بلجيكي

رواية #بلجيكي

....
رواية بلهجة بنغازية
اقرووها حتعجبكم واجد
للكاتب : بنغازيانو
....
الحلقة الاولى
,,,,,
منير متزوج له اكثر من سنتين
وكان حالته المادية فقيرة بعض الشي
وزوجته تخدم ممرضة في عيادة الطارق
اسماها هاجر
مزال ربّي مارزقهمش باي مولود
ويسكنو في اجار
في حوش ربط صغير في بوعطني
هو بالاسم حووش
لكن كان بمثابة الشقة الصغيرة
باته وامه عايشين في حوش ثاني
اللي هو حوش العيلة
لكن هو عندة عزّة نفس ومابش يسكن مع باته وامه
منير ماعندش عمل حكومي
كل مرة يخدم في حاجة
وحتى سيارة ماعندش
وهاجر زوجته تمشي للعيادة باشتراك حافلة
حتى المرتب اللي تاخذ فيه ضعيف بكل
لكن متحمله الفقر مع منير
لانها كانت بيناتهم اقوى قصة حب
قصة حبّهم اقوى من الفقر اللي هما قاعدين فيه
’’’
في صباح أحد الايام
هاجر : هيا نوض ياقلبي سادك نوووم
منير : باهي تووو انوووض
هاجر : عارف اليوووم شن ولا لا
منير : شن اليوووووم
هاجر : صحصح بس وتعال دايرتلك فطوور
منير : تمام
,,,,
بعد مرور 10 دقايق
منير طلع عليها في الصالة
هاجر : صح النووم ياحبي
منير : نجك ليا اقليبي
هاجر : افطر افطر ياغلايا
منير : توا شفت اليوووم شن
لا هو شهر 4 عيد ميلادك
ولا هو شهر 9 عيد زواجنا
هاجر : حسستني امقطع روحك بالهدايا هههههه
منير : المهم مذكرّهن .. يمشي الجو وخلاص
هاجر : ياشاطر اليووم نهاية الشهر
معناها بكرة حايجيينا صاحب الحوش يبي الاجار
منير : تي آآآآآآآآآه قصدك هذي انت
هاجر : عندك حق الاجار صح قتلي
منير : اها قاعدات ,, دبّرت راسي اكيف انحصلهن
هاجر : من ويلك الفلوس وانت كل مرة تخدم في مكان
منير : مش شورك المهم وفرتهن وخلاص
هاجر : تمام ,, افطر وخليني انوتي
روحي اكيدة الحافلة قريب اتجي
منير : تمام خوذي راحتك
,,,
بعد مرور نص ساعة كانت هاجر طالعة من الحوش
وماشية شور عيادة الطارق
وقاعد منير يفكر ويخمم في قصة الاجار
كان يكذب عليها ويمشّي فيها
هو صح كان عنده حق الاجار وداسهن
لكن دفع بيهن دين عليه
منير وهو يحكي مع نفسه
" زعمك من وين نبي انجيبهن
عليك موضوع هالفقر
تو نمشي شور الباركي نسترزق علي حالي وخلاص
انمشوو وقتنا لين ربّي يفرجها "
,,,,
كان لما يكسد يمشي لباركي سوق المصرية امتاع البدرية
ويخدم عالباركي يحمي في السيارات
وعالسيارة ياخذ في 2 دينار وهكذا
,,,,,,
كانت هاجر في قمة الجمال والحشمة
ومن افضل وانشط الممرضات في عيادة الطارق
قاعدة قدام وحدة من الغرف امتاعات المعاينة
ماسكة كتيب المريض واضبّحله
هاجر : وين فتحي علي
فتحي علي
صبّى فتحي وكانت مع زوجته
لكن بّحت في هاجر وابتسم
وكأنّ لا مع مراته لاشي
لكن فتاته ومش جديدة عليها الجو هذا
وقالت بينها وبين نفسها
" حتى بصبايهم ومزال اعيونهم مش مليانات "
,,,,
قاعد منير كالعادة في الباركي
شاف واحد يبي يطلع من الباركي
منير : اووي اوووي ارجى
" صاحب السيارة : نعم
منير : عطينا اجناهين حق الباركي
صاحب السيارة : نعطك تل علي ظهرك
اقلب وجك خير ماننزل انشرّطك
منير : اتشرطني كيف ,, امّالا تحسابها سايبة
صاحب السيارة نزل
وطلع ستّة في الستة
و كان عندة اسلاح بلجيكي
صاحب السيارة : اتشرطني كيف صار
منير كسر الشّر ورد عليه
منير : حصل خير ياخونا معش نبوهن الافلووس
صاحب السيارة : لازم انفنصّو عشان اتخافوو
ومشى صاحب السيارة
منير بينه وبين نفسه
" غير انفكر في هاجر وباتي وامي ومش ناقصني افلام هندية "
شاف واحد ثاني يبي يطلع من الباركي
منير : اوووي اوووي ارجى ارجى
عدّى يجري شورا
,,,,,
هاجر وهي امصبية عند غرفة التمريض
شافت صحبتها اعيوونها حمر
اسماها نرمين وهي ممرضة امعاها
هاجر مشت شوورها
هاجر : كنك شن فيه نيمو
نرمين : خايفة من نزار
هاجر : مش فصختي خطوبتك
نرمين  : اها بس هو امتاع احبوب
خايفة ايجيني هنا للعيادة واديرلي هرجة
هاجر : لا ماحتّى جا هنا
نرمين : باهي تخيلّى جاه هنا 
هاجر : متخافش انا قاعدة هنا وامعاك
,,,,
منير وهو في الباركي
ويلم في الفلوس من السيارات
مرة مرة يخطر عليه
قصة الاجار
زعمك حيجي اليووم اللي نلعب بالفلووس
وانعيشوو في احلى قصر فيك يابنغازي
,,,,,
بعد مرور 5  ساعات ,,,