قصة
#رسائل_الياسمين
ج 5
الموضوع اخذ اتجاه ثاني ..
وره ماراحت نسرين وزوجها ..رحت بغرفتي ..
احس كلبي يوجعني ومليان قهر
على نفسي وعلى علي
ياترى هسه شنو صار موقفه ...اكيد زعل
يجوز بعد ميتواصل ويايه ..
هو هم كرامته انمست واسلوب التعامل ويا كان مو حلو من اهلي
ظليت افكر ودموعي تنزل ...
وكمت جبت علبة الرسائل ...
وطلعت رسائله كلها ...وكمت اقره بيهن وحده وحده
صرت بغير دنيا ... كل اللي اتذكره انه ماسكتت ابد
بجي متواصل ..رسائلنه هي عمر من السعاده والمحبه
تذكرت كل الايام الحلوه
كعداتنه ..سوالفنه ..كل كلمه كلناهه البعض
وكل كلمه اقراهه بالرسائل احسها نار وتجويني
معقوله هذا الحب ينتهي بلحظه
ينتهي بسبب رغبة اهلي
باوعت الساعه بال3 بالليل
ضميت الرسائل ...وتمددت ونمت
اصعب ليله بحياتي كانت ... صعب الواحد يوصل مرحلة اليأس
بس بقى عندي الامل بالله
من داومت ...شافتني ست فائزه بهذا حالي وحجيتلهه ..
كالت اطمني وخلي عينج بعين الله وصدكيني اللي يختاره الله الج هو احسن شي
جنت تعبانه بذاك اليوم
بقيت كاعده بمرسم المدرسه ..محبيت اختلط باحد
قبل ماينتهي الدوام ... دااتمشى بممر المدرسه
صاحت عليه ست فائزه وهي مبتسمه
رحت عليها
كالت تليفون جاوبي
حسيت بذيج اللحظه مثل الغركان وباقي بأخر نفسه ونقذو
هو علي ديخابر طبعا ماكو غيره
ركضت عالتليفون
- الو
- ياسمينتي حبيبة عمري
رأسا كمت ابجي متحملت
- ليش تبجين عمري ...دموعج غاليه وماريدهه تنزل ابد
اسكتي ...اهدأي ...صدكي الموضوع ينحل اني ماعوفج ...واهلج حقهم ..الاختلاف واضح وجبير ...واني لو بمكانهم اتصرف نفس التصرف ..بس صدكيني بعدين يقتنعون
- ياريت حبيبي ..الله يسمع منك ..توقعت زعلت عليه ومتحاجيني
- لا عمري شلون اكدر بلياج وانت الهوه والضوه
اهم شي لاتنقهرين ... فتره واني اتصرف
- ان شاءالله عمري ..
انتهت المكالمه ...بس رجعلي الشعور بالامل والرضا وحسيت اكو فرج بالايام الجايه
اهم شي الحلم يتحقق
ومرت ايام ..وبداخلي الوان عذاب
اللي يصبرني علبة الرسائل
كلهن اقراهن او اقرا قسم منهن قبل مانام
هي كانت جرعة السعاده
وبيوم ..راجعه من الدوام
دخلت للبيت وسمعت امي تحجي بالتليفون
وتكولهم اي هلا بيكم تشرفونه شوكت متردون
وسدت التليفون
سلمت عليها
كلتلها منو ماما ذوله
هي كانت فرحانه وكالتلي
- هاي ام صديق خالد زوج نسرين تريد تجي يمنه
- وشتريد ؟
- يريدون يتعرفون علينا ويشوفوج
رأسا حسيت ضربتني وقتلتني وجاوبتهه بعصبيه
- يعني شنو يشوفوني ... مااقبل هالتصرف
- يشوفوج وتشوفين ابنهم ..ليش شبي التصرف ...كل الناس هيج يسوون
- ماما لاتتصرفون بكيفكم ... شنو زايده عدكم اني
- ليش بنتي ؟ شنو زايده ...قسمه زينه ولد صيدلاني وعائله طيبه و...
- اي وعنده فلوس ومن مستوانه ...هذا همكم
- هااااا.... افتهمت ياسمين ... وارجع اكولج ...تبقين بلا زواج ومتاخذين هذا الحثاله
- ابقى بلا زواج مستعده ابقى ..بس مااتزوج اللي تختاري انت ونسرين ..هاي حياتي ومستقبلي واني اقرر
- بنتي خلي عقلج براسج ..احنا نريد مصلحتج ..بيت علي ناس يختلفون عنه ... متكدرين تتكيفين وياهم ولاتطبعين بطبايعهم
- هذي حياتي ..اني اعيشها انتو معليكم
- ماشي ياسمين ..،اني راح اكول الابوج واخوانج على كلشي
وذاك الوكت تعرفين اللي راح يصير
اني انجنيت ... متوقعتهه تهددني ...وابويه واخواني اذا عرفو تصير مشكله جبيره ويعاندون اكثر
راسا كلتلهه
- ماما الله يخليج لاتتعاملين ويايه هيج
هي هدأت وجاوبتني
- اذا انت غلط ومصره عالغلط شلون نمشي وراج واحنا ندري مستقبلج اسود
اني فكرت ..،عرفت امي ماراح تقتنع وتسكت وهذا الاسلوب ميفيد اغير اسلوبي افضل
كلتلها
- اوك ماما سوو التردو
- اي عفيه بنتي اريدج عاقله ومتتهورين ...تره سوالف الافلام مموجوده بالحقيقه
عفتها ودخلت غرفتي ...وكعدت بجيت الى ان حسيت صايره دنيا مغرب
نايمه بملابسي وماادري
كعدت غيرت ملابسي ...ورحت شفت امي دتسوي عشا وكفت ساعدتهه
هي كالتلي
- بيت ام وسام يجون الجمعه
- ياوسام ؟
- صديق خالد
هي جانت فرحانه ... اهم شي همه يفرحون ويرتاحون
اني جاوبتهه ابرود وقهر
- اوك
تعشينه وكوه اكلت ... وغسلت المواعين ورجعت بغرفتي
مااعرف ليش حياتي انكلبت بس دموع
احس نفسي مااتحمل كلشي بعد
ضغط عليه ..فراك علي ..،والياس اللي بداخلي
وطريق اهلي ديمشوني بي غصبا عني
شلون راح تنحل
،،،،،،،
بيوم الجمعه .. جنت ضايجه والدنيا طالعه من عيني بس كان لازم امشي وراهم واجاريهم حتى مايشكون بيه
وظلت امي توصيني ..ونسرين كلساع تخابر تنطيني نصائح
واني اسايرهم واريد اشوف وين راح نوصل
والعصر جوي
اني ظليت كاعده بغرفتي
جتي نسرين كالت تعالي نقدم العصير والكيك
كمت وياهه ... شلت صينية العصير
ودخلت سلمت ...
وهمه ردو عليه
بس اني جنت كلش كالبه وجهي ومتعمده
بديت اقدم ..، وصار هو بوجهي
كدرت اشوف شكله ... مناقصه شي
وعائله امي وابويه يحلمون بيهم
بس اني .... بعيده عن القبول بعد السما عن الكاع
كعدنه وظلت امه تسالني وكوه اجاوبهه
وره شويه ترخصو حتى يروحون
وكالو راح نجيكم مره لخ حتى نتفق
اني عفتهم ورحت الغرفتي حتى ماسلمت
مخليتهم يحلمون
همه ضيعو حلم عمري واني هم اضيع حلمهم
دقايق ..وجوي امي ونسرين عليه فرحانات
راسا نسرين كالتلي
- هااا شفتي شلونه مو يخبل
كلتلها باكوه
- اي يخبل كلش
امي فرحت وكالتلي
- يعني عجبج .. رضيتي عليه
كلتلها
- لا ...معجبني ولا رضيت مبين مغرور ومكروه وامه اتعس بعد
راسا امي كالتلي
- بالعكس كلش حبابين ..واذا تردين يجي مره ثانيه وكعدي سولفي ويا وشوفي
- ماما..،الولد معجبني وماراضيه عليه ..اذا عجبكم الكم انتو تزوجو
راسا امي عصبت وكالتلي
- تدرين انت صايره ماعندج اخلاق ولا ادب ... والظاهر محد يكدر يعدلج غير بس ابوج واخوتج ...متمشين بكيفج
أنت تقرأ
رسائل الياسمين
Romanceهذه القصة من الواقع العراقي حدثت بالتسعينات كل زمن ووقت اله احداث وروايات تبقى بالذاكره نسردها لكم للعبره
