هل رقم هذا ثابت شو اكثر من هل عمدة الاكشر... المي الرب العالمين انطانياه ببلاش صرتو تحسبوه علينة !"
اهواي اشتكو على سعر الرسوم المجاي تتغير وخاصة اشتكو على المي والعمدة ساد اذانة ويحسب بالفلوس لايسمع شكوة ولاحجوة، ورة يوم صاح واحد باهل القرية " يابة هاي القضية مايحلهة حلال ؟ " جان واحد منهم انطة حل " خل نجمع بيناتنة ونصلح البوري جاي يسرب هواي مي يمكن الرسوم نصهة بسببه " وافقو على فكرته وكل شخص دفع مبلغ بسيط وبيوم واحد كدرو يصلحوه، ورة شهر اجتي الرسوم اقل، فرحو اهل القرية بس بسمراتهم بالليل وهمة يشربون جاي كال واحد منهم " شبينة يحضي يوم ما خلصنة من هل بوري المكسور مانخلص من هل عمدة ؟! " فقررو مثل ماحللهم هل حلال سالفة البوري يحللهم سالفة العمدة ؟ فبوكتهة رادو يعوفون التأقلم الي تعودو عليه وتفقو بيناتهم وتجمعو كلهم الصبح يم باب العمدة ورة ايام قليلة صار الرادوه وغيرو العمدة وتحسنت اوضاع القرية وعاشو اهل هل قرية بسلام.
كم بوري مكسور اكو بحياتنه ومادرنالة بال الة من لوة ايدنة العمدة؟
وكم مرة قررنة نعوف بيهة التاقلم واعتمدنة على نفسنة؟
قصة "ما يحلهة حلال؟ "
للكاتبة "رباب كاظم"
