#الخطابة3
سينجح أحدهما في التجاوز و الآخر ستكلفه الحياة بأن يروي لنفسه
ماحدث في كل يوم ليتأكد أنها النهاية.
"القضارف"
*سعد الدين الله يرضي عليك خليني النمش اشوف بتي "بتبكي"
"بنهرة وكوراك"
-زمنك دا كلو في زمتي الليلة لينا كم سنة يا ناجية ما جبتي لي سيرة عن الموضوع دا وقت صبرتي واعتبرتيها ما في حياتك ..
خلاص هسي واصلي علي نفس الشي
"بتنفس بزعل"
انا انا يا ناجية تستغفليني طول بعرض قدر الحيطة يجيني راجل قدامي ويقول انتي مرتو وعندك بت منو؟؟!
يرضي منو دا يا ناجية يرضي منو؟؟!!
ولا اعرف ان اهلك عايشين وعندك اخت
*كدي استهدا بالله يا سعد الدين..
دا موضوع زمان وانتهي وانا زاتي ما كنت قايلاهم بجو والله العظيم احلف ليك بالله
"جرت سريع جابت المصحف وختت يدها فيه"
اقسم بالله العظيم وربنا يشيلني من دنيتو دي ويدي دي تنقطع انا ما متواصلة معاه ولا عارفة عنو شي ولقوني زاتو كيف ما عارفة ..
-ناجية امشي من قدامي ويومك تطلعي من هنا اعتبري روحك طلقانة طلاق تلاتة وما عندك اولاد عندي!!
احمدي الله اني عشان خاطر اولادك سكته هسي لا سألتك عن الحصل زمان شنو لا عايز اعرف
"ومن جواه نفسو يعرف الحصل وناوي يعرف"
"ب جمب الباب بصوت براحة "
*هس هس نجوي اسكتي النسمع كويس اتخيلي زمنا دا كلو ونحن ما عارفين ان امي كانت متزوجة وعندنا اخت منها"
"اريج ونجوي ومحمد ديل اولاد ناجية من سعدالدين زوجها"
-يازولة انا مش قلت ليك الناس الجو يومداك وراهم شي ما شفتي المرا البتبكي كانت قلدت امي كيف ياربي دي منو .
احي لكن ابوي طبل علينا الباب لشنو وما خلانا تاني نعرف الحاصل..
*هو في دا انتي سمعتي محمد قال لينا ابوي طردهم وكان بكورك بصوت عالي قرب يضرب الراجل..وامي كانت بتبكي..
-الا ما نعرف عندك اخو غتيت زاتو انا متأكدة سمع كل الحاصل لكن ما داير يقول لينا..
*ما بقول هو فاضي من سيرة هبة البقت في خشمو ليل ونهار التقول بعرفا من سنين ..
كان ما كلها ساعة زمن شافا..
-شفتيها شايفة روحها كيف ما حبيتا انتي زاتك مش؟
*اي مفلهمة عشان من الخرطوم تتوهمن فينا
غايتو!!!
- طبعا حاولت ادردق امي لكن ابت تقول لي حاجة..
"ونرجع ل ..."
"مدينة بتبكي بحرقة"
-دي جزاتي يا عبدالسلام ما كان العشم بعد العشرة الطويلة دي انا اول واحدة اتصدمته فيك ..
"بتعاين ل الستيتة وتقش في دموعها بطرف توبا"
*النبي ما تبكي يا مدينة كملتي دمعاتك ديل لو تسمعي كلامي بس وترجعي بيتك وبتك الخليتيها وجيتي ..
البقعدك في العميراب شنو
هسي استفدتي شنو فيها غير شيل الحال والنسوان ديل كان يقتلنك ناقصة عمر ..
-ماف زول بموت ناقص يوم يا الستيتة ياهو اليوم وقت يتم بنموت ..
*اصبري انا قلت ليك ياها شوق قريبة ليك انا عارفة ...
-النلم فيهم بس الحاقدة الحاسدة رقية الله لا يوريها يوم سمح وكان علي بدوي شاحدة ربي لا يتهني لا يهدا لي بال لا يشوفو راحة لا يصلو غاية
حسبي الله ونعم الوكيل فيهم انا قلبي كان وين لما جدعت بتي ومشيت..
استغفر الله العظيم..
*استغفري اي يابت امي الشرطة بتلقاهم بكرا دي وبياخدو جزاتهم..
-"بكاها زاد" يلقوهم وين بس يالستيتة ليهم شهور هسي شوفيها مشت كيف لاحس لا خبر زي الواطا دي التقول بلعتهم جواها ما خلينا محل ما فتشنا فيه...
"فجأة الباب ضرب قوي وصوت بها بالحيطة هداك عينهم ينطط راسو ظاهر"
*الست هوووي يا الست الست
-العوير دا مالو بكورك داير مني شنو .. خلاص يا مدينة بغشاك بعدين النشوف دا مالو بكورك لي هرد لي فشفاشي بها دا عزبني عذاب ..
-"ضحكت" مسيكين الجنا دا امشي شوفي بكون مرسلنو ليك ترمي ليهم الودع
*خلاص ارح معاي والله لمة جبنة تفرقي فيها وتتونسي وتنسي شوية..
-عارفاني ما لي في الحاجات دي يا الستيتة خليني وامشي انتي ..
*سمح ودعتك الله مع السلامة
