لما تشوف صاحبك فارش سجادة ع الأكونت و مقضيها كلام ديني و هو أصلا خاربها .. ما تقولش : دا منافق .. ممكن يكون بيحاول يعمل حاجة حلوة يعوض بيها ذنوبه الكتير .. بدل ما يكتب حاجة تافهة ..
لما تكلم واحد و ما يردش عليك .. ممكن يكون مشغول أو مزاجه وحش فا مش عايز يتكلم أو نايم و شافها و نسي أو أي حاجة .. التمس له عذر و خد الحوار ببساطة .. عشان لما تعملها الناس تعذرك ..
لما تشوف حد بيعمل حاجة غلط .. حاول تنصحه بالراحة .. ادعيله ربنا يهديه و افتكر أنت كنت بتعمل إيه زمان قبل ما ربنا يهديك .. طبيعي أنك تكره المعصية اللي بيعملها .. بس حِب له الخير لله ..
لما تلاقي حد بيزعل من حاجة أنت ما بتزعلش منها .. ما تتريقش عليه و احترم الاختلافات الموجودة في طباع الناس .. احنا موجودين عشان نحترم اختلافات بعض مش نتريق عليها و نتخانق و ننفسِن ..
لما تلاقي حد متبهدل في الدنيا .. ما تكملش عليه أنت كمان .. يا تكون سند و تقول له كلمة حلوة .. يا تسيبه يكمل حياته و تمشي .. مش لازم تسيب بصمة سودة فِـ حياته زي غيرك و تحطمه أكتر ما هو ..
*عيش مُسلم بجد بين الناس .. عيش لله*
*هذا ديننا .. إنسانية .. رحمة للعالمين*
