Musmos pa lamang nang aking masilayan
Mundo'y tila librong aking kinukulayan
Iba't ibang kulay sa mata'y nagtitingkaran
Nakikita ko'y lubos na kaligayahan
Bughaw at dilaw kulay ng kalangitan
Panibagong araw ng kasiyahan
Berdeng punong may duyan
Nababalot ng halakhakan
Sa pagtanda'y aking nakilala
Kadiliman ng itim na tinta
Kulay ay hindi lang pala saya ang ipakikita
Pait ng buhay unti-unting ipininta
Maliwanag na buhay ng bata'y nabago
Nang utay-utay, sumukob ang abo
Ngiti'y napalitan ng busangot na nguso
Pintor 'di maipinta ang mula sa puso
Pinilit burahin kulay ng kalungkutan
Subalit, bakit ito'y pilit nasisilayan?
Sumilim lamang, pero di natakpan
Marahil, pintura'y kulang at dapat dagdagan
Hindi maipilit, dilim ay takpan
Kaya't itong pintor pinilit simulan
Panibagong obrang sisilayan
Tila simula ng kinabukasan
Kurba sa labi'y muling sumilay
Sa panibagong obra ng kanyang mga kamay
Muling nasilayan matingkad na kulay
Ito na nga tunay na kulay ng buhay
