🔥روايات نوزا الاماني🔥
#صديق_أبي
¤الحلقة1¤
قبل سنة*
لمار: قاعده في داري ونسمع في اصوات صراخ وعراك امي وبوي كالعاده بس اليوم صوتهم عالي بزياده عن قبل ونا قلبي واجعني بقووة عمري ماشفتهمش فرحانين ولا يضحكو مع بعض عمري ماحكيتش لاصحباتي بحاجه حلوة عن امي و بوي كيف ماهما يحكولي ويمدحولي في ابهاتهم لعندما زاد لعراك انا مقدرتش نتحمل طلعت نشوف شن اللي صاير اول ماطلعت من داري سمعت
علي: انتي طالق طالق طالق وتحرمي عليا
لمار: ردت فعلي كانت بارده وكأني فرحت بدل مانزعل حسيت ان هدا الحل الصح انهم يطلقو وكل واحد يشوف حياته مافكرتش في نفسي او في مصيري بعد مايطلقو بس اهم شي عندي معادش نسمع صراخهم وعراكهم💔
هناء:حسبي الله فيك ياعلي حسبي الله فيك...خشت لدارها ونزلت شنطتها وتحط في ملابسها فيها
لمار:بعد ماشفت منظر ماما وهي توتي في شنطتها وجعني قلبي ودموعي ماسكتهن في عيوني...ماما بتمشي؟
هناء:اي انا وبوك تطلقنا ومعادش بنقعد في هالحوش امشي وتي شناطيك
لمار: بس وين بنمشو ياماما
هناء:ندبرو المهم نطلعو من هالمكان
علي:سمع كلام ماما جاء بسرعه وكان معصب وااجد...البنت حتقعد هنا معاي مش حنخليك اضيعيها زيك...جبدني من يدي بقوه ليه
هناء:احسسن ارتحت منكم انتم الاتنين
لمار:ههه 💔كلمتها توجع لا مش توجع و بس تقتتتل💔ولكن كنت متوقعه ردة فعلها وكلامها لان عمري ماشفتش ماما تحبني ودافع عليا دايما كارهتني كيف ماكارهة بابا
هناء:رفعت شنطتها وطلعت من الحوش من غبر حتى ماتودعني💔
🔥روايات نوزا الاماني🔥
لين:يلا كل وحده توقف تروح شن مزال مقعدكن هنا😒
اسيل:افف لين اف خلينا نهدرزو شوي ماصدقت بابا تأخر شوي
لمار اي والله حتى انا بابا اليوم تأخر عليا
لين:المهم ماطولنش هنا هيا باي انا الباص لحمار يرجى فيا
اسيل:باي حبيبتي😂
لمار: اففف نحس في روحي مش جاهزة للامتحانات
اسيل:وعلاش كل شي حيكون ساهل انشالله وتعالي نقرو مع بعض
لمار:منعرفش بس نفسيتي صفر وماخطريش حتى في لقرايه
اسيل:خلاص بلا جو انتي ديما منكدتها
لمار:انشالله خير وخلاص
اسيل:هيا اهو بابا جا نتلاقو
لمار:كلميني بعدين ع الوتس
رياض:كلكس ...لمار تعالي نوصلك حتى انتي
لمار:لا صحيت عمو شوي تاني ويجيني بابا
رياض: وينه بوك حتى امس ماشفتاش
لمار: معادش يطلع واجد
رياض:تمام تو بعدين نمر عليه
لمار:اوكي تمام
اسيل:باي
نعرفكم بالشخصيات
انا لمار:عمري19اخر سنه ف التانويه عاودتها السنه💔 لان السنه اللي فاتت لما اطلقو ماما وبابا نفسيتي تعبت ورسبت💔. ملامحي عاديه نقشي صغير مزال شكلب قاعد طفولي لوني ع الاسمر شعري وعيوني سود رشيقه عصبيه ومانحبش نسكت عن الحق .وحيدة امي وبوي وكيف ماشفتو قبل سنه تطلقو لاسباب واااجد من لما تزوجو وهما مش متفاهمين كملو مع بعض كل هدي الفترة علشاني بس في الاخر ماقدروش يستحملو بعض واطلقو بابا مارضاش يخليني لماما وخلاني نعيش معاه واصلا ماما ماكنتش مهتمه بيا وعلى قولتها افتكت مني باش تعيش حياتها،،طبعا بابا من قبل لا يطلق ماما كان هوا كللل حياتي عكس ماما كان مهتم بيا واااجد وحاطني في عيونه ومدللني ومدلعني غير شن نطلب بس وعندي تلات اصدقاء مقربين ليا🤗 اسيل ولين وكرم
اسيل: نحنا في نفس الصف ملامحها قريبه مني وتكون بنت عمي رياض صاحب بابا روح بالروح عندها أخ واحد اكبر منها وامها متوفية من فترة طويله شوي
كرم:اكيد استغربتو كيف عندي صديق ولد بس كرم جارنا وزي خوي وبابا واثق فيه واااجد لدرجه ان ماعنده مانع ان نكون اصدقا وقراب من بعض عمره24سنه شخصيته حلوة وطيب وحنين ويهبل بس عصبي واجد لونه مايل للاشقر
اما لين:ههههه الجو كله في لين جوها كوميدي اضحك بس لكن وقت الجد ماتعرفش حد تقصف طول وهي البادي قارد متعي نا واسيل في المدرسه والطلاب كلهم يخافو منها لانها شيطانه😁بس حلوة وشاطرة
