المـــســتــذئـــبـــة و مـــصــاص الدمــاء🧛‍♂️🐺|🇲🇦

🩸قــــاتــــل أُغْــــرِمَ بــــضــــحــــيــــتــــه🩸|1

فوسط من الحرب العظمى لي وقعات بين المستذئبين و مصاصي الدماء كانت تتجري بكل قوتها هازة فيديها طفلة صغيرة مخبياها فردائها الطويل تتحاول تبعدها على هاد الصداع كاملو..فنفس الوقت الحرب شاعلة بين هاد المخلوقين الأسطورين المعروفين بعداوتهوم الشديدة منذ القدم..جيوش المستذئبين و جيوش مصاصي الدماء فقتال و عراك بين الحياة و الموت..و البقاء للأقوى!..

كل واحد فيهوم باغي يفرض الهيمنة و السيطرة ديالو على لاخور فوسط هاد الحرب لي كان أساس شعلتها هو السلطة..الخسائر منتشرة فكل مكان و النار شاعلة فكل المناطق..الخراب عايم فالأرجاء..جثث كل من الجنسين مليوحين فالأرض و المرأة و الطفلة لي بين يديها غاديين وسط من دوك الأجواء حتى نجاو بأعجوبة مبعدين على تما بأكبر قدر ممكن...

بـــــعــد 10 ســـــنــــــوات...

فواحد الكوخ فوق شجرة كبيرة فأعماق غابة بعيدة شوية على المدينة كانت واحد البنت مراهقة جميلة ذات شعر و عينين فاللون البني الغامق و بشرتها قمحية..هازة واحد الفأس تتقطع بيه الخشب لي قطعاتها تتلوحها حتى جمعات كومة من الخشب دارتو فواحد الوعاء حديدي كبير و بكل خفة هزاتو بحالا هازة ريشة..لاحتو حدا الشجرة لي فوقها الكوخ بالضبط و طلعات مع الدريجات الخشبين حتى دخلات للكوخ تتسوس يديها حتى وقفات قدام واحد المرأة كانت فالمطبخ واقفة تتحرك فواحد الوعاء ديال الحساء...

المرأة ضارت مبتسمة: ساليتي؟

البنت: اه ساليت واش مزال ماطاب؟

المرأة: دابا نحطو سيري جلسي

البنت جلسات فالطاولة حطات راسها فوقها تتشوف فالشرجم الجو كان غايم و الضبابة بدات تطيح رغم انه وقت الغداء هدا..بقات ساهية فالشرجم حتى سمعات صوت الزلافة الخشبية تحطات فوق الطبلة و هي طلع راسها لقات المرأة حطات الحساء فالزلايف د الخشب و حطات المعالق حتاهوما من الخشب و الماء و جلسات...

المرأة: زيلدا مالك؟ شفتك غير ساهية؟

زيلدا: والو ا روبي تنشوف غير فالجو لي تقلب دغيا

روبي حطات يدها على يد زيلدا مبتسمة: كولي هو الأول ماكليتي من الصباح و نتي تتجهدي على راسك خصك الطاقة مادام متتاكليش اللحوم البشرية

زيلدا: أكيد غناكل نتي عارفة بلي تنفضل ناكل فالخضرة ولا نتهجم على شي بشري

روبي: نتي مختلفة بزاف ا زيلدا واخا انا وياك تفرض علينا نعيشو بحال الروگز بسبب الحرب

💡الروگز: هوما المستذئبين لي متينتاميو لحتاشي قطيع ولا تطردو من قطيعهم بسبب جريمة قتل أو خيانة..المهم حاجة لا تغتفر أبدا!.