((رحيل روح)) //الجزء الثالث والاخير
...
اكو حجايات مُره ترجعك اسنين
تاكـل گلبك الجلمـه الـ تزعَـل
تـره لجمات گلبك مو هوينات
بس اتسوي روحك عود تحمل
من يحجون عنك هنه مو بيك
بس هوه الحجي الموبيك يكتل
مثل راحة جفوفي راحة البال
ياهو الدله گلبي اعله التعلعل
سبع مرات ابوس شفايف المـوس
ولاابوس الصور واشتاگلي الخل
يـ ابنادم تره عويفتك اترووح
من تشتاگلك لـ ابنادم اتسل!!
ويلاگـوونك او جنهم ما يشووفون
وانت الطيفهم نص عين تعزل
***
مر كم شهر واني بهاي الزنزانة
تذكرت كل اللي صار وياي واني گاعد على جدريه الدولمه ذكرتني بكل اللي صار بحياتي التعيسه بلحضات
ماعدي شي اعيش لأجله
خسرت كلشي بحياتي
حتى اذا اطلع من السجن وين اروح والمن اعيش
ماعدي حل غير اكمل مده السجن اللي نحكمت بيهن ظلم وبهتان
امي ظلت تمر عليه بمنامي وبخيالي ماتت بحسرتها وطيفها مافارگني
ماعدي غير الله اشكيله اللي صار بيه واللي غدر بيه واخذ مني كلشي
حسبي الله ونعم الوكيل عليهم كلهم
لا أني اللي حضيت بالبنيه اللي حبيتها ولا حتى اللي اختارتها امي
لادكان ولاحلال ولامال
احسب الساعات والايام تمر عليه ثگيله اثگل من الجبل
دائمًا جنت مسالم بالسجن مالي شغل بأحد واتجنب الكل لحد ما الله يفرجها وتخلص المده خلصتها بين السجاده والسبحه والقرآن
خلصت المده وطلعت وجنت كارهه الدنيا كلها ومالي نفس لأي شي
رجعت لبيت ابوي وقررت ابيعه واطي خواتي حصههن واشتري بيت صغير بمكان بعيد مالي نفس للمنطقه الجيران كلها تتهامس خواتي ماتت الضحكه بوجههن وتغيرت معانيهن من القهر راحت الضحكه وي روحت أمنه وسبت الناس اللي كلت حگنه
رجعت اشتغل بالسوگ كلشي اشتغلت لميت نفسي من جديد واسمع الناس تتهامس على ابو حنان يگولون اخذ مؤخر حنان واشتره سياره كية حديثه وظل يشتغل بيها وتعدلت اموره
وحنان محد اخذها بعد ماطلگتها
سمعت من خواتي ابن خالتها طردها وتزوج وحده غيرها وصار عنده اطفال وعائله وظلت وي امها مكسوره جناح كلها الناس تحجي عليها ومحد يدگ بابها
ماريد ادعي عليها ولااحقد عليها ولا اگول حوبتي كل اللي اريده انسى اللي سوته بيه هيه وابوها
مرت السنين ورجعت كونت نفسي من جديد وعايش حياتي وحدي أحاول انسه اللي صار ومضى صار السقوط بال٢٠٠٣ وقدمت على تعيين بوضيفه نقبلت والحمدلله تحسنت حالتي وبالصدفه سمعت بالسوگ ان ابو حنان تعرض لحادث ومات كم راكب بسيارته والتمت الزلم وگوموا عليه العشاير وفصلوا
باع بيته وسيارته وكل حلاله ومات بجلطه من الهبطه على وسخ الدنيا ومال الحرام ومرته طاحت من بعده وتمرضت وحنان تبرت منها الگرايب وظلت تتداري أمها المريضه
ماعرف افرح لو اشكر الله واحمده اللي اخذلي حقي منهم كلهم بعد مادارت الدوائر عليهم وانتقملي منهم رب العالمين
عشت حياتي صايم مصلي وبالجامع والدوام ومالي شغل بأحد
فد يوم بليل ندگت الباب
فتحتها جان اشوف مرية مبهذله تبجي
دنگت وماعرفتها
تفضلي اختي شرايده
ماردت بس تبجي دخلت اجيب فلوس اطيها لان توقعت مجديه
دخلت وراي وظلت تتوسل بيه
سرمد ماعرفتني !!
انتي منو؟؟
شلون تعرفين اسمي؟؟
سرمد اني حنان
حنان !! منو حنان !!
بعد كل ها لسنين متوقعت حنان ترجع تتوسل وتتعذر وتعرف قيمتي وقدري وشلون شكلها صاير ومتغير ماعرفتها
سرمد شفت حوبتك شسوت بينه حرگتنه بنار وشرار
ابوي مات بجلطه بعد ماخسر كلشي وامي تمرضت وظلت عليله واني محد تقدملي وراك وضيعت شبابي حتى ابن خالتي تزوج وعافني
سامحني سرمد بروح ابوك بروح اميمتك خليني خدامه عدك
رجعني على ذمتك ماعدي غيرك
اني صافن ومصدوم معقوله اللي اشوفه واسمعه !! اني بحلم؟؟
تريد تبوس رجلي وتتوسل بيه؟؟
جريتها من دشداشتها وطلعتها بره
انتي تعرفين شسويتي؟
انتي صرتي سبب هجمان بيتي
انتي خدعتيني وغدرتي بيه وبسببج سنتين اني بالسجن ظلم وامي ماتت من القهر
خسرت كلشي حتى ابوج يرضى ويشبع
بشنو قصرت وياج بعد كل اللي سويتي صبرت عليج وحاولت وياج واطيتج أكثر من فرصة ليش هيج سويتي بيه شنو ذنبي اني؟؟
سرمد ابوس ايدك سامحني ابوي جان السبب باعني الك طمع بالمهر يبني مشاريعه وابن خالتي خدعني گلي تتطلگي واخذج
تدري من طلگتني ورحت اله شنو جاوبني؟
گلي هم ضربج هم جوعج هم اذاج
كتله لا گلي وبعد ما سجنتي انتي وابوج وموتوا أمه تردين اخذج؟
شكد حسيت بنفسي صغيرة وتافهه شكد تندمت بس مابيدي شي دورت عليك سنين ماندليت مكانك الا اليوم
سرمد دخيلك ردني لذمتك واعوضك على كل اللي راح
مستحيل ..
من سابع المستحيلات اردج
وامي اللي تجيني بالمنام شگللها؟؟
وفشلتي وصغرتي گدام الناس
والسنتين اللي گضيتهن ظلم بالسجن حتى ابوج الجشع يشبع
وحلالي ومالي اللي راح بسببكم
تردين ارجع انتي اصلا كرهتيني بكل مرة الله يخلقها بكل جنس انثى على وجه الأرض روحي حسبى الله ونعم الوكيل بيكم دفعتها وطلعتها
رادت ترجع تدخل دفعتها واني صاير اعصاب ومتتدمر امشي يلا طلعي وطبگت الباب حييل وگلبي مكسور وروحي هواي تتألم
ليش يربي ليش اني هيج يصير وياي
ربي لااسالك رد القضاء ولكن أسألك اللطف فيه
كعدت بالكاع حيل مابيه ذكرتني بقهر السنين اللي عجزت انساهه
مرت أيام ...
بفضل الله رجعت لحياتي بشكل طبيعي وره كم يوم واسمع الناس كلها تسولف بوحده طاحت من الجسر بالشط بذيج الليله نفسها والشرطه طلعوها لكوا اسمها حنان مكتوب بالجنسيه لافتها بملابسها ودازين على ابن خالتها مستلم الجثه وامها المريضه ماتحملت الصدمه وماتت الظاهر من طردتها اني بليل وبعد ما طلعت من يمي انتحرت
هذا حال اللي يظلم والدنيا دواره والله يمهل ولايهمل
حنان راحت وريحتني وخلصتني من همها خسرت الدنيا والآخرة
رب العالمين وفقني وحجيت بيت الله و عاهدت نفسي بعدها مااعرف شي اسمه زواج ولاارتبط بأي مخلوقه لان روحي رحلت إلى غير رجعه وعايش بجسد خالي من الروح
... النهايه
القصه حقيقة منقوله على لسان صاحبها مع طلب منه بتغيير الأسماء والأماكن وإخفاء بعض الأحداث للتمويه
الحوار والأحداث من تأليف
الكاتبه #ملكه_العاشقة ✍️
