"حياه بلا حياه"🍁

33

الفصل 33
حلقات خاصة بعيد الحب

بعد لقاء شريف واسيل الاخير فى مكتبه تعمدت أسيل عدم الحضور لمحاضرات شريف لحين عودة الدكتور عماد من إجازته وعرض المشروع عليه وهتطلب ان مشروعها يكون هو المشرف عليه
وأثر هذا الوضع على شريف فأصبح عصبى يتعامل بحده فى المجموعة
تعجب موظفى المجموعة من تصرفات مديرهم فى الفترة الاخيرة
وفى الليل كان ممدداً على سريره عاقد ذراعيه خلف رأسه وينظر لسقف الغرفة لم يفارقه طيفها
كمن ألقت عليه تعويذة فأصبح أسير عينيها أصبحت شريكة أحلامه رفيقة أيامه
أسيل كفاية بقى انا لاعارف أنام ولا عارف اشتغل وبعدين
لا بقى أنا لازم أشوف حل  مش هقدر استحمل أكتر من كده هو مافيش غير حل واحد ومافيش عماد هو اللى هيقدر يساعدنى أنفذه

فتح موبايله ليتصل بعماد ،
كان عماد جالس مع تالا يتناولا عشاءً رومانسيا على ضوء الشموع حين رن هاتفه ليجد شريف هو المتصل
تالا : مين ياعماد اللى بيتصل دلوقتى
عماد : ده شريف أخوكى
تالا : غريبة بيتصل دلوقتى أكيد فى حاجة
عماد : استنى هرد عليه وفتح الخط
شريف : أيوة ياعماد كل ده علشان ترد
عماد : طيب قول مساء الخير الاول
شريف : ياسيدى مساء الخير بقولك إيه هى تالا جنبك
عماد : اكيد طبعا
شريف : طيب لو سمحت أنا محتاج أتكلم معاك ضرورى
إتحجج بأى حاجة
عماد : ألو ... شريف ... انا مش سامعك كويس ...لحظة هخرج برة التغطية هنا مش حلوة  والتفت لتالا: حبيبتى هخرج اكلم شريف استنينى مش هتأخر
تالا بقلق : ماله أبيه شريف فى حاجة
عماد ليطمئنها : لأ ياروحى إطمنى ده استفسار فى الشغل بس لحظة وراجعلك تانى
تالا : اوك
وخرج عماد ليتحدث مع شريف : أيوة ياشريف قلقتنى فى إيه
شريف:  محتاجك ياصاحبى فى خدمة
عماد: إتفضل طبعا انا تحت امرك لو فى إستطاعتى
شريف : ايوة فى إستطاعتك
انا محتاجك تنزل مصر يوم واحد وترجع تانى
عماد : أيوة لكن ازاى ده انا لسة عريس ياعم ماكملتش يومين يامفترى
شريف : إتحجج بأى حاجة المهم تكون بكرة فى مصر وياسيدى إبقى ارجع تانى بعد بكرة
عماد : أيوة ليه كل ده يعنى
شريف قص عليه ماحدث فى آخر لقاء بينه وبين أسيل
عماد : أيوة كل ده كويس أنا بقى أنزل ليه
شريف : ياعماد ركز أسيل معتمده على انك المشرف للمشروع ومش هتيجى الكلية وانا محتاجك فى الكلية هى هتعرف من تالا إنكم رجعتم مصر هتيجى الكلية تانى يوم علشان تقابلك وقتها انت هتفهمها ان مشروعها هيكون تحت إشرافى وسيب بقى الباقى عليا
عماد كان يستمع لشريف وهو يضحك فإستفز شريف ضحك عماد
شريف : إنت بتضحك على إيه دلوقتى هو انا بقولك نكتة
عماد : لا ياصاحبى لكن مكنتش متوقع إنك هتوقع فى الحب بسرعة كده
شريف : عماد انا مش عاوز تالا تعرف حاجة لانها واسيل أصحاب لكن حاول تعمل اللي قولتلك عليه
عماد : حاضر ياسيدى واهى فرصة اردلك فيها جمايلك عليا
شريف : عيب ياعماد الكلام ده إنت اخويا وتالا أختى ربنا يسعدكم أسيبك بقى علشان ماتتأخرش علي تالا
عماد : اوك تصبح علي خير
شريف:  وانت من أهل الخير
وعاد عماد مرة اخرى لتالا التى كان تتآكل من  الفضول والقلق
تالا : خير ياعماد كل ده ماله شريف
عماد : أبدا ياحبيبتى ده كان بيبلغنى انه لازم ننزل مصر بسرعة لانهم محتاجنى بكرة فى الكلية ضرورى 
تالا : ازاى ده مش انت اجازة اسبوعين
عماد: ايوة اجازة اسبوعين لكن مضطرين ننزل بكرة مصر وهنرجع تانى ماتقلقيش 
تالا وهى تنظر لعماد بشك : أوك
واكمل عماد وتالا تناول العشاء وذهبوا الى الشاليه الخاص بهما فلقد اهدى اكرم الصياد هذا الشاليه لإبنته هدية زواجها