PASKO NG OFW

PASKO NG OFW

Spoken Word Poetry

Sinulat ni Randy Bataanon

Pagkatapos ng panahon ng nakakapasong init

Ang simoy ay napalitan naman ng hanging malamig

Ayos na sana pero may narinig akong nakaka istress

Ano pa kundi ang pasko daw ay malapit ng sumapit

Akoy isang OFW, at hindi naman ako mayaman

Ngunit marami akong kamag anak at mga kaibigan

Silay nangungumusta sabi ay sana ok ka lang dyan

Parapasko ko sana ay wag mong kalilimutan

Nakaka gaan naman talaga ng kalooban

Ang maalala ng mga kamag anak at mga kaibigan

Kaya lamang ay nahihiya ako na kanilang malaman

Na ang passport ko ay naka sangla pa sa pautangan

Gusto ko nga sana na sa Pilipinas mag pasko

Makasama ang pamilya at kumain ng handang paborito

Ngunit ang ibibili ko ng ticket ay ipapadala ko na sa inyo

Pang bayad sa matrikula at pang Noche Buena ninyo

Ngayon ay naiintindihan ko na ang Pasko ng OFW

Hindi para sa sarili kundi para maging masaya kayo

Sapat nang naka ngiti ang mga taong mahal mo

Kahit na sa home sick ay tumutulo ang luha namin ditto

Ang tulang ito ay hindi para sila ay ipahiya o sumbatan

Ngunit sana naman kami ay unawain din kumg minsan

Sanay na kami sa kalungkutan at sa hirap ng katawan

Sana naman wag nang dagdagan ang hirap ng kalooban

Salamat na lang at sigaw lang ng amo ang naranasan

Ngunit hindi ganun ang kalagayan ng ibang kabayan

May ilang tumalon sa bintana dahil pinagsamantalahan

May hindi pinapasahod at pinagmamalupitan

Ang lahat ng hirap ay parang balewala lamang naman

Ang importante ay ang pamilya na kanilang naiwan

Buwan buwan ay may obligasyon na dapat padalhan

Yun naman ang dahilan ng sakripisyong pinagtitiisan

Ang pinaka masakit pala na dito ay aming naranasan

Na habang malayo kami ay pumanaw ang magulang

Maigi kung ikaw ay payagang umuwi ng madalian

Ngunit marami ang umiiyak na lang sa kalungkutan

Ang isa pang mahirap at nakakapag-sikip ng dibdib

Ay kung mabalitaan mong ang anak mo ay maysakit

Magdadasal ka na lang at sa Panginoon ay kakapit

Na kahit malayo kami ang Diyos ay palaging malapit

Habang tumitindi ang lamig sa aming paligid

Ang lungkot sa puso at luha sa mata ay nangingilid

Ayaw ko na yatang marinig ang mga pamaskong awit

Mga ala-ala ng saya sa Pilipinas sa tuwing paskoy sasapit

Salamat na lang at nakilala namin ang Panginoon

Na siyang lakas namin, matibay na Pundasyon

Si Hesus ang aming karamay sa mahabang panahon

Sa bawat panalangin ay naroon ang kanyang proteksyon

Sa paskong ito ay mayroon akong nais na bigyan

Hindi kamag anak o mga malalapit na kaibigan

Dahil ang tunay may kaarawan sa araw ng kapaskuhan

Ay si Hesus, syang dapat nating sambahin at regaluhan

Hindi nya kailangan ng mga material na pwedeng ibigay

Kundi ang buong pusong pag samba ay sapat ng alay

Ang handog ko sa kanya ay ang aking buong buhay

Sapat ang kanyang pagpapala, Sya rin ang aking gabay

Akoy isang OFW at akoy isang manlalakbay lamang

Kaya anuman ang narating sa bansang kinalalagyan

Hinding hindi ko makakalimutan ang aking pinagmulan

Isang araw akoy babalik sa aking tunay na tahanan

Ako rin ay isang OFW na pansamanta lamang sa mundo

Ang totoo, lahat naman ng tao ay walang nanatili dito

Ngunit ng isuko ko ang buhay ko kay Hesus Panginon ko

Ang wika nga niya, sa langit ang tunay na tahanan ninyo

Akoy isang kristiano at isang manlalakbay lamang

Kaya anuman ang narating sa mundog kinalalagyan

Hindi ko makakalimutan na Diyos ang tunay na dahilan

Isang araw akoy babalik sa kanyang kaharian

Bayani ang tawag nila sa mga kagaya namin

Ngunit hindi ko ipinagmamalaki anuman ang narating

Hubad tayong dumating at isinilang sa mundong ito

At wala din tayong madadala pag alis natin dito

Kung mayroon man akong pwedeng maipag yabang

Ipinagmamaki ko ang Panginoon tanging Siya lamang

Kung hindi dahil sa kanyang grasya na naranasan

Wala rin ang mga pagpapalang sa buhay koy umuulan

Sa paskong itoy nais kong buong pusong magpasalamat

Sa lahat ng biyaya na araw araw ay natatanggap

Sa pagkakataong maka alis ng bansa at makapag lakbay

Mula sa isang OFW, Salamat po sa iyonng pagsubaybay