Ka nupui neih atanga chawlhkar thumna, Tahrik ni sawm leh pahnih, Zirtawpni zing lam Dar ruk, minute sawmhnih leh panga a a pelh mek lai chuan kei chu kan in chhuah lam pawn bathlar a thing thutthleng hlui tawh tak ah chuan Chanchinbu chhiar in ka thu veng veng tawh a. Ka nupui neih aia ka tlangval chhung ala rei zawk rih miau avangin ka lo la sim theilo anih loh pawh in ka thisen in zing thawh hma hi a thanhnan ani ta hial ve ang. Mak tak mai a kum tam tak chhung ka tui miahlohna lam a ka lo tui zia chu ka chanchinbu chhiar lai mek atang pawh hian a hriat theih ta hial mai zawng anih hi.
Ni e, Chester Burnley nen a kan chendun lai kha chuan sualna lam pang ringawt kan ngaihtuah ani ber a, chanchinbu han chhiar ila, sualna hrang hrang, heng ruk ruk leh tualthah lam chi hi kan bih hmasa ber anih kha. Chumi avang chuan tunah pawh hian tha lam nilovin sual lam leh pawikhawih lampang hawizawnga thu ziak ka zawng mek chu anih hi.
" Darling" tiin ka nupui hmeltha tha tak mai chuan kawngka a rawn dah pah hian no zet mai hian min rawn ko va.
" Aw, Duhtak, ilo tho ve tawh ani maw" tiin kan lo nuih sak a. Ka bula rawn thut ve pah chuan, " nizan chu ka muttui khawp mai, tukin zing i thawhlai pawh ka hre lo, tunah khan i thianpa Chester-nen biakhlatna hmangin kan inber zo chiah a."
" eng lampang nge? Tunlai chu kan inbe khat riau mai?" kan tih chuan, ka nupui duhtak chuan,
" Ni e, a buai ani maithei ani, a hman chuan tukin zing hian lo leng phei rawh se ati anih chu." tiin min chhang a.
Ham bui bui chung hian, "tunah hian maw? A va han tho hma em em ve le, hna anei anih dawn chu" ka ti a. Chutah ka nupui chuan ka bianga rwn fawh zauh pah hian,
" Zing thawh lamah hi chuan a chhun lo khawp mai che anih hi maw, Aw tunah lo kal nghal rawh se ati ania, hna pawimwh chinfel tur anei aniang," a ti a, inchhung lamah alut zui leh ta daih a.
Zing lam dar sarih leh minute sawm arik lai mek chuan Chester Burnley nena kan luahdun thin, B4542 Brookdene Avenue a pindan tereuhte ah chuan ka thu vang tawh a. A zing chhuak alo la haw loh avangin Tirhchhiah naupangte Richard-a chauh chu alo awm a. Mahse rei pawh ka thu hmanlo, muangchanga coffee no khat ka in zawh hnu deuh lawk chuan hah hmel tak hian arawn lut a, tawi fahran a min han nuih suk pah chuan ka lam panin alo phei tlang a, ka malchung a zinglam chhuak chanchinbu rawn thehthlak pah hian,
" Thianpa Caldwell, i lo kal thei chu ka lawm kher mai, tukin lamah chanchinbu i chhiar tawh em, kha tah khan a thu tlangpui chu an ziak a, lo chhiar phawt la, a bak chu kal pah in ka hrilh mai dawn che nia, kan inthlak phawt ange," tiin a pindan lam ah chuan a phei zui leh ta nghal daih a.
Chu a chanchinbu min pek chu Observer- ani a. A phek hma lam a inziak ngei chu chhiar tura min duh ngei anih kan ring nghal tawp a. A thupui ah chuan lian fahran in,
" NORTHWOOD AH TUALTHAHNA RAPTHLAK.. Tih hi alo inziak a, ka phu deuh zawk lehnghal.
Heti hian alo inziak a, "Nimin tlailam dar thum bawr vel khan Northwood ah tualthahna rapthlak tak mai a thleng a, a tualthattu ni ngei a ngaih pawh Watford Police ten an man tawh. Kan thudawnna in asawi dan in tuna an tihhlum tak Miss.Nancy Copper- hian a lu ah hliamna tak a tuar a, chu chu a thih chhan ber niin alang, he thil ti tu Mr. James Palmer pawh Watfort Police ten an man tawh bawk. Vanduaina tawk Miss.Nancy Copper leh thilsual titu Mr.James Palmer te hi Northwood a cheng ve ve an ni bawk." tiin.
Chutia ka chhiar zawh rual chuan ring fahranlo hian, " An va han ziak tawi thin tak em." tiin kan phun zui sup a.
" Tlailam Chanchinbu ah chuan thuchiang zawk chu anla chhuah ve leh maithei asin, bakah an mahni hian puanzar vak an duhlo ani awm e," tiin thianpa Chester- chuan nui vur vur chung hian minlo chhang a.
Ka chanchinbu lam ringawt ka lo bih avang chuan ka thianpa chu engtik laiin nge ka bulah chuan alo din tih ka lo hre miah lo a. Ani lah chu alo inthlak fel diam tawh a, kawrfual dum lian tak mai hi ha in, alo in kilh tha mawlh mawlh a.
" i hman der tawh maw, zing kar ah Northwood lam ilo va thleng phei tawh ani maw," tiin kan zawt a.
Ani chuan Cigar tan pah hian, " La thleng pheilo deuh, Thianpa Caldwell, tukin zing lama ka chhuah chhan chu ni tho mahse, Watford Police Department lamah Ray Turner- ka va hmu lawk e ka tia. Ani hnen atang hian alawm chanchin pawh ka hriat," tiin min han chhang zui a.
