دقت الساعه السادسه صباحاً وهو ميعاد الاستيقاظ في هذا البيت الهادئ ، فتحت فريده عينيها بكسل قائلة:
⊙اووف انا بكره المنبه دا اوي.
اخذت حماما سريعا وارتدت ملابسها وحجابها وأدت صلاة الضحى وخرجت من غرفتها علي صوت يأتي من المطبخ فدخلت لتجد والدتها تعد لها بعض الطعام السريع كالعاده.
⊙فريده بمرح: يا صباح الهنا علي ست الكل القمر ، وطبعت لها قبلة الصباح
⊙هدي بابتسامه : صباح النور يا حبيبتي انا عملتلك السندوتشات اهي نفسي تفطري في البيت وبعدين تنزلي زي الناس العاقلة
⊙فريده : يعني الناس الي بتاخد سندوتشات وتنزل تفطر في الشغل مش عاقلين يا ماما ؟ وبعدين انا عندي عيال يتامى في الشغل عايشين على سندوتشاتك منى ودينا لو روحت يوم فاضية ممكن ياكلوني اصلا
⊙هدي:خلاص خلاص امسكي السندوتشات أهي وابقي سلميلي عليهم، ثم أردفت:بس ايه القمر دا النهارده
⊙فريده بغرور : انا طول عمري قمر اصلا بس انتو اللي مش بتقدرو الجمال
⊙هدي بضحك: طب يلا يا لمضه عشان متتاخريش
خرجت فريده ووالدتها خلفها وجدت والدها يشرب الشاي ويستمع إلى أغاني أم كلثوم في الراديو كعادته في الصباح
اقبلت عليه فريدة تدندن "بعييييييد عنك حياااااااااااتي عذااااااااب" ثم قبلت يده وقالت بابتسامه صافيه : صباح الخير يا بابا
⊙ادهم بابتسامه مماثلة : صباح الهنا يا حبيبتي
⊙فريده بخبث: يجعل صباحك هنا يا والدي
⊙وكزتها هدي: بت انتي خبيثة كدا ليه
⊙ادهم بضحك: قولي علطول بلاش الحركات دي ها
⊙فريده: أصل يعني.... هو.... ااااا...
⊙أدهم : هاااااااا
⊙فريدة بسرعة : عايزه بعد ما أخلص شغل اروح الجيم ، ورفعت يديها على عينيها بطريقة مضحكة كالأطفال
⊙أدهم : ........
عندما لم تجد رد فعل لما قالته ازاحت يديها عن عينيها ببطئ خشية من حدوث اي تهور حتى وجدت تعابير وجه أبيها ساكنه
⊙فريدة بجدية وترجي : عشان خاطري يا بابا حضرتك منعتني لما تعبت ودا حقك بس انا حالياً كويسة الحمد لله وعايزه أكمل وحضرتك عودتني اعمل الي انا بحبه والي شايفاه صح وانا كابتن مش متدربة وكمان شريكة فيه وليا نسبة من الارباح مينفعش ابطل اروح كدا مرة واحده واوعدك مش هاجي على نفسي ووقت ما أحس بتبعت هرجع البيت علطووول
أنهت حديثها بشكل جعل والدها يبتسم
⊙أدهم بهدوء : فريدة انتي شغل المستشفى بالنسبالك مرهق وانتي طرية اصلا وانا شايف انك مش حمل شغل وجيم كمان وانا منعتك من خوفي عليكي لكن براحتك اعملي الي يريحك وانا هبقا مبسوط وانتي مبسوطه وتخلي بالك من نفسك أكتر من كدا اتفقنا ؟
⊙فريده بابتسامة واسعة: اتفقنا
استدارت لتلتقط الحقيبة..
⊙هدى باندفاع :جايلك عريس ..
⊙فريده : خضتيني يا ماما حد يخض حد كدا ؟
⊙هدى : ما هو انا مليش كلمة انا كمان ولا ايه؟ هتفضلي ترفضي عرسان لإمتى ان شاء الله وابوكي مطاوعك انا عايزه افرح بيكي بقا وابل الشربات
⊙فريدة: حاضر يا ماما وانا راجعه هجيبلك إزازة شربات قااااااد كداااااا تبلي الي انتي عاوزاه كله
⊙هدى بعصبية:بت انت هتجننيني شوف بقولها ايه تقولي ايه ما تتلكلم يا أدهم
⊙فريدة بلطف : ماما مش انتي عايزاني مبسوطة؟ انا لما الاقي الشخص الي احس نفسي مبسوطه معاه هتجوز وافرحك
⊙هدى : ودا امتا بقا ان شاء الله في المشمش ؟
⊙أدهم : لإمتى يا فريدة ؟
⊙فريدة بشك : اااه انا حاسه ان في نونه في الموضوع قولتولي بقا مين العريس؟
⊙ادهم: دكتور سعيد
⊙فريده بنفاذ صبر : تااااانييي!!! انت سألت عنه يا بابا ؟
⊙ادهم : لا مسألتش لسه بس جالي المحل تاني واتكلم معايا ولسه عايزك وراجل محترم وابن ناس ومستواه المادي كويس وبيشتغل معاكي في نفس المكان
⊙فريده بضحك: محترم!! يا بابا انت لو سألت عليه هتندم انا بطلت تنمر على الناس بقا وقولت هتوب توبة نصوحة بترجعوني تاني ليييه ، ثم أردفت بجدية ، أولاً دكتور سعيد انا عمري ما هفكر فيه كزوج مهما عمل وعمري ما هوافق عليه ودا لأنه بني آدم مش كويس زي ما حضرتك بتقول وكفاية سمعته ف المستشفى وطبعاً مش محتاجه افسر اكتر من كدا وانا مستحيل اوافق بيه وكفاية بقا مبحبش اتكلم على حد انا توبت
⊙هدى بقلة حيله: اااه يااااني عايزه افرح بقا
⊙أدهم: خلاص يا هدى ، ربنا يوفقك يا بنتي ويرزقك ب ابن الحلال الي يستاهلك
⊙فريده بمرح: ايوا ادعو بس مش هتخلصو مني بردو
قاطعهم رنين هاتف فريده والمتصل مني صديقتها ردت فريده
⊙مني:يا صباح التفاح مش ناويه تنزلي ولا ايه
⊙فريده بضحك:باشا صباح الفل اي دخلة سواقين التكاتك دي نازله حالا كان عندي مناقشه عائليه هخلصها وانزلك فوريره
⊙مني بضحك:طيب بسرعه بقا عشان عندي مواعيد
⊙فريدة وهي تغلق الهاتف:ماشي يا مهمه اقفلي نازله
اغلقت الهاتف ونظرت لوالديها اللذان يضحكان بشده علي طريقه حديثها مع صديقتها
⊙فريده:طب يا جماعه اجيلكو في وقت تاني تكونو بطلتو ضحك باي باي
⊙ادهم وهدي:مع السلامة
''''منى صديقة فريدة المقربة تسكن قريباً من منزلها وتذهبان معا إلى العمل''''
نزلت فريده من المنزل وجدت مني بانتظارها فاتجهت اليها واحتضنتها
⊙وكزتها فريده:يعني لازم طريقة عبده موته دي قدام ابويا وامي ع الصبح كدا يقولو علينا اي ها
⊙مني بضحك:يا شيخه دا طنط دودو وعمو أدهم حبايبي ومش حد غريب
⊙فريده:طب يلا اركبي ياختي اتاخرنا
ركبت الفتيات سيارة فريدة الصغيرة وانطلقو سريعاً الي المستشفي واتجها الي الغرفة الخاصه لارتداء ملابس العمل
⊙فريده:اومال دينا فين ؟
⊙مني:تلاقيها لسه مجتش عادتها ولا هتشتريها يعني ، بقولك صحيح كان في برنامج حلو اوي امبارح بتاع فاشون كانو جايبين ياسمين صبري وهي عامله نفسها فاشونيستا وبتتكلم عن فساتينها الي بخشروميت مليون جنيه
⊙فريده: وااااااو جورجينا العرب !! علي قناة اي؟
⊙مني: مش فاكرة CBC باين
في هذه الاثناء دخلت دينا وهي تبكي
⊙فريده بضحكه كبيرة:اهي قناة الجزيرة وصلت مالك يا بومه علي الصبح
⊙دينا وهي تمسح اثار الدموع:كعب الجزمة الجديدة اتكسر وانا طالعة على السلم
⊙فريده: يا ستي بسيطه يتصلح بطلي تبقي عيوطه بقا ورانا شغل البسي واحنا هنسبقك عشان نلحق نمضي
ذهبت الفتيات كل منهم الي عملها ، ذهبت فريده وجلست علي مكتبها واثناء انهماكها في العمل سمعت صوت رجولي رفعت رأسها ..
⊙عم عبدالناصر بنظرات حنونه: فريده صباح الخير يا بنتي دي القهوة بتاعتك
⊙فريده:صباح النور تسلم ايدك يا عم عبدو انت احسن واحد في القسم داا وهأكلك مرتين في فرحي
⊙عم عبد الناصر بضحكة كبير: مرتين بحالهم لا دا كتير والله ، المهم عندي ليكي خبر هيبسطك يا ستي
⊙فريده بانتباه:خبر ايه خير ان شاء الله؟
⊙عم عبد الناصر:في مؤتمر في نقابه التمريض في القاهره هيحضره اعضاء نقابات التمريض الفرعيه كلها علي مستوي الجمهوريه وكل محافظة هتبعت الي متوظفين جديد وكويسين في الشغل عشان يكتسبو خبره اكتر ويحضرو المؤتمر دا ودكتور عبدالرحمن مدير المستشفي بنفسه رشحكو انتي ومس مني ومس دينا ومس هناء ومس سميه عشان تحضروه اي رأيك بقا
⊙فريده بفرحه وهي تقفز من مقعدها:بجد يا عم عبدو انا مش مصدقه بجد
⊙عم عبد الناصر: لا صدقي يا بنتي انتي تستاهلي كل خير ودلوقتي روحي ل دكتور عبد الرحمن مكتبه عشان عايزك
⊙فريده:ماشي يا عم عبدو يا بركه روح وانا هحصلك
بعد مرور عدة دقائق طرقت فريده عدة طرقات علي باب مكتب مدير المستشفي حتي جائها رد السماح بالدخول ، دخلت فريده باحترام لتجد رجل يبدو عليه الوقار والاحترام والحده وهو دكتور عبد الرحمن مدير عام المستشفي.
⊙تنحنحت فريده قائله:صباح الخير يا دكتور
⊙دكتور عبد الرحمن بهدوء:صباح النور يا فريده تعالي اقعدي
اقتربت فريده وجلست علي الكرسي المقابل لمكتبه
⊙دكتور عبد الرحمن: طبعا انتي عارفه انا عاوزك ليه وعارفه اني بعتبرك زي بنتي بالظبط وياريت بنتي كفائه في مجالها زيك كدا
⊙فريده:دا شرف ليا يا دكتور وربنا يخلي بنت حضرتك
⊙دكتور عبد الرحمن بعمليه:طيب بصي بقا اولا المؤتمر دا مش اي حد يحضره عشان كدا اخترتك تبقي قائد مجموعتك لانك مش اي حد تمام؟ وانك احسن من الي شغالين هنا من سنين ثانيا المؤتمر هيستمر لمدة اسبوع والسكن بتاعكو المستشفي هتتكلف بيه وانشاء الله ترفعو راسنا ثالثا بقا ودا الاهم ان اخر يوم ف المؤتمر هيبقا في زي كويز صغير كدا لكل الحاضرين واللي هينجح فيه هيسافر المؤتمر العالمي لنقابات التمريض علي مستوي العالم في دبي دا غير ان هيبقا متاح ليكو فرصة النقل لأي مستشفى في القاهرة وكمان متاح فرصة للعمل في دبي بس طبعاً بعد الامتحانات الي بيعملوها لان مش حد بيسافر وانتو ومزاجكو بقا اي رايك في المفاجأه دي؟
⊙فريده ببلاهه وفمها يكاد يلامس قدميها من أثر الصدمه:هااااااااااهه؟
⊙دكتور عبد الرحمن وهو يلوح في الهواء:فريده انتي معايا؟
⊙تنحنحت فريده قائلة: احم احم اا..ااصل يا دكتور مش قادرة استوعب كل دا بجد
⊙دكتور عبد الرحمن بحزن:ولو اني يعز عليا تسيبو المستشفي بس انتو تستاهلو كل خير ربنا يوفقكو ودا ورق الموافقه امضيه انتي وزمايلك وابعتيهولي عشان ابعته النقابه
⊙فريده:تمام يا دكتور هو المؤتمر امتا ؟
⊙دكتور عبد الرحمن: يوم الاحد ١٣ يوليو هتسافرو السبت انشاء الله
⊙فريده وهي تأخذ الورق: ان شاء الله حضرتك تأمرني ب حاجه؟
⊙دكتور عبد الرحمن:الامر لله يا بنتي عايزك ترفعي راسي وراس اهلك وبالتوفيق
⊙فريده بحماس: ان شاء الله يا دكتور عن اذن حضرتك
⊙دكتور عبد الرحمن:اتفضلي
خرجت فريده وهي متحمسه جداا لتخبر أصدقائها
يبدو أن أحدهم اقترب من تحقيق مراده !😂♥
-------------------------------------------------------
يتبع...
YOU ARE READING
لقاء يوليو
Romanceيحدد الله مصيرنا ونحن مازلنا أرحاما ، يقدر لنا الرزق والمأوى والمكان والزمان ، متى سنأتي إلى الحياة وكيف ومتى نفارقها، كل شيء بمشيئته يسير ولا يختار لنا إلا الخير.. وقصتي ليست الا نسيج خيالي به لعبة من ألعاب القدر التي تفاجئنا دائماً..
