Dahil uso ngayon ang pelikulang kabit at maging sa isang blog site ay ganito ang paboritong tema, narito ang isang kuwento ng isang kabit.
Sa isang sulok ng Tondo…
“Sige na, Edong, pagbigyan mo na ako, init na init na ako. Kailangan kita ngayon para tanggalin ang init ng katawan ko. Kahit ngayon lang Edong, kahit ngayon lang”
Ang nakikiusap ay si Marta, isang matandang pokpok sa lugar nila. Ang pinakikiusapan ay si Edong, isang electrician, medyo may edad na, matikas at malakas pa rin ang dating sa mga kababaihan pati na sa mga bakla.
“Ano ka ba, Marta? Nandito ang asawa ko! Ayoko na! Ayoko nang mabaranggay ulit dahil diyan!”
Ang totoo niyan wala ang asawa niya, nasa trabaho ito bilang factory worker at ang anak lang niya kasama niya ngayon.
“Sige na Edong ngayon lang to, bakit si Lucia madali mong napagbigyan. Sige na, Edong, pagbigyan mo na ko”
“Pero iba naman si Lucia, pero sige, pagbibigyan kita. Sana huli na’ to, dahil ayoko ng mag-away uli kami ng asawa ko at mabaranggay ulit,” ang sabi ni Edong na nagbibihis na ng pang-itaas na damit.
Sa isang madalim na lugar….
“Sige, Edong, diyan, diyan, tama yan! Tama yan!”
“Wag kang maingay, Marta, at mahuhuli tayo.”
“Oo, sige, Edong, tatahimik na ako.”
Pero sadyang hindi mapigilan ni Marta ang bibig niya.
“Oh! Ayan na, Edong! Ayan na! Malapit na! Malapit na, Edong! Malapit na….. ayan na…. ayan na….”
“Putang…. Marta, huwag ka sabing maingay, mahuhuli tayo nito eh.”
“Edong, malapit na….. ayan na, kaunti pa…. kaunti pa, Edong.. kaunti pa…. ayan na….. ayan naaaaaaaaaaaaaaa…….
May ilaw na ako, yehey! Salamat, Edong, mawawala na rin ang init ko sa katawan dahil may kuryente na ko sa bahay at makakapag-electric fan na ko” naghuhumiyaw na sabi ni Marta na tuwang-tuwa.
“Huli na ‘to, Marta, at ayoko nang mahuli ulit dahil sa pagkabit ko ng kuryente sa poste. Huling pagjajumper ko na to.”
Pero huli na! Dahil sa malakas na bunganga ni Marta muling nahuli ng mga tanod si Edong. Ngayon, baka hindi na lang sa barangay siya makulong, malamang tuluyan na siya ikukulong sa rehas na bakal.
