الطبيعي إن أي بنت بتفرح باهتمام خطيبها، غير كده احنا كاتبين الكتاب، يعني مش مجرد اتنين مخطوبين!
كان أول يوم العيد ولقيته جايبلي فون جديد، هو عارف إن فوني مبهدلني ويادوب بتكلم معاه بالعافية.
_إيه ده يا أحمد، ده عشاني!
=عيد سعيد عليكي يا أحلى جنة، قلت بدل ما أديكي عيدية وتتكسفي ومتبقيش عارفة تشتري إيه أجيبلك ده، إيه رأيك فيه، عجبك؟
ابتسمت بفرحة وأنا بقوله:
_عجبني جدا، ربنا يديمك في حياتي نعمة.
وخدت الفون وركنته في الدولاب!
عدى فترة وفي مرة فوني رن وأمنية أختي جابتهولي، كنسلت وصمتت الفون.
=جنة.
_أيوة يا أحمد.
= أنتي مش بتستعملي الفون اللي جبتهولك ليه؟
_... ي.. يعني قلت أخليه لما نتجوز، حاجة جديدة في مرحلة جديدة.
= جنة أنتي محتاجة الفون، ليه مبتستعمليهوش ومن غير كدب.
اتوترت _ما... ما أنا قلتلك.....
رفع حاجبه = من غير كدب.
_خايفة.
=خايفة! من إيه!
_خايفة يحصل أي حاجة والموضوع ميكملش، خايفة تندم إنك اختارتني، تالت واحدة في صحابي خطوبتها تتفشكل، كانت بتوريني هدايا بيجيبهالها وهي فرحانة أوي ودلوقتي قلبها مكسور، أنا مش حمل كسرة قلب يا أحمد.
=بس أنا مش هسيبك يا جنة.
_متعرفش ربنا كاتبلنا إيه، ممكن متلاقينيش اللي كنت بتتمناها أو العكس وملاقيش أنا فيك الشخص اللي حلمت بيه، من فضلك حاول تتفهم حالتي، أحمد أنا خايفة أفرح، فهمتني؟
=لا مفهمتش يا جنة، اللي فهمته إن اللي ربنا كاتبه هيكون واحنا عندنا حسن ظن بيه يبقى إيه بقى!
مسك إيدي =جنة احنا ربنا يسرلنا الموضوع بطريقة مكناش نتخيلها.
_ما ده اللي مخوفني، كل حاجة جت بسرعة، خايفة أكون اتسرعت، مش خايف تكتشف إنك اتسرعت؟
=بصي يا جنة، ربنا مش هيخلق جواكي إيمان بحاجة وجوايا إيمان بنفس الحاجة عشان بعد ما نتعلق نتفرق، فهمتي يا جنة.
_فهمت يا أحمد.
#يادوب_حكاية.
#الاسكريبت_الخامس.
#زينب_إسماعيل.
