صباح الخير بثالث يوم رمضان💚🌝
حبيت اكتب تاريخ اليوم مينسي ويروح من بالي وحتى مدونته بمفكراتي،،،
بمثل هيج تاريخ جان اكو دوام داومت بلكليه وحضرت محاضرات ثالث محاضرة دكتور اعتذر ومااخذنه فكعدنه نرتب بنيه هم طالبه بس يتيمه الام وسوينالهه حفله بسيطه لان منكدر نروح الهه بغير منطقه بعيدة ...هلصنه حفلتهه ساعه وكعدت ع ستول ويه لمياء ندردش وطبعا مادرس بس لمياء تدرس من نرجع 🌝☻
المهم ورة هاي الهوسه بربع ساعه ضحك واغاني وكعدنه ندردش ضجنه من الكعدة ف طلعنه نفتر وصارت مشيتنه من كدام رئاسه القسم
اكو بنات يعرفون علاقتي ب لمياء ورواء كلش زينه محس غير وحدة وكفتنه هاي شايفتهه بس معرف اسمهه كالت
دعاء: منو بيكم لمياء
لمياء: اني نعم
دعاء: اي شي يمج يخص رواء بقي لان بعد متاخذة
تفاجئنه بكلامهه ودموعهه نزلت
سئلتهه: ليش هيه مو صحتها تحسنت ننتظرها
دعاء دنكت: شتحسنت راحت عد الارحم من الكل ..رواء ماتت صار ١٢ ساعه
لمياء ريسن وكعت ودموعي اني وياهه تصب كمت اضحك ودموعي تصب
جذذذب والله لج امها قبل كم يوم طمنتنه تكول تحسنت شتحجيييييين ...
كمت ادفع بيهه طلعت رئيسه القسم وكم دكتور عرفو سالفه كامو يهدون بينه اني ولمياء واحنه ماكو قفلنه بجي وصياح عفنه كلشي جنطه موبايل نزلنه بطرك هدومنه كمنه نفتر بلحديقه مكان رواء الاكثر شي تحبه كعدنه وكل وحدة ظلت تبجي ساعتين سمعنه خلالههم كلشي بس بالنه مو يمهملتكول هاي تبجي على حبيبها وهاي ممجاوبه لو راسبه جانت هالفترا استلام نتائج الكورس ..
اني تخربطت ودوني للطبابه بلكوة وكفت عل حيلي جماعت الخط همه جابولي كتبي وغراضي وطلعنه اني من رمادي ولمياء من الفلوجه ورواء الله يرحمها من بغداد بس عايشه بيت عمها بالرمادي ...
يومين اني ولمياء غبنه منداوم اعتزلنه ثالث يوم داومت بس محضرت ولا محاضرة وكعدت لمياء حجتلي شصاير
رواء مصابه بمرض فتحه بالقلب وراحت لدول في سبيل تتعالج بس ملكو علاج ..لمصر مستشفى مجدي يعقوب وللاردن وحضرو نفسهم يروحون لايطاليا بس رواء رفضت ورة ما تاكدو ماكو علاج ومرحلتها حرجه كلش ..طلبت ترجع للعراق طبعا دهلت القسم التحبه انكلش بس مكملت الموت خطفهه وهيهمواليد ٩٩ ...هاي احنه صديقاتهه تدمرت نفسيتنه ولليوم بعدهي عايشه ويانه زين امها شتسوي ؟؟
ام رواء عدها ٣ بنات وولد...
رواء وروان ورند...وانس ..رواء وروان نفس المرض ماتت روان ومندري لان رواء جانت مجازة وميردون على اي اتصال جهازهه مغلق ...ورة ٣ اشهر بهيج يوم اجانه خبر الكارثه احس حتى دنيا زعلت صار بيومها مطر على عواصف بليل واني خنكه بصدري بغيابهه امها لحد الان اتواصل وياهه بس ادعولهه بالصبر فقدت بنيتين بنفس السنه مو شويه ...
راجيه منكم الدعاء الها بالمغفرة والصبر ل اهلها ..
هاي رسوماتها جانت محترفه كلش الله يرحمها😔
