تزوجت ولكن...!

10 الأخييير

ما اغربه من إحساس حين تلتقي بشخص بعدته عنك الظروف والمسافة وتلتقي به مجدداً بعد غياب يطول ولقاء يجمعنا بضروف اغرب ..

كنت اشعر بأنك لي ..
وان النصيب سيجمعني بك
كنت اشعر بأن حبي ليس سراب ..
وانك عشقي الوحيد ..
اجل فأنتي امرأتي انا .. وستكونين لي عن قريب .. #بقلمي_شمس

رائد .. محمد صديقي من ايام الشغل .. شريك وياه بمحل لان كنت اشتغل وادرس .. گلي اخت زوجته .. صغيره وزوجوهه غصب .. والعائله مو زينه ومن تزوجت اكتشفت البيت .. بيت مشبوه واريدك تساعدني لان البنيه خايفه وع ساعه تنتحر .. ومالهه احد بس الله واحنه ..

صدوگ قهرني .. يعني ماكو هيج اهل يبيعون بيتهم الهيج بيت .. اني طبعا اتخرجت وصرت ضابط .. ومااتوقعت اول مهمه الي راح تكون .. نهجم ع بيت مشبوه ..

وفعلا .. اجاني خبر من محمد لا البنيه گالتله بوقتهم .. وهجمنا ع البيت وصدوگ لگيناهم بوضع والعياذ بالله ..

نزلاناهم للسيارات وبقيت ادور ع اخت زوجته لمحمد .. تالي لگيت بابا مقفول فوگ .. دفعته ماكو بقيت ادفر بي الى ان انفتح .. دخلت الغرفه فارغه ..
عرفتها بالحمام گولتلها خويه اني صديق محمد لتخافين اطلعي .. فتحت الباب البنيه .. واني 😲
معقوله هاي حبيبتي مهاوي .. وشلون صايره هزيله وتعبانه مو ذيج الانسانه الي حبيتها والي كولها طاقه . هي شافتني انذهلت بس مبين عليها التعب متحملت .. وگعت شلتها وابجي .. الله لينطي الي بعدني عنج ووصلج الهاي الحاله .
خليتها بالسياره واتصلت بمحمد يلحگني للمستشفى..
وعفتهم وطلعت للمركز انكمل تحقيق ..
واول ماوصلت .. لزمت زوجهه الناقص .. وشبعته كتل .. لان اخذها بالاول مني ولان دمر حياتهه ولان راد يجبرها ع شي هي متريده .
كسرته تكسر ماخليت قطعه صاحيه بي بالگوه جروه مني الشرطه ..

رجعت الامي وسولفتلها حاله مها واهلها شسوو بيه . انكسر گلبها عليها ..
وگالت.. يمه البنيه الي تحافظ ع نفسها وشرفها بوسط هيج بيت مشبوه .. فهي تاج ع الراس واهلها الله يحاسبهم ..
بس انت لاتفوتها من ايدك ومايهمك الحجي .. واني اعتبرها حالها حال بناتي ..

رائد .. فعلا اني ناوي هيج اسوي ضيعتها مره من ايدي ومستحيل اضيعها مره لخ ..

اتصلت ع محمد وگلتله اني اريد احجي وياك .. وخبرته بكل الي صار وشلون بالبدايه كنت حاط عيني عليها وتزوجت ..
وهسا من شفتها تمسكت بيها اكثر وخاصه بعد الي سوته .. مها هي الي انام ع مخدتي واني مطمأن ع مالي وشرفي وياهه ..
محمد . مدام هيج خويه خليني احجي وي البنيه وارجعلك خبر ..
وفعلا رحت المها .. وگولتلها ع رائد ..
مها .. يعني رائد هذا فعلا ..
محمد .. اي ليش تعرفيه ..
مها .. بلي هذا رائد كنت اشوفه معجب بيه ونضراته عليه من كنت اروح للمدرسه بس ولايوم اتجرأ وحجى وياي ..
ومن شفته بالغرفه بيوم الي نقذني عبالي حلم لان ماحسيت ع روحي ووگعت ..
محمد .. يعني هسا شأكوله .. يجي هو وامه لو لا ..
مها .. محمد .. اني حالتي تعبانه وفكرت الزواج خايفه منها وخاصه مصارلي هوايه من تطلگت ولازم فتره يله خلي نفسيتي ترتاح والله كريم ..
مها .. عشت ببيت اهل محمد براحه حتى امه رغم ماكانت قاسيه ع صابرين وتسمعها كلام بس كانت زينه وياي ومتعاطفه ..
اما قائد فعندي عتب وياه كبير ..
مر شهر ورائد كل يوم يتصل ع محمد .. اخر شي وافقت يجون ..
اجه هو وامه واسلام اخته . وطلب نگعد وحدنا .. بقت عيونه تحجي .. دمعت عيوني من شفته .. وگتله ليش
رائد .. اترجاج لاتنضريلي هاي النظره تدمريني ..
مها .. لو حاجي كلمه وحده كان مصار الي صار .
رائد .. سامحيني مااتوقعت هيج راح يصير .. وبيوم الي تزوجتي تدمرت اني اكثر ..
بس وعد ومسح دموعي مااخلي دمعه تنزل منج .. واريدج ترجعين عافيتج وترجع مهاوي المربربه ..
مها .. ههههههه
رائد .. فديت هالضحكه .. اووووف واخيرا. راح تصيرين حلالي.. وهذا الكلب علاء كسرته الج تكسر
مها . عفيه لتجيب اسمه مااريد اعرف شي عنه .. اريد انسى كل الي صار وياي .. وانت هم رائد انطيني فتره استعيد نفسي بيها ..
رائد .. ولو مراح اتحمل بس هاهي اهم شي راحتج ..

خلصت العده مالتي .. واستعاديت نفسي .. واجه محمد خطبني وماعزمت احد من اهلي وهو هم يعرف وضعي وعقدنا .. صار محمد هو ولي امري لان احسن من اخويه وابويه الي باعوني ..
وام رائد .. انسانه طيبه وتحبني .. ابد محسسوني بشي وبلي عشته . نسوني كولشي ورائد يحبني ويموت عليه ويخاف عليه من الهوى وقبل اكمل دراستي وي اسلام اخته هم نجحت للسادس .. الله عوضني بعد تعبي وصبري وكل يوم اسجد لله .. ونصرني..

( ضاقت .. ولما استحكمت حلقاتها ..فرجت .. وكنت اظنها لاتفرج ) .. الحمد لله ..

هاي نهايه قصتي الي مااتمنى الاي بنيه تعيش الي عشته .. ولو كان ايماني بالله قوي انه حينصرني. . والدليل من بين الناس كولها .. خلى رائد بطريقي حتى ينقذني ويجمعني بي .. الصدفه الي عمري ماتوقعت تصير بس مو بعيده ع ربي العالمين ..

واتمنى لكل الاهالي انه من تنخطب بنتهم يسئلون زين ع الولد واهله ومايغرهم المهر والفلوس لان هي مو بضاعه وياهو الي يدفع اكثر .. اتمنى يفكرون بسعاده اولادهم قبل الماده والامور التافهه ..
اتمنى استمتعتوا بالقصه       ( #النهايه )
-