بلجيكي

رواية #بلجيكي

للكاتب : بنغازيانو
.......
" لو مش قاري الحلقة 1 مش حتفهم شي
خش عالصفحة حتطلع امعاك الحلقة الاولى "
.......

الحلقة 2

الشرطي : شن هذا شن الدم هذا
منير وهو متهلوس قال
" شن عقاب دم
واحد حاول يقتلني ودافعت علي نفسي "
الشرطي طلّع الكلبشات
وحطوهن علي يّده وفتشّو السيارة
اللي كان فيها
لقووه فيها اسلاح نزار
وشالوو لمركز الشرطة

وحطوو في الحجز ابرووحه
حط راسة عالساس وقعد يبّحت فوووق
والدمعة علي خدّة
ومش فاهم شي
,,,,,
الصل استغرب معش جاء نزار ولا رد عليه
يرن عليه الصل لكن مافش رد
الصل : في شن ادير  يانزار
وينك ,, كنّك معش جيت
زعمك روّح شور حوشهم
بعد ماصفّاهم .. هيا رد علي نقالك
,,,,
صباح ثاني يووووم
ناضت هاجر وكان وجها تاعب من البكاء
لقت رسالة من عمتها ام منير
" جايّك عمّك ,, حيجيبك تقعدي امعانا
خليك واتيه جايك مع 10 "
هاجر مش قادرة تمشي ولا اتحرك
ومنهارة بكل وزعلانة ومتنكدة
وتبي أي شي يطمنّها علي منير
فتحت الفيس اشوية تصفح
شافت صفحة عاجل بنغازي الاصلية
امنزل منشوور الصبح بدري
" العثور على جثتين في شارع الزيت
وكانت صوورتهم باينه
لكن نزار من كثرة ما منير
ضرب وجه بالحيطة لين
قعد معش فيه ملامح لوجه ,,
ومش معرووف مزال من هما صاحب الجثتين
اللي انتشرن عالفيس بدون اسامي صور بس
خافت هاجر واضايقت اكثر واكثر
هاجر : يارب طمنّي علي منير
,,,,
تذكرّو اسم بوفا في الحلقة السابقة
حنذكّركم بالمشهد اللي صار بين
الصل وفيصل 
...
الصل : وانت وين حق البضاعة
فيصل : عطيني مهلة حنجيبه لكّي
الصل : ههههه مزال تبي مهلة تكذب علي من
عارفين انّ جماعة بوهديمة فكّوها منّك يامضحكة
فيصل : لا علي اساس قالي بوفا تو نعطيك حقّها
الصّل : بوفا انا ويا مش واحد
وسيوري قاتله غير يطلع من بوهديمة بس
,,,
بوفا تاجر مخدرات من بوهديمة
ويعتبر العدو اللدود للصل
عايش هو واخته فاطمة وامه
...
في الوقت الحاضر 

بوفا وهو يشرب في القهوة
مع امّه واخته عالصبح
شاف الخبر حتّى هوو
العثور على جثتين في طريق الزيت
" زعمك من هذيما اللي صفوووهم
دواعش ولا احسابات شخصية "
فاطمة : بوفا هيا تبي اتشيلني ولا لا
بوفا : وين انشيلك
فاطمة : ماهو قتلك عيادة الطارق
اختارووني نبي
نبدا امعاهم في التمريض
ملّيت من قعدة الحوش
بوفا : عليش مليتي شن ناقصك
قوليلها يا امي انصحيها
مالك ومال الشغل
البلاد مافهش امان
وانا خايف عليك
ام بوفا : خليها اتغير جوها ملت
واكيدة طبيعة العمل في النهار بس
فاطمة : ماعندي عليش انخاف ,, انسيت
انّي اخت بوفا اللي كلها اتخاف منّه
بوفا ولد بوهديمة
بوفا : ههههههه حتى انتي فاطمة
البنت الوحيدة اللي تعرف تضرب بالسلاح
وعندها خلفية علي جميع انواع الاسلحة
انتي كان جيتي شاب راك خربتي بنغازي
الحمد لله جيتي بنت
فاطمة : باااااارد هيا اشوية وشيلني
بوفا : تمام غيري وجهزي وانشيلك ياسكنان
,,,,,,
انتشر خبر العثور علي جثتين
في جميع مواقع التواصل الاجتماعي
وحتى اساميهم انتشرن
" فيصل ونزار "
,,,,
كان منير نايض لكن قاعد في الحجز ومش فاهم شي
هكي اشوية انفتح عليه باب الحجز
خش عليه واحد واضح علي اسم كبير في الشرطة
" امعاك الافندي حمد "
منير : مرحبتين
الافندي حمد : حنبقى امعاك اصلي
لوكنت صادق امعايا ,,  نبيك تحكيلي بالتفصيل
شن قصة الدم اللي عليك
والاسلاح اللي لقو في سيارتك
وهل الاثنين اللي ماتو اليووم
انت قتلتهم ولا لا
منير : أي اثنين ماقتلت حد انا
الافندي : واحد اسمه فيصل
والثاني نزار
فيصل مات بطلق ناري
ونزار مات من نزيف عالراس
ومتشوه وجه
منير : اللي معا فيصل اسمه نزار قصدك
وكيف عرفت اساميهم انت
الافندي حمد : بنغازي كلها اعرفت من النت
هيا احكيلي بالتفصيل شن صار
منير : باهي ممكن انطمن زوجتي وباتي وامي
اكيدة منشغلين عليا
الافندي حمد : قتلك احكيلي بالتفصيل شن
صار مزال نحكي امعاك باسلوب حضاري
منير : حاضر
,,,,
الصل راقيلا ومتعقد وغمّت عليه
شاف الصوور عالنت
الصل : معقولة واحد كيف هذا
يقتل نزار
معقولة هالضعيف هذا يقتل نزار
باهي وين عدّه ولا شن صار بالزبط
زعمك هذا يعرف حد من جماعتنا
وداير روحه طيّب ودرويش
ولّا من يطلع هذا
,,,,
كانت هاجر قاعدة عند اهل منير
ومضايقة ومتنكدة
هاجر : فطرتي ياعمتّي
ولا انديرلك حاجة تكليها
ام منير : لافطرت انا والحاج امبدري
خليك متريحة
وربي يطمنّا علي منير
هاجر : ياااااااااارب
هكّي اشوية هاجر سمعت نقالها يرن
طلعت نرمين
هاجر : الووو نرمين
نرمين : اهلين هاجر سمعتي عليهم
عالنت اللي لقوهم ميّتين
هاجر : اها شفتهم عالصبح اليووم
نرمين : في واحد منهم اسمه نزار شفتي
هاجر : لاشفتهم عالصبح بدري امنزلينهم
بدوون اسامي
نرمين : هذا نزار اللي فصخت خطوبتي بي
هاجر وهي مصدومة : شن
نرمين : اها هو
لاعرفت نفرح لا نبكي علي مووته
هاجر : شن قصته هوو
بالك عندة توجه سياسي هكي ولا هكي
نرمين : لا ..عرفته هذا
السياسة في وادي
وهوو في وادي
نعرفه انّ ادمان مخدرات ويتاجر بيهن وهكي
وعرفته متاخر كان هذا
ماخليتش حتى يفكر يخطبني
هاجر : يربح افتكيتي منّا
ربّي طيّحه في شر اعماله
نرمين : الحق مش واجعني واجد
ياما دار فيا من ظلم
الحمد لله فصخت قبل مايموووت
هاجر : الحمد لله
نرمين : اليوم قالولي جايا بنت جديدة
يبووني انعلمها نظام العمل معش جت نرجى فيها
هاجر : باهي تمام اتونسك
انا صعب حاليا انجي غادي
نرمين : يارب تطلع فيها جو
وماتطلعش غليظة
,,
هاجر مزالت مضايقة
وماعندش جو اتهدرز
...
هاجر : نستاذنك توا غير قاعدة مع عمتي
نرمين : خوذي راحتك حبيت نطمن عليك
,,,,
فاطمة كانت دايرة علاقة حب مع
رفيق وصديق خوها بوفا واسمه صالح
لكن بدوون علمه ومن وراه
كان يندري عليها يدفنه هو حي
كان صالح يوعد فيها بالزواج
هذا عليش دايرة امعا علاقة حب
وهي راكبة في السيارة اتهدرز مع خوها
هو شايلها لعيادة الطارق
سمعت نقالها يرن
طلع صالح
سكّرت عليه وبعثتلا مسج
" قاعدة جنب بوفا
حنكلمك بعدين  "
رد عليها
" تمام يا حبي "
بوفا : من اللي رنت وسكّرت هذي
مقدمها عليك عجاج
فاطمة : هذي صاحبتي
تسال فيها شن صار امعايا في الطارق
حندوّرها بعدين
بوفا : تمام ,, وصلنا للعيادة
امتى ماتبي اتروحّي رنّي عليا
وكان في حد تنطّر عليك اوصاع عليك
رني عليا انجيك
فاطمة : عارفني انهني ابروحي ونعجبك
مازال ماجباته امّه اللي يجي شوري
بوفا : اوكي يافندام هههه
توا تبي تبدا في المدح
راك بنت وعيشي الانوثة
وانا اتقول راكب جانبي صاجبي صالح
مافش ملامح انوثة بكل
فاطمة : هههههههههههه
بوفا : هيا انزلي انزلي
فاطمة : تم بيناتنا الوووو
,,,,
كان منير حاكي كل شي للافندي حمد بالتفصيل الممل
الافندي حمد : مع انّ كلامك مش مقنع وماخشش راسي
بس اكيدة عارف مكان المزرعة اللي كنت مخطوف فيها
وقتلي صاحب المزرعة واحد اسمه الصل
تمام اول حاجة حنديرووها
حتطلع امعانا شوور المزرعة انشوفووها
منير : باهي خليني انطمن اهلي بس حتى اشوية
الافندي حمد : مزال نعرفو ميّتك قبل
ونعرفوك صادق او لا
مرات  هذيما ناس تعطي فيهم اشارة ولا كلمة سر
منير : حي علي امّه
درتني نخدم مع منظمة عليك قصة
الافندي حمد : خلاص تبي اتصاحبني انت
هيا اشوية وتمشي امعانا للمزرعة
,,,,
بمجرد ماخشّت فاطمة لعيادة الطارق
رنّت علي صالح
فاطمة : اهلين يا اصلوحة
صالح : مرحبتين حبي
فاطمة : انت تستعبط ولا شن
صالح : كنك
فاطمة : مش قتلك معش اترن عليا
لين انرن عليك انا
صالح : تي باهي وانتي خايفة من خوك
فاطمة : مش قصة خايفة
مانبّش يقعد منظرنا بايخ
راهُ صابرة عليك
لانك قتلي هالايام هذينا
حتفتح الموضوع مع خويا وتخطبني
صالح : تي باهي قلنالك كنك
فاطمة : باهي توا خليني انشوف حالي
هذا وين وصلت للعيادة
صالح : امتى ماتفضي دوّريني ياقلبي
,,,,,
كان الافندي حمد ومنير
وكم شرطي واصلين للمزرعة
كانت المزرعة شبه فاضية
مافيها حد
حتى الحوش اللي خشّوو فيه فاضي
الافندي حمد : كيف صار وين
فاضية ,, اتنش المزرعة
بالك غالط في المكان
منير : لا هي المزرعة متاكد انا
وكانن في سيارات هنا واجد
اخرة تعال خش الغرفة هذي كنّا فيها وامعبية دم
خش للغرفة لقووها مافهش دم
بس كان الزليز واضح عليه مغسوول
الافندي حمد : تكذب علينا انت ولا تجري بينا
منير : لا كان في هنا دم
وشكلهم اغسلو الزليز واضح عليه نظيف
الافندي حمد : حطوّه في الشيلّا من لاورة
يا حاجتين يا انت هبل ومريض نفسي
او تكذب علينا
جيتك بالاسلوب الحضاري
لكن شكلك تبيني انوريك وجي الثاني
منير : أي وجه حرام عليكم
والله مظلوووم ياهووو
انا ماشوري شي
زي ماقتلك مش قصدي نقتله
وكنت اندافع عليه رووحي بس
الافندي حمد : ولا كلمة شيلوووه
,,,,,
في الماضي