وطبعًا من مُنطَلَق إن المواعين لو باتت في الحوض لتاني يوم بتتكاثر لا إراديًّا فأنا قررت أغسلها قبل ما أنام !
وطبعًا برضه ده حماس مؤقت راح لحاله بمجرد ما شفت سريري الحبيب وعليه اللحاف الفايبر بتاعي !
~ندا.
_أوبس.... حاضر يا ماما جاية أهه.
~اخلصي يا ندا جدك زمانه جاي.
_حد بيروح لحد وقت النوم يا ماما، وكمان لسة هنحضر غدا.
~نداااااااا !
_يا ماما أنتي كل مرة بييجي جدي بتحسسيني إنها أول مرة ييجي عندنا وتروقي الشقة وتطلعي البط والحمام وتعملي وليمة، ليه كل مرة بتحسسيني إنها المرة الوحيدة اللي بيقضي فيها أسبوع معانا؟ بجد الموضوع مثير للاهتمام جدا يعني.
~بطلي لماضة يا بت أنتي ويلا روحي اغسلي المواعين عشان المطبخ يبقى رايق وأنا بغرف.
_يا ماما أنا كنت خلاص هنام.
~هتنامي من الساعة ٨ يا بنت بطني، مش عليا أنا.
_يووووه، آه يا ماما هنام من الساعة ٨، الجو ساقعة وأنا عايزة أدفى باللحاف وأنام.
~بت، بلاش غَلَبة، روحي يلا فضي الحوض.
_على شرط.
~بتتشرطي عليا يا بنت حسن، أهو ده اللي ناقص.
_قفوشة أنتي أوي يا ماما، أنا قصدي طلب بس التعبير هو اللي خانني شوية.
~اطلبي يا آخرة صبري.
_تيجي تقعدي معايا في المطبخ وتشرحيلي سر حبك الرهيب ده لجدو اللي هوا حماكي.
~طب تعالي يا ندا نروح المطبخ وهحكيلك وأنا بقطع السلطة.
_هييييييييييه، يلا.
رحنا المطبخ وقعدت ماما تقطع السلطة وأنا واقفة عالحوض بغسل المواعين.
_ها... احكيلي بقى يا ست ماما.
~هحكيلك يا ست ندا، زمان وأنا عندي ٢٢ سنة اتقدملي أبوكي الله يرحمه، يوم كتب كتابنا الصبح جدك جه عندنا من غير أبوكي وطلبني، لما قعدت معاه قالي كلمتين لسة ف بالي للنهاردة، قالي بصي يا بنتي، أنا ربنا رزقتي بدل الواد اتنين، بس أنا طول عمري نفسي في بنت، ويشهد ربنا إني حبيتك لله في لله وعشان كدا اعتبرتك بنتي، الله يرحمه أبوكي رباكي وكبرك وخلاكي ست البنات، أنا مش هاخد مكانه بس عايزك تعتبريني زيه، اوعديني يوم ما حسن يزعلك تشتكيلي أنا، ساعتها قلتله حاضر يا بابا، وبرغم إن الكلمة دي عمري ما عرفت أقولها غير لأبويا الله يرحمه إلا إنها طلعت لجدك تلقائي، من غير حتى ما أجهزلها، أول خناقة بيني وبين حسن كنت أنا اللي بدأت الغلط وهوا غلط بعد مني، جدك حكم عليه يبوس راسي قبل أي حاجة ويعتذر عشان خلى عينيا تدمع، وبعد كدا قالي اعتذري لجوزك عشان انتي اللي بدأتي الغلط، عارفة يا ندا، أبوكي الله يرحمه دايما يقولي بحسك بنت أبويا أكتر مني، جدك ده أب عظيم يا ندا وعشان كدا هوا فوق راسي العمر كله حتى بعد ما حسن مات، فهمتي يا ندا؟
_فهمت يا ماما.
#يادوب_حكاية.
#الاسكريبت_الأول.
#زينب_إسماعيل.
