فكر أنو لازم أجيب ليها هديه مميزه 💙 قام علي طول بعدما اتذكر حاجه...
شال تلفونو فتح Facebook
وقلب فيهو مسااافه كأنو بفتش علي شي وظهرت أبتسامه علي وشو لمن لقاهو...
الصباح بدوي مريم صحت أنس اللي خلاص نزل سنه ثامن "كر علي ياولدي هتشوف شعاع" ودانا برضو نزلت مستوي اول ❤️ اما غزل كان اليوم اول يوم ليها في الجامعه اتسوكت سريع سريع شربت الشاي ولبست ليها قميص ابيض مسطر بي اسود فيهو نقش بتاع ورده كبيره من جهه الصدر النوع البتربط من قدام داك ومعاهو أسكيرت اسود وجزمه سوداء طقم الشنطه وطرحه مسترضي عملت ميكب خفيف وكان أقل مايقال عنها جميله 💜 ورت أمها أنو غياث حيمشي معاها عشان أول يوم وما عايزه تتبرلم 😹 ودعت امها وعلي بيت ناس خالتو سعديه علي طول لقتهم بشربو في الشاي صبحت عليهم وغياث أول ما شافها ظهرت نظرات إعجاب في عيونو، كان لابس تيشرت زيتي مع بنطلون جينز اسود شرب الشاي بسرعه واتلفت علي غزل قال ليها يلا.. اول ما طلعو قال ليها طالعه حلوه، عاينت ليهو بي شقاوه وقالت ليهو انا اصلا حلوه شوف شي جديد 🐸💔 ضحك وهو بقول ليها يلا اسرعي عشان ما نتأخر، بعد مدافره وعولاق وصلو الجامعه منظرها براهو وهيبتها خلا غزل تتوتر مسكها من يدها وظغط عليها قال ليها ما تتوتري أصلا اول يوم بكون كدا.. قالت ليهو طيب أدخل معاي 😢 قال ليها ادخل معاك وين مافي طريقه عندي محاضرات كمان شويه مسكت في التيشرت بتاعو بي قوه وقالت ليهو بي صوت اقرب للبكاء غيث يخ اهون عليك يعني؟ قعد اضحك قال ليها محسساني داخله علي الحرب العالميه الثانيه 😹 خلاص طيب يلا دخل معاها بعد ما قعد قريب عشره دقايق احنس في الحارس في النهايه خلاهو يدخل قال ليها طيب اول شي نمشي البورد نشوف الجدول، قالت ليهو طيب يلا مشو وغياث صور ليها الجدول في تلفونو كان لسه الزمن بدري شويه والناس يدووب بدو يزيدو حبه حبه ساقها ومشي بيها شارع المين وقعدو ليهم في وحده من الجلسات مسك شنطتو وطلع منها شي مغلف بطريقه حلوه ومعاهو برطمان فيهو قصاصات ومداهم لي غزل قال ليها افتحيها فتحتها لقتو دفتر بس مازي باقي الدفاتر "دي الحاجه الكان بفتش فيها غياث امس لمن فتح فيسبوك" كان دفتر بي ورق اسود عاينت ليهو بي نظرات كلها حب قال ليها افتحيهو طيب ما تعايني لي كدا 😹 فتحتو وقربت تنطط من الفرح لمن شافت شخصياتها الكرتونيه المفضله وجمب اي شخصيه في أقتباس مكتوب بخط حلو باللون الابيض واخر ورقه في الدفتر فيها ظرف واضح انو جواهو مسج.. ابتسمت ابتسامع رقيقه وقالت ليهو شكراا You made my day اقسسسسم 😔💛💛💛💛 قال ليها اصلا يومك دا لوما عملتو انا الهيعملو منو مثلا 😉 ضربتو في كتفو ضربه خفيفه اتأوه بي استهبال وقال ليها المسج الفي اخر ورقه عايزك تقريها بعد اسافر أوكي؟ قالت ليهو طيب شويه كدا عاين للساعه وعايز يطلع بس رجع وقال ليها غزل ياحبيبي خليك عارفه مجتمع الجامعه ما زي حق المدرسه حتلقي اختلاف كبير حاولي اتأقلمي بسرعه وخلي بالك من نفسك عشاني.. قالت ليهو حاضر وداها القاعه وودعها وطلع عشان احصل محاضراتو زولتنا قاعده منكمشه علي نفسها في البينش الأول وشويه شويه القاعه بدت تتملي لحدي اخر حاجه جات بت قعدت جمبها وبدو يتعرفو ،البت أسمها نِعم طيوبه وكيووت كدا شويه كدا والمحاضره بدت سمعو صوت بهمس بس ورا بسسسبسسس نعممم بسسسس "عرفتوها الحركه دي صح؟ 😹" نعم أتلفتت وراها وظهرت عليها معالم الدهشه وهي بتقول هبه! بي صوت خاافت واشرت ليها نظام بعد المحاضره وكدا... بعد المحاضره خلصت طوالي هبه جات عليهم سلمت علي نعم سلام معرفه كدا نعم قبلت علي غزل قالت ليها دي هبه قرينا الثانوي سوا "اششششي يا غزل انا عشان اتعرف علي بت واحده قاعده اسبوعين 🐸" بقي روتين وطبيعي الثلاثي مع بعض لحدما مره زي اسبوع وهم في المكتبه منتظرين الشيتات تطلع وهناك اتعرفو علي ريم وأيه و مصطفي واحمد بقو السته طبيعي مع بعض مخيطين الجامعه دي ماخالين محل 😹 ريم كانت اقرب وحده لي غزل حتي حكت ليها بي موضوع غيااث و.. و...
غزل بالها كلو بقي في الجامعه وحتي هو وغياث بقو مابتلاقو كتير اي زول مشغول بي جامعتو وغزل خلاص حاتبدت: المدتيرم.. مصطفى : أها يخوانا الأمتحانات الكبست دي حنكا شنو؟ أحمد: والله الايام جرت يخ بتيين كدا هو لمن دايرين امتحنونا 😒
غزل: طيب ياجماعه انا عندي حاجات مافاهماها
ريم : نحن المفروض نبدا نقرا بعد كدا صح 🐸💔 أيه: الحكايه جايطه شديد اسي نبدا من شنو ونخلي شنو؟ نعم قالت ليهم عاينو طيب أي يزول فينا حيشرح للباقيين ماده زابط وقسمو المواد بيناتهم واتوكلو مشو غزل ماكان عندها تلفون عشان ظروفهم كانت شايله حق امها فتره مؤقته لمن الظروف تتصلح.. المهم جماعتنا جازفوها وعدو المدتيرم ولسه ما اتنفسو الصعداء كويس لقو الفاينل بيقرب عليهم 😹" شفتو الفديو بتاع غامبول حق ادرسوو امتحان ادرسو امتحان اخر بس ياها بقت عليهم 😹"
