#ساكن_الزيتونة
#الحلقة_1
سيارة تويوتا (( فجعة )) وقفت قدام حوش محمود الصبح الساعة 7
نزل محمود من السيارة بسرعة يضحك ..وجماعته ايعيطوا وراءه : بسرعة ياحودة ..تي هيا ياراجل سقدنا
محمود التفت عليهم وفنص : سكتوا يا🤬 ينعنجدكم بكل ..راه يطلع عليكم الشايب منفصل مش شوري
فيصل صاحبه مقمعز فوق حديدة السيارة : حودة جيب امعاك طنجرة كبيرة ..وزيدنا طاسات راهم اشويا اللي وخدينهم
محمود : إن شالله ..بعدك أمي أخر زردة قبل لازتني من الحوش على خاطر الطنجرة اللي راحت مني 😂
سالم صاحبه لاخر مقمعز في السيارة من قدام وفاتح الباب ومنزل رجليه : تي غير قوللها قالك سالم شوري المرة هذي ..حتى كان راحت انجيبلها طنجرة جديدة
محمود : باهي خلاص بطلوا اعياط مازال صبح الزح
ونط محمود من سور حوشهم ..ومشى فتح الباب الوسطي بالمفتاح وخش للحوش اللي كان هادي ومافيش صوت . لان هله مازالوا مرقدين
خش لداره خذا فراش وبطانية ومخدة ...لفهم في بعض ..وخذا سروال توتة وتيشرت ..ومشى طلع للكوجينة ..يفتح في الدولايب بالشويا خايف من أمه تسمعه 😁
مريم ناضت على صوت في المطبخ صبت : بسم الله .
مشت وخشت للمطبخ لاقت محمود غاطس في الدولاب ايطلع في طنجرة : بسم الله الرحمن الرحيم ..هذا شنو على الصبح
محمود طلع رأسه خبط في المرمرة : اااااه ينعليا 😵
مريم : تستاهل لانك تسرق ..ترا وريني شن خذيت 🤨
محمود يده على رأسه : وووووه ماخذيت شي الزح ..فجعتيني وحق ربي يأم
مريم : امممم ..شن تبي داك خشمك في الدولاب
محمود : ماهو نبي طنجرة ..الجماعة جابوا كل شي وقالولي شورك هذي
مريم : اسمع يافرخ مواعيني مش لاقيتهم في الشارع ..وأنتا كل زردة اتروح بلاهم
محمود : زمري ..مرة وحدة راه وأنتي ماتنسي بكل
مريم ولعت الغاز وحطت براد الشاهي : لا مش مرة وحدة ..تذكر الصونية اللي راحت منك في ...
محمود برم وجه وقص عليها : خلاص خلاص ..معش نبي شي ..تبي تذكرني بزردة لها 70 سنة 😒
وجاء يبي يطلع من الكوجينة ..بس مريم ناداته : تعال تعال ..اسمع ..حودة
محمود وقف : نعم
مريم : خلاص توا نعطيك ..فكني من قلبت وجهك على الصبح
محمود ابتسم : باهي بسرعة الجماعة يستنوا فيا من بدري
مريم : افطن للشاهي لعند انجيبلك طنجرة من المخزن
أنت تقرأ
ساكن الزيتونة
Horrorقصة رعب 😈 مجموعة شباب طلعوا زردة مع بعض ومشوا لمكان مخيف ...شن حيصير امعاهم حنعرفوا مع بعضنا ...للكاتبة أم ناصر
