WHO BETTER FRIEND BE

Better friend

This world don dey cold well well, different different people all around.
Look eh, mind no go dey at ease if person hear strange sound.
Nobody want care for anybody as long as them no go gain.
Even so-called friends, sometimes dey betray and cause pain.
But inside all this things, person fit still see better friend?
Friend wey go dey for each other go reach the end?

For person to be better friend, E must dey understand say nobody complete.
And for person to dey one hundred percent perfect, them no fit.
If you make mistake or offend person, you go like make them forgive you.
Naso person wey offend you go like make you forgive am too.
Life dey simple pass to dey carry person for mind
Or else, na so so error and the bad side of people you go dey find.

If all of us learn to support our friends hustle and show appreciation,
And yes, we no dey look our friend like our competition
When we learn to help each other without thinking about wetin we go get,
Like rain wey fall, e no benefit but e dey make ground wet
When we learn say friendship no be only to smile with people inside picture.
The good wey we dey do from our hear, go really better our future.

Remember! Oyibo say, a friend in need is a friend indeed.
No be say na when problems come, e go run away with full speed.
Oh brother! Those kind friends no ready to dey by your side.
Infact, for your down times, na then them go hide.
Better friend go stick with you, in good times and in bad
E no go even think to leave you when you dey depressed and sad

Better friends, go dey happy for your progress and rejoice with you.
Them go happy say you dey move forward, their smile dey always genuine.
Them no dey hold back their better talk when you achieve something wey good.
Them no dey use the mask of frankly-speaking, to dey rude.
Dem no go fear to correct you when you take wrong step.
Dem go always dey there for you at all times, especially when you need help.

No be only for money matter, real friends dey show say dem kind
Dem go get original love, and no go dey carry you for mind.
Even for this world wey poeple dey selfish and greedy.
Better friends no dey ever get that kind character.
Dem go love with complete heart, unconditionally and freely.