قصة استشهاد الرائد_الركن
مــــزاحــم_مـحـجـوب_حـسـن الـجـبـوري
من قرية ازراريه-ناحية الزاب محافظه كركوك
الثلاثاء الساعه الثالثة فجرا.٢٠١٦.١.٢٦الموقع مدينة الرمادي.منطقة السجاريه. بلسان الشهيد....
صويلح. .......
صويلح
.نعم سيدي..
......اريد ان ارتاح قليلا واريدكم ان تكونوا جاهزين في الساعه الخامسه صباحا لكي نباشر بواجبنا الذي اعتقد سوف يكون اصعب واجب كلفنا به في معارك التحرير الاخيره ..
.لا عليك سيدي ولا يهمك احنه وياك وبعون الله وأهل البيت احنه منتصرين
....الله كريم
.سيدي سيدي رائد ركن مزاحم .استيقظ(اكعد)سيدي والله ما اريد اكعدك انت حيل تعبان لكن انت صدرت لي أمر وهم الوقت حتى ما يروح
.....كعدت كعدت .هاي هيه محنه و تعدي بعون الله
.سيدي الولد كلهم صاعدين والحركات ينادون عليك بالجهاز
.....سهله سهله.دقائق بس اصلي فجر ونباشر
..........(حاليا الساعه الثامنه صباحا في أرض المعركه أثناء التقدم)..
....صويلح كيف تسمعني اجب
. سيدي اسمع عالي و واضح ارسل
.....صويلح جيب الريوك هسه فورا و لا تتاخر
. صحيح سيدي اني قريب عليك دقيقتين يمك
.....عفيه الذيب
.ما عليك زود يا بطل سيدي الغالي.
.كواك الله سيدي ان شاء الله الامور زينه خوش تقدم متقدمين؟
....ان شاء الله الامور زينه وموقفنه جيد لكن شوف صويلح اريد اكلمك بشغله واريد هسه تروح تجيبها وتجي؟
.امرني سيدي الغالي
....شوف صويلح اليوم الفجر ورا ما انت رحت اني توضئت وصليت ركعتين استخاره وطلبت من الله سبحانه وتعالى أن يوفقنه بهذه المعركه ونمت. فاللي صار ،رأيت بالرؤيا(الحلم)انه اني يوخذ من شاربي ٢٧شعره وكذلك رأيت رؤية حق ، فااعتقد انه إنتها كل شيء
.يمعود سيدي شنو السالفه توكل بالله احنه اخوتك ولا تخاف
.....لا صويلح اني مو خايف لا من الموت ولا من اللي يصير لكن احس انه علي بعض الامور لازم اصفيها و أوصي اخوي ابو زيد بيها
.سيدي بصراحه انت اقلقتني
.عالعموم اريد منك هسه ترجع للفوج واكو مفكرة بغرفتي بيها كل تفاصيل التزاماتي المدنيه اريد تروح تستنسخها واريد منك امانه تصل نسخها بيد اخوي نقيب لازم ...والنسخه الاخره تجيبها هنا
.ان شاء الله خير سيدي بس اني اشوف لو نتوقف عن التقدم ونخلي الافواج الأول والثاني والرابع يتقدمون ويانه لان الله وكيل لحد هاي الدقيقه محد متقدم خطوه هسه سمعت بالجوال (مقر العمليات)يكولون محد يقبل يتقدم لان مقاومة قويه والجنود معد يقبلون ينفذون الأوامر بسبب التعب والإرهاق والخوف و كثرة الشهداء والجرحى
....ما عليك صويلح احنه الفوج الثالث؟!! نتقدم و لا تخليني هسه انادي القائد اكول له سيدي اترك الواجب بس علينه
.يمعود سيدي احنه علينه محورنه يكفي هو اصعب محور
.....الله كريم..روح استنسخ وارجعلي بسرعه
.صار سيدي..
.......(الساعه ١١.٠٠صباحا)......
.هلا سيدي هلا سيدي الغالي
....هلا صويلح،شسويت؟
.سيدي استنسخت المفكره وخليتها بالجنطه مالتي واوعدك توصل بيد اخوك ن لازم ، بس سيدي اشو اني ما مرتاح انت تكول شفت رؤيا
و اني حيل خايف عليك .سيدي رحمه لوالديك لا تنزل من المدرعه
....ها صويلح مو تكول الكاتبه ربك يصير اشو منا تكول خايف ومنا تكول المكتوب ما من عنده مهروب
.وآلله سيدي انت ابن اجواد و ما نصخي بيك
الله كريم .الله خير حافظ
.سيدي هذا سائق الدبابة البرامز ما يقبل يتقدم يكول لو ابقى بمكاني لو ارجع؟
.....خل انزل احجي وياه شبيه هذا مو كاعد يشوفنه نمشي كدامه
. سيدي لا تنزل اني راح انزل عليه
.سيدي هذا قافل يكول ما اتقدم بعد ولا خطوه
.....راح انزل احجي وياه
.يمعود سيدي رحمه لوالديك لا تنزل
.....ما عليك صويلح شنو السالفه بس نحجي وياه نشجعه
.سيدي يمعود والله خطره!
..................الساعه(١١.٢٠)صباحا.........
.سيدي؟سيدي؟سيدي؟؟؟؟؟
....صويلح.ولاني القناص والله ،صويلح،صويلح،بس لا تعوفوني بهذا المكان اريد توصلني على اخوي ن لازم والمفكره هم لا تنساها
. سيدي الغالي ما بيك شي جرح بسيط والله ما اعوفك اني اخوك صويلح
.....صويلح صويلح..لا اله الا الله محمد رسول الله
.سيدي سيدي سيدي رائد ركن مزاحم؟؟يمعود يا ابو الغيره يا الغالي ..
سيدي قائد الفرقه كيف تسمعني اجب ..اسمعك عالي و واضح ارسل ..سيدي معاك عريف صويلح من فوج الثالث لواء ٣١ ..ارسل صويلح..سيدي رائد ركن مزاحم(ريحانه،ريحانه)...اقطع الاتصال صويلح اقطع الاتصال..فقار فقار كيف تسمعني اجب .فقار فقار كيف تسمعني اجب....سيدي شبيك اني كاعد أناديك من جهاز فقار اني حمايته..فقار ((ريحانه)) ..
هنا جاء وقت الصمت اللاسلكي ..عميد ركن مجيد الفتاوي قائد الفرقه الثامنه ،توقفت لديه عقارب الساعة لبضع ثوان واحس ان هذه الحياة والاقدار لا تستثني أحد ولا تعرف صغير ولا شاب ولا تعرف رجل تخرج من كليه الاركان برتبة رائد ركن لديه طموح يصبح قائد كبير في الجيش،رجل لديه طموح بأن يحرر بيته الذي احتله داعش وطرد امه وإخوته منه، لديه طموح بأن يأخذ بثار اخيه الشهيد فهد .وثار إخوته الشهداء من الأقرباء وأهل القريه الذين بلغ عددهم أكثر من ٦٤شهيد
وثار شهداء الوطن الغالي...لكن القدر كان حاضرا ولم يدع مجالا لطموحات تلك العائله الفقيره ان تكتمل .فقد أوقفت تلك الحادثه كل جميل في الحياة الا الأمل بأن يكون الشهيد السعيد ابو اسيا من اهل الجنه ويكون من الشفعاء... وان يجمع الله به احبائه في ذلك المكان ب لقاء لن يفترقوا بعده ابدا....الرحمه والخلود لك اخي الغالي رائد ركن مزاحم..والرحمه والخلود إلى الشهيد عريف صويلح الذي استشهد بعد تلك الحادثه بأيام قليله ولكن بعد أن أوصل لي الامانه والذي كلامه لا يزال يتقطع في أذني وهو يعزيني ويقول ((سيدي وعلي ما اكدر احجي وياك لان صوتك يشبه صوت الشهيد ر ر مزاحم))اللهم ارحم شهداء العراق جميعا...ولا حول ولا قوة الا باالله.
