ميمونة والكورونا😂

الجزء (1)

#ميمونة_والكورونا😂

الـجـزء الأول مـالـقـصـة😁

گـتـابـتـي #Koka_Saleh

::::::::::::::::::::::::::::::

نا معيشتي سودة ونودة من دون البنيات اللي من جيلي وزادت امعيشتي انسودت من يوم فرضو الحجر الصحي وخوتي الخمسة قعدو ايروحو بدري من اعمالهم وقعدولي في الحوش وداروني بنقلتهم
اليوم كله تنديه ودز وطلبات ماايفضنش وكل واحد في دار وايدز من عنده ياريت حتى التمو في تركينة وحدة😡

/
/

كنت مقيلة في داري واقطع والله قايلتي مع خوتي
وجي مش وجه راحة من يومي 🤦‍♀️
خشت علي امي وفتحت الباب اتقول خاشة مداهمة
حسيبي ربي اللي امعاي في الحلم انفجعو 😳

امي:ميمونة نوضي نوضي

نا نطيت وشفاشيفي علي وجي ونمسح في روايلي من فمي
نا:شن فيه من مات عمتي خيرية صح

امي:بعيد السو عليها نوضي خوك بيجوه جماعة نوضي بيش اتوتي عصريتهم

نا :ووووه مش حظر صحي ولا غير عالشغل ماتريحنا من اصحابهم بكل

امي:غير نوضي بلا دوة زايدة صبي فزي عليش قاعدة اتمدي في وجك

نا:مااقدرتيش اتجيبي 5 بنات وعيل واحد راه ريحتيني بدل ماانعاني في 5 مافيهم واحد يرفع كباية شاهي 😒

امي:اسمعي صبي بسرعة قبل مامحمود ايجيك راه ماانحزش عليك

نا صبيت:يارب حتى بنقلاديشي راضية غير راجل ايفكني من هالهم

أمي:امغير ايجي عاطيتك له من غير مهر

نا:ومن قالك نبي مهر نعطيه نا المهر امغير ايروح بس

امي ضحكت:وانتي منينلك يالجربة 😂

نا:يانا ياامعيشيتي من دون الصبايا وطلعت
ومشيت الهذك الكوجينة ونا انتمتم وانهزب علي اسعدي الراقد وبديت اندير في هذك البسبوسة عشان يسمسموها مع القهوة 🤦‍♀️

اها ياحناتي انسيت انعرفكن علي روحي
نا ميمونة عمري توا 30 سنة وقاعدة في هالحوش مع 5 خوت اكبر مني محمود وبعدها نا والباقي اصغر مني وعاد ماغباكن لما تقعدي اخت وحدة كل حاجة علي راسك 😞
امي ولية كبيرة ودوبها دوب حاجات بسيطة عاد وكل حاجة دافتها في راسي بقولة شن عندك مااديري
وهي اصدقت نا لا شغله لا مشغلة وقرايتي وامبطلة منها من العدادي طهقت بالكوجينة والحوسة نحسابها هي الدوة ونحساب روحي بنزوز لكن ماحد دق بابنا وطلبني 🤦‍♀️
مااندسش عليكن انتن كيف خياتي نا مش سمحة واجد ولا بالاصح كنت نحساب ياخذو البنت علي حرارتها فكنت ديما نعرض الصبايا اعمامي وعماتي وخالاتي اني حرة واندير في هالوكال اصناف اصناف وانلم وانحوس واجهدي كله انحطه لما اتصير عندهم مناسبة لكن العرب طلعت تبي الشكل والدلع والاهتمام ونا انثى في البطاقة بس حرام هالانوثة مانعلم بيها حاجة حدي طشة هذك الروج والكحل ونمشط اشعري ونلبس القفطان الازرق اللي من عرس حياة حني ماعاد حد يلبس في زيه 😅
والله حتى ذوق في اللبس ماعندي ومانعرقش في موضة بناويت هالوقت وهذا سبب تعنيزي باختصار غجرية في كل حاجة حتى بعد نمشوو العيادة ولا سوق امي تقعد تنصح في اتقولي امشي بشويش وماتحكيش بالك شيئ واحد ايحقك تعجبيه ونلقى شباب ايبحتو فيا لكن لازم نختمها بحركة غجرية اتخرب اللحظة وبدل مانعجبه يقعد يضحك علي 😒
وهذي نا بسلامتي ميمونة المريوحة هكي عيلتي ملقبيني 😂