تهزمني السمراء وانا ند فرسان

46

«البارت السادس والاربعين»
.
.
من بكره في بيت ابو محمد
محمد اللي مجافيه النوم بشكل مرعب ما توقع توصل جراءة شوق لذا الدرجه ما تابت ما اكتفت من درسها الاول احتار فعلا وش بيسوي وكيف بيوقفها كان خوف محمد ان شوق تدخل بينه وبين رهام ويخسر رهام تحرك على صوت ابوه اللي صحى وقام وهو يعطيه ادويته بهدوء ولف لما سمع صوت رهام: ما نمت للحين
محمد : لا بنام بعد شوي
تحرك محمد وهو مب قادر يناظر رهام يحس انه بمجرد ما شوق حضنته انتقل كل قذراة الدنيا فيه
رهام وقفته وهي تقول : محمد وش فيك ؟ صاير شي ! مخبي عني شي!
محمد : لا يا رهام بس تعبان وبنام
رهام: وش ما خلاك تنام امس
محمد : مشكله مع صديق لي وبتنحل يلا انا بنام
تهرب محمد وهو يدخل يتروش وهو يحس ان هالطريقه بتنقذه من جرأة شوق القذره
اما رهام اللي شالت هم الدنيا وهي ما تدري وش فيه محمد يتهرب منها
................••............
في بيت ثنيان
الكل كانوا مجتمعين على الفطور وهم توهم يستقرون والكل تستقر نفسيته ثنيان اللي كان متصدر الطاوله بلبسه العسكري على يمينه منيره ويساره مشاعل وقدامه الترف
قال بهدوء : تقدرون تباركون لترف
الكل رفع راسه يناظر الترف وابتسمت الترف وهي كأن الطمأنينه نزلت على قلبها
منيره: نبارك ليش ما نبارك بس على ايش
ثنيان بهدوء وهو يراقب ملامح منيره : حامل
منيره اتسعت عيونها بصدمه : ماشاء الله مبروك الله يتمم لك
الكل هداء بعد ردة فعل منيره وقالت مشاعل: مبروك الترف حبيبتي الله يتمم لك ويقومك بالسلامه
الترف : امين
محمد : يعني يبه بيجي عندنا اخو جديد
ثنيان: ان شاء الله
عمر : الله بيجي نونو بعد يعني بيصيرون 3 عندنا
ثنيان: ايه بس خلك جاهز
رغم غصة منيره الا انها قالت: معناته من الحين ترتاحين ولا تمدين يدك لشي
الترف : لا والله وش تقولين مانيب جالسه وانتي تشتغلين اساعدتس وتساعديني بس اجلس مستحيل
مشاعل:لا لا كلام منيره صح انتي ارتاحي
ثنيان وقف وهو يعدل شكله لاخر مره :الحين وقفوا نقاش اذا رجعت استلموها
منيره: وين بتروحين
الترف : بروح لاهلي اسلم عليهم
منيره: الله معك
طلعت الترف هي وثنيان وهم مرتاحين ان منيره تقبلت الخبر عادي
طلعوا لسياره ولف ثنيان : كيف السخونه معك
الترف : راحت ، بس نفسي مره تقلب
ثنيان اللي صار خبره بذا الموضوع ابتسم: اووه تعودي من الحين باقي معك لين الشهر الرابع بس بتحسين بنوم وخمول وباقي بتمر عليك اشياء كثيره
الترف ضحكت: اشوفك خبره
ثنيان ضحك: يعني فالنتيجه انا اب وانا بعد عانيت ما مداني انسى مشاعل
الترف : خلاص اي شي بسألك فيه
ثنيان : على الرحب والسعه
الترف بعد تردد : ثنيان قلت لامك
ثنيان اخذ نفس : لا بقولها شوي
الترف سكتت وهي ضايقه من وضع ام ثنيان
ثنيان: اتركي امي علي وانتي اهتمي بنفسك
الترف : اخاف ما تتقبله مثل ولد سيف
ثنيان بحده :طفلنا مب مثل طفل سيف فيه فرق كبير
الترف سكتت وهي تفكر بجديه قطعوا الطريق وثنيان يسولف لترف بعض من معاناته من حمل منيره ومشاعل وطبعا مي
................••............
في الفندق
عند منصور اللي بعد ماقدر انه يثبت نفسه ويتخذ قرار اتجهه لنوف اللي كانت جاهزه عشان يروحون لاهله تقدم وهو يناديها : نوف تعالي هنا شوي بكلمك
نوف اللي جات وجلست وهي ما زالت خايفه :نعم
منصور : شوفي يا نوف ادري ان فارق العمر بيني وبينك كبير ويمكن تحسين اني مختلف لكن انا مابي ذا الشعور يدخل بينا خليني اقولك بطريقة ااحسن ما ابيك تاخذين على محمل اني زوجك وان لك فروض ولك واجبات كثير
يعني حاولي توازنين بين زوج وصديق ورجحيني كصديق اكثر
مدري يمكن ما تفهميني بس انا معرف اعبر كثير بس اتمنى انك فاهمتني انا جاهل كثير في اساليب الحياه والتعامل مع البنات خصيصاً فا ابيك تاخذيني شوي شوي تعلميني وتفهميني يعني
نوف اللي كان ودها تضحك على طريقته واضح انه ما يعرف كيف يشرح لها نفسه رفعت يدها وهي ماتدري تهديه ولا تهدي نفسها : فهمت عليك لا تستهلك نفسك كثير
منصورابتسم بإحراج : يعني لو في يوم زعلتك بالغلط او اني تعاملت معك بطريقة مب مناسبه علميني قولي لا يا منصور
وانا من جهتي اقدر اكون لك نور المستقبل
ومن جهه ثانيه انا شخص كتوم شوي وحريص يعني مشاكل بيتنا بينا وان شاء الله مافيه مشاكل انا وانتي نتصافى لايدخلون اهلك ولا اهلي فهمتيني
نوف : ايه وانا افضل هذا كثير
منصور : اجل خلينا نتوكل على الله ونطلع امي تنتظرك طبعا انتي بالنسبه لها فرحة سنين
نوف ابتسمت: ليه !؟
منصور ببتسامه : ما صدقت اني تزوجت على قولها شاب شعرك وشابت عظامك ما تزوجت
نوف لا شعوريا : لا وين ماشاء الله عليك
منصور التفت لها وهو يناظرها ببتسامه الرضا التام ولفت نوف بفشله وضحك: طبعاً شوفتك لها دور تخلي الواحد غصب عليه يصير ماشاء الله عليه
نوف اللي غمضت وهي منحرجه من تسرعها اذا الرجال مرتبك وهي منطلقه طلعوا لسياره وهم كأن انشال ستار كبييير من قدامهم كلهم ارتاحوا بعد ارتباك والحين قدروا يشوفون بعض من قريب
..................••............
في دوام محمد
ما زال محمد يصارع جراءة شوق كان جالس بدوامه وهو في دوامه رفع راسه لما دخل القهوجي مصلح : استاذ محمد
محمد ناظر اللي بيده بإستغراب: وشو ذا
مصلح : جاء مندوب يقول سلموها لمحمد
نزل مصلح الهديه اللي كانت متكلفه بيده فتحها محمد واول ماشاف الكرت غمض عيونه بغضب وهو يبعدها كان مكتوب ( محمد .. ادري معصب مني ويمكن تكرهني ولكن ادري بتفهمني اذا قلت لك حبي لك يفوق حبك لرهام اللي تنتظرها سنين كيف اسوي عشان اقنعك كيف اشرح لك حبي اكثر اطلب منك فرصه وحده بس واوعدك انها اخر شي بيجي مني ابي اشوفك لازم اتكلم معك واوعدك اذا جيت وسمعتني ومع ذلك رفضت اوعدك اطلع من حياتك للابد بس اسمعني .. اذا فكرت تجي بكون الساعه 4:30 انتظرك في الكوفي اللي مقابل محلي .. شوق )
عفس محمد الورقه ورماها بالزباله وهو ينادي مصلح : خذ هالهديه لك يا مصلح
مصلح : بس يا استاذ محمد وين اوديها
محمد : خذها لك ولا عطها ولدك اللي تزوج
مصلح: الله يسلمك
محمد :تسلم
طبعا فوراً قرر محمد يرووح لانه يبي يفتك منها بأي طرييقه
................••............
في ديرة الترف
عند سلوى اللي كانت واقفه جنب صالح اللي يجهز بيطلع لدوامه
صالح : ابوي طلع !
سلوى: ايه اخذ فطوره يقول بيفطر في الدوانيه
صالح لف عليها وهو يبوس جبينها : الله يعطيتس العافيه يا سلوى والله ما تقصرين رغم ان ابوي الله يصلحه
سلوى: قد قلت لك يا صالح ابوك ابوي حتى لو كان متضايق مني شوي فالنهايه انا مثل بنته
دخلت الترف : يا اهل البيت فيه احد
صالح : هلا هللااا بالترفه يا هلا
الترف ابتسمت: وش عندك ترحب غريبه
صالح : اللي يشوفتس يقول مطفشتس بالهوايش
الترف قربت وهي تسلم عليه: لا بس غريب اليوم بس اتوقع قلبك حاس
وخرت وهي تسلم على سلوى
صالح: وش حاس فيه !؟
الترف : جهز عمرك يا خال بعد تسعة اشهر ان الله كتب
صالح تنح شوي وانتبه وهو يشد على كتف الترف : بالله عليتس تقولين الصدق
الترف ضحكت:ايييه وان شاء الله انه سميك اذا هو ولد
حضنها صالح بفرح: الله يتمم لتس على خيير يارب ومبروووك مابغيتي تفرحينا
سلوى ببتسامه: مبروك يا الترف الله يتمم لتس
صالح لف على سلوى: لا يكون تدرين ، الا والله تدرين هذا الموضوع اللي دايم تكلمين عشانه
سلوى ضحكت: يعني كنا شاكين وتأكدنا والترف حبت تقولك بنفسها
صالح: الله ياربي اخيراً يا الترفه بنشوفف عيالتس
الترف : ان شاء الله
صالح: اجل خليني ابشر ابوي
الترف : وينه ابوي
سلوى: بالدوانيه
الترف : اجل خله لين يجي
صالح : ايه زين اجل انا بروح وانتي اجلسي وريحي ولا اجلسوا كلكم وارتاحوا
سلوى ضحكت: ماعليك لا توصي
طلع صالح اللي زادت فرحته بخبر حمل الترف
اما الترف اللي جلست هي وسلوى اللي كانت تأكد على الترف انها اختارت الصح
.................••............
في احد الشوارع
نواف اللي كان طالع وبما انه فاضي كان يفرفر لكن وقفه منظر لبنت كانت خطواتها سريعه وهي تتلفت وتدور بكل زاويه وواضح انها منهاره وتبكي وبين هالحواري تركض حس انها مضيعه احد او شي
نزل من سيارته لكن قبل يتحرك رجعت البنتت تركض وهي تقول : لو سمحت لو سمحت
نواف : سمي
شهد : الله يخليك شفت رجال شايب يمشي هنا
نواف : لا والله ، كيف شكله
شهد اللي كانت توصف لنواف شكله اللي كانت عاجزه وهي يتقطع كلامها من بكاها
نواف : ما شفته والله بس بدور عليه وش يكون لك
شهد : ابوي هو معاه زهايمر ما يتذكر شي الله يخليك دور عليه
نواف : خلاص انتي ارجعي لبيتكم وانا بدور عليه
شهد : لا بدور علييه مقدر اخليه
نواف ما لقى حل الا انه يدور معها وانطلق معها وهم يدورون وشهقت شهد لما شافته على الخط السريع : يببببه
نواف لف وهو يشوف بيقطع والسيارت سريعه
ركض نواف وهو يقطع الخط بسرعه ومسكه قبل يقطع ووقف السيارات وعبر وهو ماسك ابو شهد اللي حالته يرثى لها ركضت شهد وهي تحضن ابوها ولفت على نواف : مشكور الله يسعدك ويكتبها في ميزان حسناتك
نواف : ماسويت شي ولو
شهد اللي كانت تمسح على ظهر ابوها: يبببه انت بخييير
ابو شهد يناظر بجمود: شهد وينها شهد
ومشت شهد فيه : انا عندك يبه عندك
نواف : لو سمحتي ممكن اوصلكم بيتكم
شهد لفت بحده : مشكور تعبناك لين هنا
نواف : لا تفهميني غلط بس خوفاً عليكم وابوك تعبان ما يقدر يكمل مشي
شهد رفضت قطعياً تركب معاه وهي تمشي بس ماقدر ابوها يكمل اكثر
نواف :لا تخافين والله ما اضرك بس ابي اساعدكم
شهد اللي ركبت هي وابوها وهي حزينه وكان ابوها يردد طول الطريق : عبدلله وينه عبدلله ويين بيجي بيجي
شهد اللي كانت تبكي : عبدلله بيجي يبه بيجي
نواف اللي اوجعهه قلبه على وضعهم كان يحزن
نواف : اتصلي على عبدلله عشان يرتاح ابوك
شهد اللي نزلت راسها ببكى : عبدلله مات
تزلزل نواف وسكت وصل للبييت ونزلت شهد وابوها للبيت بعد ماشكرت نواف اللي انشلع قلبه على حالهم وركب سيارته وتحرك وهو حزييين ................••............
اما في بيت ام منصور
اللي كانت تنتظرهم بفرح ودخل منصور ونوف الكلل يزغرط ويستقبلهم وان منصور اللي ترحب في نوف اللي انحرجت وهي تششوف الانظار عليها ام منصور: خذي راحتك يا بنتي افصخي عباتك
نوف نزلت عبايتها وهي تعطيها رحمه اخت منصور الوحيده وكبيره ومتزوجه وزوجة عبد العزيز اخو منصور وبناته وابتدوا يتعرفون على بعض ونوف اللي حبتهم مررره
وبعد شوي جاء منصور ووقفت امه وهي تقول : تعال يمه اجلس جنب زوجتك
منصور : خليك يمه ارتاحي
رحمه: اجلس يا ابن الحلال خل امي تستوعب فرحتها فيك كامله
ابتسم منصور وجلس وهو يشوف فرحة امه اللي كانت كل شوي تردد ( ماشاء الله )
كان منصور فرحان بفرحة امه وكل ما قدموا له شي يعطيه نوف قبله حتى فنجان القهوه صحيح ماكان منصور يعرف يعبر عن حنيته بكلامه بس اسلوبه كان واضح وطبعا هذا الشي لفت انتباه الكل بما فيهم نوف اللي كانت مصدومه بتصرفاته اللي كانت غير عن خيلاتها رغم ان منصور كان يكافح عشان يعامل نوف بكل ود وخصوصا انه بالمفهوم العامي ( دفش شوي ) لكن كان يبذل جهده
.................••............
في حارة عجاج
عند عجاج اللي طلع من البيت بزهق من مرزوقه اللي صايره دايما عندهم وطفش وهو يتناقر معها وقرر انه يطلع لثنيان واتصل بثنيان
ثنيان: هلا عجه
عجاج: اين انت يا زلمه
ثنيان: هههههههههههههههههههه ايوووه وش بلاه الخال قالب شامي
عجاج : طفشان والله
ثنيان : افااا ونورتك وين
عجاج: اسكت تكفى صار عندي ضره
ثنيان: هاااه !
عجاج : مرزوقه الله لا يعيد اليوم اللي عزمتهم فيه على زواجي وتعرفت على الثلاثي المشهور وصارت دايم مسنتره عندي
ثنيان:هههههههههههههههههههههههههههههههههههههههههههه هههههههههههه يووووه يا مرزوقه يوووه خطر خطططططر
عجاج: الا انت وينك
ثنيان: باخذ الترف من عند اهلها وارجع للبيت
عجاج: طيب اسمع تعال انت والترف تغدوا عندنا وبنطلع انا وانت مثل الناس ننبسط ونفلها زي قبل
ثنيان: اخييييراً بتعزمنا ما بيغت
عجاج: ياخي المفروض انت تعزمنا بس الدنيا عكس
ثنيان: اها بس يلا نص ساعه وبنجيك
عجاج : يلا
رجع عجاج للبيت وهو يسمع ضحكهم : نوووره
نوره طلعت: سم
عجاج: سم الله عدوتس لكن يا ليت ما تفلونها انتي مرزوقه مره ترا صرت ساكن بالشارع
ضحكت نوره: والله تونس المفك
عجاج: ايه انتي استانسي وعجاج بالطقاق
نوره: افا عجاجي انا ليه طفشان
عجاج: ابد يقولون نوره ساحبه عليه وجالسه مع مرزوقه
نوره: وش اسوي اطردها ! عاد ضيفه
عجاج : بعدين نتفاهم بس اسمعي ثنيان والترف جايين صلحي لنا الغداء والقهوه
نوره : بالله عليك ، خلاص ابشر الحين اصلحه
عجاج: وخذي المفك معتس يساعدتس مب اكل ومرعى وقلت صنعى
ضحكت نوره وهي تنادي مرزوقه معها للمطبخ
وعجاج اللي طلع ينتظر
................••............
عند ثنيان اللي وصل بيت ابو الترف
ونزل اول ماشاف ابوها واقف وهو يسلم عليه
ابو الترف: مبرووك مبروك الله يتمم لكم ان شاء الله
ثنيان ابتسم: امين يارب
ابو الترف : الله الله بالترف لا تتعبونها
ثنيان : لا تخاف بعيونا
الترف ابتسمت وهي تسلم على ابوها وركبت السياره وهي مستانسه بس داخلياً خايفه
ثنيان اللي بعد ماطلعوا مد يده وهو يشد على يدها :واضح انهم استانسو
الترف : اووه وش تقول الا طاروا بذات صالح يازينه
ثنيان ابتسم : الحمدلله ان شاء الله تقومين بالسلامه وتشوفين فرحتهم اقوى من كذا
الترف : ان شاء الله
ثنيان اللي كان مستانس وهو يسمع سوالفها عن اللي تحس فيه وكإنه اول مره يسمع شعور الحامل
وصلوا حارة عجاج ونزلوا وكالمعتاد اهل الحاره اللي كانوا يسلمون على ثنيان
الترف همست لثنيان : ماشاء الله واضح يحبونك يا ولدهم
ثنيان : يحبوني واحبهم
الترف وهي تناظر واحد من الشبابيك اللي عليها بنت تناظر : الكل ماشاء الله يحبونك
ثنيان انتبه لنبرتها ولف وشافها تناظر وقبل يناظر مسكته الترف : لا تشوف
ثنيان: لييه !
الترف :بس ! وبعدين انت ليه دايم فالحاره قول لعجاج يجي البيت
ثنيان اللي ابتسم وقال بعبط : لا فيه ناس ينتظروني اجي حرام انقطع عنهم
الترف رفعت اصبعها بتهديد : اييه يا قلبي قول من البدايه الروحات والجيات مب لله لكن والله اتحالف مع مرزوقه ضدكم
ابتسم ثنيان ومسك اصبعها وهو ينزله : لو انتس تفكرين بعقلتس شوي بس بتدرين اني ما اشوف غيرتس
الترف : انت ما تشوف بس العيون تشوفك
ثنيان اللي كان مبتسم بطريقه عذبه : لو العيون بتحرك فيني شي كان من سنين مليت من العيون وشبعت منها لكن ما عمر العيون هزتني وهبلتني كثر عيون الترف
ما يمديها الترف ترد الا انفتح الباب وطلعت مرزوقه : ماشاء الله هذا ولدنا
ثنيان: هلا مرزوقه
مرزوقه : حي الله الترف
تقدمت مرزوقه تسلم على الترف وقال ثنيان: بشويش يا مرزوقه كسرتيها
مرزوقه : حريم الخوال ما يتكسرون نعرف حنا سلام بعض
عجاج اللي جاء من ورا : مرزوقه مارحتي للحين
مرزوقه : ياااليل ذا اللي عطيناه وجهه بنروح بنروح احمد ربك ان نوره صديقتي والا والله
عجاج : لا تحلف يالمفك وبسرعه
طلعت مرزوقه اللي معامله العبايه على اساس بشت
وتقدم عجاج يسلم على ثنيان
ثنيان:وين تبيها تروح !
عجاج : والله ماعمري شفت فيها فايده الا ذا الايام ابيها تجيب دبة الغاز
ثنيان طارت عيونه: مرزوقه تجيب دبة الغاز لبيتك وانت وش شغلتك
عجاج: والله تعرفني عجاز بعدين مب مسويه صديقتنا خلنا نستفيد شوي
ثنيان: حسبي لله على عدوينك ان كان حتى صداقتك فيها اعمال شاقه
لف عجاج اللي انتبه لترف : اووه معليش ما شفتس بس ادخلي لنوره تحتريتس
الترف دخلت وهي تضحك على طقطقتهم
عجاج : وين تبي تجلس بالحوض !
ثنيان: ياخي خاف الله بعز القايله بتجلسنا بالحوض درجة الحراره ثلاثه مليون تبي تشوينا
عجاج: وش دراني عنك اعرفك اذا جيت قلت بنجلس برا
ثنيان: ايه بس عصريه مغربيه كذا مب ظهر
عجاج : اقول ادخل ادخل بس وبعدين للمعلوميه كل ما زادوا عدد عيالك صرت نفسيه وقف خلاص
ثنيان:هذا عطاء من ربي استغفر ربك
عجاج: استغففرللله ياخي بس يعني حنا يا خوال ما يفرق معنا ما نتأثر لون ثابت مب زيكم يالبيض
ثنيان : يا رجال لا يغرك اللون انا ابيض خارجياً خال داخلياً
.................••............
عند نوره اللي استقبلت الترف تسلم عليها بحراره
نوره: وش فيتس تضحكين
الترف : اضحك على رجلتس الخبل ، اجل مشغل مرزوقه تكرف عشان قررت تصادقكم
نوره : ههههههههههههههههههههه اسكتي تكفين ذبحني ما يطيقها وهي الله يهديها دايماً هنا ومستقعد لها ويوم شاف ما منها فكه استغلها تشيل عنه الاغراض الثقيله
الترف: هههههههههههههههههههههههه عاد هو ما منه رجى عظم وجلد
نوره: ما علينا المهم عطيني اخبارتس قبل تجي مرزوقه
الترف : ابد قررت اني اكمل حملي وتكفين يا نوره ادعي لي ربي يتمم علي ولا اتركه بلحاله
نوره: ان شاء الله بس انتي تفائلي بالخير
................••............
عند عجاج وثنيان اللي كانوا متسدحين بالمجلس
لف عجاج : ثنيانوووه لايكون شيبنا وش بلانا متسدحين كأنا ضبان
ثنيان: والله مدري ياخي حتى والله اني بدى يطلع لي كرش ويشيب شعري
عجاج : يعني كرشك خالصين منها من زمان لكن الشيب جديده علي
ثنيان: هي كذا الدنيا
عجاج: قم قم خلنا بندور شي نسويه قسم بالله لو جلسنا كذا بكره وإحنا معنا ضغط وسكر ودسك وخشونة ركب وكل شي
ثنيان قام بالقوه: تقدر تقول اني في بداية مشوارها
سحبه عجاج وهو يضحك عليه طلعوا وهم يمشون بالحاره ولكن وقفوا وهم يناظرون في نفس المكان بخبث
كان ابو حمود وابو سعيد جالسين قريب عمارة ابو سعيد اللي تبنى وكانوا جالسين على عربيات النقل ( الخضرا) ويسولفون
عجاج: تصمل
ثنيان اللي رفع ثوبه وهو يربطه على بطنه: حتى اني صملت
ركضوا لهم وهو يوقفون وراهم وبسرعه للبرق كل واحد مسك له عربيه وطاروا بها وسط صراخ ابو سعيد وابو حمود وضحك عجاج وثنيان
ابو سعيد اللي كان يدفه ثنيان كان يضحك اما ابو حمود كان يسب ويلعن لكن من سوء حظ عجاج انه نزل مع ارتفاع كبير وما قدر يسيطر على العربيه وطار معها وصكوا في برميل وطاح عجاج وطاح ابو حمود عليه اللي ماصدق يمسك عجاج عشان يكفخه
ثنيان اللي وقف وهو يضحك بكل صوته على عجاج باس راس ابو سعيد اللي كان صدره وسيع ويضحك وركض وهو يسحب عجاج من ابو حمود
ورغم اللي صار بعجاج الا انه يضحك
ثنيان:هههههههههههههههههههههههههههههههههههههههههههه هههههههههههه عجاجوه شكلك والله شيبت وش بلاك ما قدرت تمسكها
عجاج اللي كان يعرج من رجله : وش اسوي ذا الشايب ثقيل وفوق ذا في دحديره ما قدرت اتماسك
ثنيان اللي كان يضحك وهو يشوف ابو حمود اللي يهاوش وابو سعيد يضحك طلعوا لبيت عجاج وجلسوا بالمجلس وهم للحين يضحكون
................••............
في بيت ابو ثنيان
عند نواف اللي رجع للبيت وجلس بالمجلس هو اول مره يجلس هادي وساكن
دلال : نواف فيك شي !؟
نواف : هاه لا مافيني شي
ابو ثنيان: وش بلاك من يوم جيت وانت جالس بالزوايه ! مسوي شي ؟
نواف : وش اسوي يبه ماعندي شي اسويه
ام ثنيان: لا يكون مريض
نواف: مصدع شوي
سيف: الله يعلم وش وراك
نواف ناظره بهدوء ولف وهو مايبي يدخل بمشكله
وكان الموقف اللي حصل معاه مسيطر على جوه
................••............
في بيت محمد
عند رهام اللي بعد ما جهزت الغداء جلست جنب عمها وهي تنتظر محمد اللي دخل البيت وهو يحاول يهدا ويتزن نفسياً : سلام عليكم
وقفت رهام واتجهت له وهي تاخذ اغراضه من يده : وعليكم السلام
محمد تقدم وهو يبوس راس ابوه وهويشيك عليه قال وهو صاد : قال شي او سوى شي بغيابي
رهام: لا
محمد وهو يناظر ساعته وكان وقت دوا ابوه اعطاه
رهام: غسل عشان تتغدا
وقف محمد وراح يغسل وررجع وهو ما تكلم ابد مع رهام وهذا شي غريب عليه كان اول ما يدخل يحضن رهام ويسلم عليها كان يمطرها بكلامه بس وش فيه من امس !
محمد كان يحس بالذنب يحس ان لو ناظر برهام عيونه بتنطق ويضطر انه يقول كل شي وهذا شي بيتعب رهام ويمكن يدخلها بأزمه
رجع جلس وهو يغدي ابوه وكلامه مختصر مع رهام جداً
محمد: بنام شوي العصر صحيني عندي شغل
رهام اللي كانت متكتفه وتناظره : محمد ! فيك شي ! صاير شي انا سويت شي يزعلك
محمد اوجعه قلبه عليها ووقف وهو يقرب لها ويحتضنها : ابد والله ما جاء منك الا كل شي يرضيني بس زي ما قلت لك مشكله وتنحل بس انتي لا تضغطين علي
رهام : زين الله يريحك
محمد ابتسم وابتعد وهو ينسدح كان يدري ما بينام وهو يفكر لو شوق مسويه له كمين! وش بيسوي
................••............
في بيت عجاج
بعد الغداء طلع ثنيان والترف متجهين لبيتهم اما عجاج اللي طلع من المجلس وهو يعرج
نوره: عجاج بسم لله عليك وش فيك
عجاج : اصابة اللقافه
نوره : ليييه
عجاج جلس وهو يشرح لها الموقف ونوره تضحك عللليه :ههههههههههههههههههههههههههههههههههههههههههههههههه ههههههه اثاريك تلومنا وانت وثنيان ما عليكم قاصر
عجاج: نوسع خواطرنا
نوره: بس حرام الشياب
عجاج: والله انا اللي حرام انا بغيت اتكسر وهو ماشاء الله جثه ما صار له شي
نوره :ههههههههههههههههههههههههههههههههههههههههههههههههه ههههههه
عجاج ابتسم : لو ادري بتضحكين ذا الضحك من زمان معلمتس بالمصايب
نوره بدت تقل ضحكتها تدريجياً باإحراج وعجاج اللي توه يصدق ثنيان اللي كان يقول اذا شفت الترف قلبه يدق لين يوجعني لين احسه بيفجر ضلوعي ابتسم عجاج اللي استمر يسولف لها وهي تضحك وهو يتأمل
.................••............
في بيت ثنيان
عند ثنيان اللي دخل البيت وحصلهم يتغدون: سلام
منيره: وعليكم السلام جيتوا !؟ ما حسبناكم قلنا دام تأخرتوا بتتغدون هناك
ثنيان: تغدينا تغدينا بالعافيه عليكم
مشاعل: تغدوا معنا شوي
ثنيان: انا مابي مدري عن الترف
الترف : والله حتى انا
ثنيان: المهم تجهزوا العصر بنطلع لامي صلحوا اللي تقدرون عليه قهوه شاهي ومن ذا الشغلات
منيره : ابشر
ثنيان: وانتي مشاعل الله يعافيك سوي فطايرك المعتاده من زمان مشتهيها
الترف : اي والله حتى انا
مشاعل: من عيوني
محمد : طيب يبه احنا بنروح للحديقه عند جدتي ما فيه احد قدنا
عمر: ايه يا بابا اليوم خميس وويكند بنستانس
ثنيان: اذا صحيت خير لا تزعجوني بنام
طلع ثنيان متجهه لغرفة الترف اللي كانت ابعد غرفه عن الازعاج وارتمى وهو للحين يضحك على طيحة عجاج
مشاعل ومنيره اللي جمعوا السفره وبعدها كل وحده بدت تسوي اللي يعجبها
الترف : قولوا لي وش اساعدكم فيه
منيره: ولا تساعدين ولا شي ارتاحي وجهك تعبان
مشاعل: اخذي لك شاهي واجلسي اذاا تبين تجلسين واذا تبين اطلعي نامي شوي
الترف : ياخي مابيصير لي شي اذا ساعدت
محمد: يمه بنروح ننام مع ابوي
منيره: توه يقول لا تزعجوني
عمر: بندخل بشويش
مشاعل: اقول اجلسوا ترا بيعصب ويهاوشكم
الترف : تعالوا بس وش يهاوش عياله ترا
اخذتهم الترف وطلعت معهم فتحت الغرفه بشويش وهو ما تشوف الا ظهر ثنيان اللي كان توه داخل بنومه
الترف بهمس : ادخلوا بشويش وناموا مالي دخل اذا سويتوا ازعاج وطردكم
محمد : طيب
دخلوا بشويش مع ثنيان والترف دخلت وهي تنزل عبايتها وتجهز اغراضها للعصر كانت جالسه وهي تدور على اغراضها بالكشاف بس شهقت ولما حست احد وراها : يمممه ثنيان فجعتني وش فيك
ثنيان : وش تسوين هنا !
الترف : اجهز اغراضي
ثنيان: تجهزين اغراضك بكل هالهدوء وش صاير بالدنيا !؟
الترف : ليييه ؟
ثنيان : المفروض تزعجيني بس ما ازعجتي!؟ فيك شي
الترف وقفت وهي تكتف : انت الواحد ما يسوي فيك خير ، قلت مسكين تعبان يبي يرتاح بس ماش ما ينفع
ثنيان ابتسم : يعني المفروض تزعجيني وقلت دامها ما ازعجت اكيد فيها شي
الترف : لا ما فيني شي يا خساره مايمديك تفرح
ثنيان: انا افرح اذا صار فيك شي !
الترف ضحكت بفشله: الصدق لا والله بالعكس تشيل همي والله يعني ما ألحق جزاك جعلني ما ا ألحق عزاك
ثنيان اللي رااح فيها حرفياً هو يموت على الترف اذا كانت معصبه وعناديه فما بالك اذا كانت تمدحه كذا ابتسم وصغرت عيونه من قوة ضحكته تقدم وهو للي مندفع لكن وقفته الترف : العيال فيييه
ثنيان غمض ورجع ورا: من قالك تجيبينهم
الترف : يبون ينامون معك مب حرام
ثنيان: انا والله اللي حرام اللي يصير فيني
ضحكت الترف : روح نام عيونك حمرا وبتصحى العصر اقل شي ريح شوي
ثنيان : عز الله ما ارتحت لحالي انتظري دقيقه
راح وهو يناظر عمر ومحمد اللي كانوا نايمين تماماً وخصوصاً انهم تعبانين من المدرسه اخذهم وهو يبعدهم على طرف : تعالي
الترف : وين !
ثنيان اللي كان بالنص : تعالي هنا
الترف : انهبلت العيال كبار لو صحوا وشافوني جنبك كذا وش بيقولون
ثنيان : واذا
الترف : لا انت ضربت فيوزك مستحيل! انسى
ثنيان : يا شينتس اذا عاندتي
قربت الترف وهو تدفهم لنص بينها وبين ثنيان : كذا ايه
ثنيان: والله انتي المهبوله لو يرفسونك الحين !
الترف : لا ما بيرفسون انا احس
ثنيان : بوديهم غرفتهم احسن
الترف : والله ما توديهم حرام عليك بينامون معك
ثنيان صد وانسدح وهو يحط اللحاف على راسه : الشرهه مب عليك علي انا اللي ادور قربك
الترف ابتسمت وهد تمد يدها وسحبت وهي تشد على يده : لا تكبرها عاد ، ولا تنام ضايق بضيق انا بعد
ثنيان وخر اللحاف : اذا تحاولين تستعطفيني ماعاد يمديك
الترف ضحكت: والله صدق
ثنيان : تعالي جنبي لين انام وارجعي
الترف راحت وهي تنسدح بجنبه وحتضنها ثنيان اللي ما عاد يطيق يبعد عنها اكثر صار اذا بينام عند مشاعل او منيره يشيل هم ماعاد يدري وش الحل مع ذا الحب بس مجبور انه يعدل وغصب عليه بعد
شويات ونام وابتعدت الترف وهي ترجع لمكانها وهي بعد صارت مب قادره تشارك ثنيان مع احد بس لو كان هالاحد غير منيره ومشاعل ماكان سكتت بس طيبة مشاعل ومنيره تجبرها انها تحبهم وتقاسمهم كل شي برضا قلب وخاطر
.
.
انتهى✨