هذي القصه من القصص الواقعيه التي تروي واقع عراقي بحت ..حدثت هذه القصه وقت التسعينيات من القرن الماضي و قد تكون هناك الكثير من القصص الشبيهه بها ..لكن لكل قصة نكهتها
قصة
#رسائل_الياسمين
ج 1
بالعراق تعلمنه انه يكون ماضينه اجمل بكثير من حاضرنه ..
وتبقى للذكريات طعم وجمال وعبق غريب رغم المآسي والالام اللي يحملهه
قصتي بيها الكثير من الالم ... وبيها درس عميق للبنات
اقرن قصتي وتعلمن منها ..الدرس الصعب ... وثمنه غالي
والدتي تكول ...اول ماجيتي للدنيا كنتي صغيره وناعمه وبيضه وحلوه مثل زهرة الياسمين ..
ابوج الله يرحمه سماج ياسمين لان هذا الاسم كلش يناسبج..
والدي كان ضابط برتبه عاليه بالجيش ...
احنا كنا اربعه ولدين وبنتين واني اصغرهم ..
هوايتي من كنت صغيره هي الرسم ... وكلهم توقعولي اصير رسامه من اكبر لان ايدي بالرسم ايد فنان ممارس..
كانت حياتنه هادئه ...
وامورنه الماديه جيده جدا ..
كنت متعلقه بوالدي كلش... وهوايه ايام كنت انام ابجي لان اشتاقله واسمع اخبار هجوم بالجبهه بالحرب مال ايران واظل خايفه عليه...
واحلى أيام حياتي كان بيوم اللي يرجع مجاز
من انتهت الحرب يمكن حسيت اني اكثر وحده فرحت بالعالم لان الخطر زال عن ابويه
كنت بوقتها طالبه بالاعداديه
اخويه ياسر الكبير كان مرحله ثالثه بكلية الاداره والاقتصاد
ومصطفى بصف اول كلية اداب
ونسرين بالسادس اعدادي
والدتي معلمه ..
وضعنا المادي جيد جدا
وعلاقة امي وابويه كلش حلوه ..
وهذا اللي خلانه عايشين بهدوء ومشاكل قليله
امي طبعهه هادئه وذكيه وتحل الامور بهدوء بالرغم من انه ابويه كان عصبي شويه ..
بس اسلوبهه خله البيت كله حلو
حتى تعاملهه ويانه كانت تتعامل ويانه كأخت وصديقه مقربه
نتمسك بنصائحها وننتبه على كلشي تكوله النه
اوقات فراغي كنت اقضيها بالرسم
ومهارتي تتطور على يوم ..وامي كانت توفر كل مواد الرسم وتشجعني حتى اتطور
وبالفعل كانت هوايتي تتطور
واشتريت كتب تدريب عالرسم
وخليت ابالي انه ادخل اكاديمية فنون جميله قسم تشكيلي
وبالفعل ..
دخلت الكليه رغم كان معدلي يجيب كليه اعلى
بس رغبتي هاي ومحد عارض لان كلهم يعرفن هاي مصلحتي
كل اساتذتي تعجبو على مهاراتي بالرسم وكالولي رسمج رسم فنان محترف..
واهتمو بيه كلش هوايه
اهتمامي كان بدراستي ورسمي وبس ماعندي اي اهتمام اخر
بصف ثاني كليه .. لفت نظري شاب بقسم اخر دائما يتبعني
ويظل يباوعلي ويبتسم
كان شاب هاديء او بي وسامه وجهه مبتسم دائما
كنت احاول اتجاهله ..بس كنت وين ماروح اشوفه كدامي
حتى صار جزء من يومياتي
وباليوم اللي ماشوفه من الصبح بنفس المكان وكأنه ينتظرني ..كنت احس اكو شي غريب باليوم
بقينا شهرين على نفس الوضع
وره فتره كمت من اباوعله ويبتسم ابادل ابتسامه..
احس بالفرح .. يحرك شي بداخلي
بس احنا تربينا عالالتزام ..وامي حذرتنه من هيج سوالف
اكثر المرات طنت اشوفه وحده
ومرات ولد ويا
وصديقاتي انتبهن...
وكمنا من نفترربالكليه ونشوفه كدامنه كلنا نبتسم وهو يبادلنه الابتسامه
وفد يوم رحت للكليه .. وبذاك اليوم ...كان اكو شي غريب..
هو ماكان موجود
ظليت ادور عليه لااراديا ... وصديقاتي هم افتقدو
بيومه حسيت نفسي كئيبه وحزينه .. كانه يوم ناقص
رجعت للبيت تعبانه ... مكدرت اكل زين
امي توقعت مريضه ..
بس ليش كل هذا ؟
ليش هيج حزن بداخلي ؟ معقوله متعلقه بي ؟
احبه مثلا ؟
كنت اخاف حتى ويه نفسي احجي بهيج موضوع
تربيتنا وتوصيات امي خلتنه دائما بحذر
رحت ثاني يوم للكليه ..كان يوم خميس وهم ماكو
شنو الصار ؟ ..وينه ؟ اكيد بي شي ؟
رغم اني ماكنت اعرف عنه شي ولاحتى اسمه
بس القلق دمرني ..وحتى صديقاتي ظلن يسألن وينه؟
شلون المن اسأل ؟
وزود قلقي من بده الاسبوع الاخر وهو ماكو
احس كلبي انقبض كلش .. بس مااكدر كلشي اسوي
رحت وره مافات يومين بالاسبوع
دخلت الكليه ومشيت شويه .. شفته واكف وطلاب يمه يعزوه وهو شكله حزين كلش وتعبان الاخر حد ..
فتت من يمه ردت اعرف شكو ؟
وصارت عيني بعينه ... الابتسامه ضايعه من وجهه
بس بعيونه شوك ولهفه رغم الحزن
حاولت امشي على كيفي حتى افتهم شكو
وسمعت ديحجون ويا ...
الله يرحمه ويصبركم ..الاخ عزيز وميتعوض
وافتهمت انه اخو الميت
كلبي انعصر وانقهرت كلش .. وتمني اني هم اعزي واحجي ويا واخفف عنه
هذا الانسان بده ياخذ مساحه كبيره بداخلي ..
احسه صار شغلي الشاغل .. واكثر تفكيري بي
ومرت ايام .. وهو مو مثل قبل واكيد حقه
اشوفه مبتعد وكاعد وحده وحزين
وره اسبوعين...كان عدنه امتحان .. واني مقاريه زين
كنا معزومين بحفله وبيومهه مقريت للامتحان
المحاضره اللي قبل الامتحان كلت اضربهه واكعد اقره
دخلو صديقاتي مها و بسمه للمحاضره
اني بقيت كاعده بحديقة الكليه اقره
وفجأه شفت شخص وكف كدامي
رفعت عيني هذا هو !!!
مااعرف شنو صار بيه
مشاعر مختلفه... ودكات كلبي صارت سريعه وقويه
خجل وفرح ... ورجفه بجسمي
صارت عيني بعينه ... سلم عليه
- صباح الخير ياسمين
ويعرف اسمي بعد ...
احس الحروف وكفن بحنجرتي ومايرضن يطلعن
وكوه جاوبته
- صباح النور ...
صوتي بي رجفه بكد ال جفه اللي بكلبي وجسمي
هو ابتسم كلي
- علي ... اسمي علي..وبعدين شبيج هلكد خايفه وترجفين ... اذا سببتلج احراج اروح
علي حلو اسمه...حاولت اسيطر على نفسي وكتله
- لا لا بالعكس ..ماكو احراج
- تسمحيلي اكعد يمج
- اي اي تفضل
مشاعر هوايه ... بس اكثرهن كان السعاده والفرح
- سمعت عنج انت رسامه ماهره وشفت لوحاتج بالمعرض العام الفات
- اني ارسم من جنت صغيره...هي موهبه
- فعلا موهبه... واصلا انت مبين عليج رقيقه وحساسه والرسم لايكلج
كلماته حلوه ..واني ممتعوده اكعد وحدي ويه شاب واسولف ويا ..بس هو يختلف ارتاحيتله
- اشكرك... هذا ذوقك
- تعرفين ياسمين ..انت اسم على مسمى .. شكلج فعلا يشبه ورد الياسمين .. ماخذه من الجمال والرقه والهدوء والاخلاق اللي مثل لونه
مااعرف ليش فرحت واني اسمع شي يشبه الغزل
الغزل والحب بطقوسنه وقوانينه مرفوض
اني دنكت راسي ...وخجلت فعلا بس احس بسعاده
كتله
- مجامله حلوه منك
- لا والله ..هذا رأيي بيج من اول يوم شفتج.. وانت منتبهه عليه
جنت اتمنى اتعرف عليج..بس ماردت احرجج ... وهسه صارت فرصه احجي وياج
- فرصه حلوه...
شفت الوقت راح ...ترخصت منه كتله عندي امتحان كلي
- اخذي راحتج .. واكيد راح نلتقي بعد ونسولف
هزيت راسي نعم
واخذت بعضي ودخلت الامتحان
والحقيقه اني حتى الامتحان نسيته ...
بعدني ارجف وخايفه وفرحانه ... شي صعب الوصف
وراهه كامت تتغير علاقتي بي
يوكف بنفس المكان يوميه
ويستقبلني .... افرح من اشوفه ينتظرني
وارتاح لابتسامته
كمنا نتمشى سوه..نسولف..نكعد سوه
كلامنه عام ...يحجيلي عن نفسه ..عن اهله ..عن اخو اللي مات بحادث سياره وكان اقرب واحد اله
اللي عرفته انه هو من المنطقه الجنوبيه... ابو فلاح
حياتهم اقرب للريف من المدينه
خواته متزوجات وباقيه وحده
واخوانه واحد متزوج والثاني توفى بالحادث
علي اخذ من كلبي ومشاعري هوايه
تفكيري وسعادتي وفرحتي كانت بوجودي ويا
ومن اكعد بالبيت واشتاقله
اكتبله رساله اطلع كل اللي بداخلي وبعدين اطويها واخليها بعلبه صغيره واحس بالراحه وراهه
مرت الايام والشهور ... وقوت علاقتنه ..
كانت علاقه طاهره وشريفه ..وهو انسان مليان اخلاق وشهامه
وحبيته من كلبي
وهو كان يحبني اكثر ويهتم بيه ...
والرسائل اللي كنت اخليها بعلبه ... كمت يوميه انطي رساله وهو هم ينطيني رساله .. ومن ارجع اقراهه وكانت اجمل شي هاي الكلمات
اتفقنه تكون علبة الرسائل ويانه ونحتفظ بيها وتبقى اجمل ذكرياتنه بيها
گلي هاي الرسائل هي اجمل شي بحياتي
هي رسائل ياسمينتي الرائعه
وبين الدراسه والرسم وعلي
وصلنا اليوم التخرج
اتفقنا بعد التخرج انه يخطبني
هو كلي عدة مرات انه خايف من هاي الخطوه
وكان دائما يكولي انتي وين واني وين
وجنت ازعل من يكول هيج
اكوله لاتعيد هذا الكلام ...
بس بداخلي كانت اكو حقيقه وماريد اصدكهه
اهلي .... صعب يقتنعون بي
اختي تخرجت وتزوجت قبلي من ولد صيدلاني واهله من طبقتنه
معقوله اهلي راح يوافقون على زواجي منه ؟
بس اني كنت على استعداد احارب علموده ...
لان الحب اللي بيناتنه صعب ينوصف..وصعب ينتهي بسهوله
وقررت اكول النسرين اول مره
من كملنا الامتحان اخر يوم ...
اتفقنا نبقى على تواصل بالتليفون وحسب ظروفي
الى ان هو يرتب اموره ويجي يتقدم
ونحاول نلتقي بين مده ومده
كان هذا اصعب يوم بحياتي
وهو كان يشكي دائما من وضعهم المادي لان كان حصار بوقتهه والناس عايشه معاناة
ياسر اخويه تزوج بنت خالتي وكعد ويانه
بوقتهه كان اكو تعيين بس الراتب قليل
احنا كان وضعنه جيد وابويه كدر يسوي محل الاخوتي يشتغلون بي اضافه للوظيفه
اصعب ايامي عشتها بذاك الوقت
من تفاركت ويه علي ... كمت مااكدر اشوفه والتليفون موبسهوله اكدر اتصل
ورجعت اكتب رسائل واخليها بالعلبه ...
رسائل مليانه حنين ودموع والم الفراك اللي تعبني كلش
طلع تعييني بمدرسه . معلمة فنيه
وداومت ... جنت اتمنى انسى شويه هذا الشوق اللي تعبني
مرت اربع شهور واني مشايفه علي ..اللي اعرفه لبس جندي وينزل كل كم اسبوع مره
ومسمعت صوته غير بالكوه وخمس مرات بس
ومره كانو اهلي كلهم طالعين
اتصلت ... طلعتلي مره
كتلها اريد علي
كالت منو انتي ..شتردين منه ..مااعرف ليش حسيتهه معصبه مني
رأسا اجاني صوته
اهلا وردتي...مشتاااقلج بكد الهوه
اني راسا كمت ابجي كتله علي ... مشتاقتلك واتمنى اشوفك
كال اني حموت على شوفتج
كال اني اجازتي .. وهمزين خابرتي اليوم لان البارحه نزلت،،، وراح اجي البغداد اشوفج لان حموت
واتفقنه بعد يومين نلتقي بكافتيريا
وره يومين اخذت اجازه زمنيه ... وجنت متلهفه اشوفه
اشهر فاتت على فراكنه وتعبت
واخذت تكسي ورحت للمكان اللي اتفقنا عليه
تابعوني بالجزء الثاني
#شيرين_الصفار
أنت تقرأ
رسائل الياسمين
Romanceهذه القصة من الواقع العراقي حدثت بالتسعينات كل زمن ووقت اله احداث وروايات تبقى بالذاكره نسردها لكم للعبره
