قمري || My Moon

01

21:30
چنت متمدده ع القنفه بالصالة ، مطفيةة الاضويه وراسي مصدع كلش احاول اناام بأي طريقه ماريد اشوفه من يجي.
انفتحت الباب واشتغل الضوه ، رجف جسمي بس حاولت ابقى ثابته گد ماگدر ومسويه روحي نايمه .
عرفته هو من مشيته وعطره القوي حسيته قريب مني كل هذا واني گوه متحمله ومدري مبين عليه تأثيره هسه لولا.
انصدمت كلش واني احس بلحيته على خدي ، خييرر ياربي شماله هذا ادوره اني اقل لمسه تنتشر مثل الكهرباء بجسمي شلون وهو وجه ملامس لوجهي هيج.
بقدرة قادر ابتعد مني وسمعته يطفي الضوه ويطلع وسد الباب ، اخذت نفس وفتحت عيوني
يمةةةة شنووو هذا فلك اجيت اموووت الا شوي همزين سيطرت على نفسي ولهسه گلبي يرگع عبالك
خررب حظظه .
ظليت افكر طول الليل واني اتگلب عود شنو معنى حركتة هاايي مالها داعي كلشش
فوگاها ماحاجاني ولاحاول يگعدني ويگلي گومي نامي بالغرفه بدل هاي القنفه كسرت ظهري چا شگد شايل حقد لي بگلبه
خرب حظه چنه جبل مايتزحزح وبلا احساس فوگاها
لا والقسمه.

بجهة ثانيه بالبيت هو هم چان متمدد وصافن على السگف يحاول يهدأ من نفسه وگلبه اليدگ حيل
چان گاعد على اعصابه ولازم نفسه مايگوم ويشيلها غصب ويرجعها للغرفه.
شلون وياها هاي الخبله چنها زعطوطه اقل شي تضوج وتگعد تحط احتمالات بكيفها وتلوص الوضعيه ، هسه شلون انام وهي مو يمي صح مامتقربلها ابد بس احسني مرتاح بنومتي وهي قريبه مني .
وخرت مخدتي وحطيت مخدتها جوه راسي ودفنت وجهي بيها واني افكر شون چانت اكو دموع على خدها ماجفت بعد مدري حست بيه او لا همزين لزمت نفسي وماتهورت اكثر شحيگضي هاي الليله وشلون انام هسه.
باوعت لميز المرايه چان هوسه بالقراصات والامشاط والشسوار مال الشعر معناها مادخلت الغرفه ابد من العصر لما چانت تسرح بشعرها الكيرلي ، اكثر من مره گتلها لاتسريحه عوفيه على شكله بس چانت متقبل مدري منو گايللها لازم تستحي من الشعر المجعد متدري اني كل ليلة وهي نايمه العب بشعرها لحدما ما اغفى وهي بسابع نومه احسن اني ماريدها تعرف.

ثاني يوم

10:15
گعدت وگمت من القنفه بصعوبه تكسر جسمي بسببها
اكيد هو نايم مرتااح واني تاركني هنا
اوووفف شوف شعري شكله يفشل نص ونص هسه شيگول علييه اني اعرفه يحب الشعر الناعم ادوره الله بلاه بوحده مثل شعري .
چنت واگفةة يم الطباخ وحاطه القوري ع النار وافكر اكيد راح للدوام هسه مادري بيه لان ماتقربت للغرفه ابد ، چنت احاول الم بشعري المنفوش حتى حسيت بأيد لزمت ايديه ونزلتهن وواحد حضني ودفن وجهه بشعري ، گمزت كلش واجيت اعيط لحتى عرفته من عطره وگلبي وصلت دگاته الف دگة بالدقيقه حرفيا بس حاولت اسيطر على نفسي.

گعدت من نومتي واني راسي دايخ كلش مانمت الا شكم ساعه وحتى للدوام مارحت سمعت طگطگه بالمطبخ عرفتها گاعده گمتت وشفتها واگفه ومنطيه ظهرها للباب .
بوكتها مافكرت بأي شي من شفتها تحاول تلم بشعرها الي احبه ولج عوفيه لاتلمين هلجمال
اقتربت وحضنتها وحسيت بيها ارتجفت بس ماهتميت هي خربانه خربانه ودفنت وجهي بشعرها
ااييي هذا الاحبه كلش وحرمتني منه البارحة
وخرت راسي وخليته على چتفها وع نفس وضعيتي بقيت حاضنها حسيتها تريد توخر بس لزمتها اقوى
كيان : ابقي هيج شكم دقيقه اريد اعوض الحرمتيني منه البارحه
مادري شنو حجيت وشخربطت بالحجي بس بوكتها ماهتميت لشي وردت اعيش اللحظه عود بعدين افكر بمهرب .

حرفيا جنت مثل الصنم ومادري شسوي وهو هيج حاضني وفوگاها كلامه صدمني شبيه هذا مصخن شماله راح يخبلني بس بقيت ساكنه ظاهريا طبعا انما بداخلي اعضاء جسمي كلها تتراگع .
مرت دقايق وهو ماوخر عبالك نام اصلا بس فار الچاي ولگيتها حجه حتى اشرد
قمر: الچاي صارر وراح يحترگ
حچيت وحاولت صوتي يكون ثابت وواخيرا وخر بدون اي كلمة وطلع من المطبخ وخلاني مصدومه ع شوي اجيت اطيح بالگاع بس سيطرت ع روحي وطفيت الطباخ ورحت ع الكرسي اخذ نفس ولو عطره بقه لازگ بيه

يعني لازم تخرب اللحظه هسه وكته للچاي چان بودي ابقى ساعه ع هلوضعيه خرب بالحظ بكل برود تگلي الچاي لايحترگ متدري بيه اني محترگ اكثر، وخرت بدون اي كلمة وطلعت ومادري بروحي شسوي وشون اخليها تنسى الصار لان ماعرف شون راح افسرلها تصرفاتي واني بنفسي مافاهمها اصلا.

مر شوي وقت حضرت الريوگ وقررت اروح اشوفه يتريگ او لا وسويت نفسي ماصار شي بس بداخلي لهسه متأثره وماكدر اوخر تأثيرهلموقف عني وصراحة تمنيته يطول بس خفت انفضح ، دگيت الباب فتحتها وچان مبدل ملابسه ولابس بدله رسميه
خرررب حظي چان يطگ بالگاع شحلاته كعادته مدري شون صرنه لبعض رغم اني ماوصل ربع جماله المفروض هو اسمه قمر مو اني ، چنت اريد اسأله ع اذا يريد يتريگ بس صفنت بجماله ونسيت وهمزين انتبهت وتلاحگت لروحي چان يريد يربط الرباط ومامنتبه الي
قمر : تريد تتريگ لو لا ؟
انتبهلي واجه اقترب مني ياربي شبيه هذا حيخبلني
كيان : سويلي الرباط مالتي بلا زحمه .
هو يدري اني ماعرف اربطه شنو هلطلب الماله داعي احسه مضروب على مخه اليوم ، حاولت اربطه ولو اني چنت متوتره كلش واحس حراره تطلع من اذاناتي .
تاليها لزم ايديه ووخرهن وربطه للرباط مالته واني ماباوعت لوجهه ابد ماعرف شنو تعبيره حاليا ، ياخي من الاول اربطه انت شنو هلاحراجات هاي.

چان مزاجي رايق كلشش من شفتها اجت وسألتني معناها مو زعلانه كلش فحبيت العب عليها شوي ، طلبت منها تربط رباطي واستمتعت واني اباوعلها وهي تحاول تالي اني ربطته ، بحركة جريئة ممسويها قبل اقتربت وبستها من خدها
كيان : خلص تريگت ماله داعي بعد .
وطلعت وعفتها اخاف اتهور اكثرر وشردت من البيت .

حرفياً صارلي ربع ساعه بنفس البقعه واگفه وايدي على خدي مصدووووومةةة كلش
هذا شبيه اليييوم ابد مو عوايده اول واخر مره باسني بيوم العقد وجان غصب عنه اصلا هلشي بس كدام المعازيم ، شبيه اليوم وفوگاها كلامه مال واحد عاشق طايح ولا چنه واحد ممهتملي ابد اموت واعرف شبيه هذا .