ايناس ولاقيس

اختي بقت غريبة اوي الفترة دي هتصدقوني لو قولتلكم اني بخاف انام جمبها على سرير واحد!!

انا اسمي شيماء و عندي ٢٥ سنه بابا وماما منفصلين من مدة كبيرة و مش بيسال علينا من يوم انفصلهم. عايشة مع ماما واختي ايناس اللي اصغر مني ب ٣ سنين هي عندها ٢٢ سنه وبتدرس في كلية الحقوق.

من فترة بقيت اشوف ايناس بتنام لوحدها في اوضة وهي بالمنسبة عمرها ما كانت بتحب تنام لوحدها خالص دايما كنا بنام مع بعض ف اوضة واحده.
كانت بترجع من الكلية يادوب تاكل لقمه وبعدها تجري على الاوضة تقفلها وما تخرجش غير تاني يوم ع الكلية. قولت لماما ان ايناس مش طبيعية اليومين دول و ايه سبب نومها لوحدها في الاوضة، وليه وتقفل على نفسها لحد تاني يوم. كانت ماما بترد عليا وتقول اني مكبره الموضوع هي اكيد بتزاكر عشان الامتحانات قربت! هو فعلا الامتحانات قربت بس برضه مش مقتنعه بالسبب ده فقررت اني هراقب ايناس لازم افهم ايه الموضوع بظبط.

ف يوم خرجت من اوضتي وكانت الساعه ٢ صباحا وطبعا ايناس ف اوضتها قفله على نفسها الباب، اتسحبت ورحت عند باب الاوضة، سمعت صوت ايناس جوه الاوضة يعني هي لسه صحيه لحد دلوقت. وطيت وحطيت عيني ع الفتحه اللي ف كالون الباب.

من الفتحة شفت ايناس وهي بتتحرك في الاوضة، ولاحظت كمان ان ايناس قلعه هدومها كلها!!
شوية ولقيت ايناس عماله تصرخ بصوت خلاني اتنفض من الخوف!
من وسط صريخ ايناس كانت عماله تقول كلام غريب مش فهماه كانت بتقول ( احضري يا لاقيس، يا ابنة الشيطان الاعظم، لقد قمت بخلع كل ما ارتدي لاجلك انتِ يا لاقيس، لبي ندائي و احضري في الحال)

انا مش مصدقه نفسي، ايه اللي انا بسمعه ده، اكيد انا متهيألي! فضلت ايناس تعيد وتزيد في الكلام ده كل مرة كانت بتقول الكلمات كانت بتعلي صوتها اكتر من الاول! في الاخر سمعت صوت انثوي! صوت بيتكلم غير صوت اختي اللي عارفاه كويس!
الصوت كان بيرد على كلمات ايناس
( لقد لبيت ندائك)

جريت على اوضتي وانا خايفه اوي قفلت على نفسي الباب بالمفتاح و اتغطيت زي الاطفال اللي خايفين من عقاب امهتهم!
فضلت اتنفض وجسمي كله متلج، فضلت على الحال ده لحد تاني يوم الصبح، لما ماما خبطت عليا عشان اصحى افطر. فتحتلها الباب وطبعا لاحظت من وشي اني مانمتش من امبارح.
المهم حاولت ما ابينش ان في حاجه وقولتلها اني كنت تعبانه شوية ومعرفتش انام طول الليل ف طلبت مني اخد اجازة من الشغل النهاردة. انا فعلا كنت محتاجه الاجازة دي فاتصلت بصاحب الاتيلية اللي شغاله فيه واخدت اجازة.

واحنا بنفطر كنت كل شوية ابص على ايناس بخوف، وهي تبادلني نفس النظرات بس بابتسامه! ولما خلصنا فطار ايناس قامت عشان تروح الكلية. قبل ما تنزل قالت لي كلمة غريبة ( النهاردة هنام معاكي في الاوضة ده احنا هنسهر للصبح ههههه ) قالتها وهي بتقرص خدي بايديها!!