الدوام الليلي

🌙 الدوام الليلي 🌙 🔬23🔬 Mina Abou 💉

بوشعيب جالس تيفطر مع الحاجة ثريا ف سيجور كبير و الطبلة بيضة فيها وريدات و لكراسة.. لفيلا راقية و نقيك..
ثريا: اش درتي مزال فالموضوع تاع الحاج ديالك.. قلتليك الف مرة انا متنرتاحش لداك طارق
بوشعيب: ديك لبنت نتي لي ضسرتيها.. كون خليتيها ليا كون راها دابا مزوجة و بولادها الا مفخباركش راها فالثلاثينيات
ثريا: كيشتي غا انا دابا مطفراه معاك.. مجاوبتينيش انا راه منقبلش نزوج بنتي بزز
بوشعيب تيمسح فمو: دبا تتهضري بحال الا معارفاش بنتك.. شكون غايقدر يبزز عليها شي حاجة غير الله يهديها و صافي
ثريا تتخنزر فيه..
بوشعيب: فاضمة جيبي ليا الجورنال
فاضمة جات تتجري حتا سرسر لباب و وقفات..
بوشعيب: سيري شوفي بعدا شكون
ثريا متعجبة : شكون غايجي عندنا فهاد لوقت؟!
لباب تحل و دخلات مريم و وجهها باين فيه التعب و الارهاق.. سلمات عليها فاضمة و حركات ليها راسها و دخلات..
ثريا وقفات: مريم مالك ياكما وقعات شي حاجة؟؟
مريم باست ليها راسها: سمحي ليا ماجيتش شفتك ملي خديت كونجي كنت بغيت نرتاح شوية
ثريا: واخا ابنتي خودي ليك شي دوش دابا و سيري رتاحي
مريم : لا ا ماما (تتخنزر فبوشعيب لي تيشرب العصير) اجي بغيتك
ثريا خدات بابيي مافاهمة والو و مشات موراها دخلو لصالون صغير مفتوح..
مريم جلسات و جلسات ثريا حداها.. مريم شدات ليها فيديها..
مريم: ماما انا قررت نتزوج ب طارق
ثريا تصدمات و وقفات: كيفاش؟ علاش هادشي ياك انا وياك عارفين بلي محاملاهش
مريم: لا ا ماما.. طارق دار معايا واحد تصرف زوين و صدق ضريف انا غا كنت ظالماه
ثريا: ميمكنش هادشي يوقع فيوماين.. انا تنعرفك واش بززو عليك شدارو ليك واش هددوك بخدمتك
مريم: لا ا ماما هادا قراري ونتي عارفة حتاواحد ميقدر يبزز عليا
بوشعيب دخل حال فمو لوذنيه: اوا مبارك و مسعود شكون بحالك لقيتي لي يسترك و ماشي اي واحد السيد من عائلة و لاباس عليه غاتفرقي عليك لفريكو و الاموات
مريم تتحاول تمالك اعصابها و ناضت ليه قربات منو و هو تيرجع اللور: تنصحك متدخلش فحياتي
بوشعيب حل ذراعيه: صافي دي كالم ههه المهم غانديرو ليك احسن عرس فلبلاد ههه
مريم تجاهلاتو و جلسات حدا مها معنقاها بجهد.. ثريا لي حسات ببنتها وبلي كاين خلل فالموضوع..
طارق واقف فالاستقبال د فندق فاخر حتا جات عندو الكاتبة جلساتو فغرفة الاستقبال ب فوتويات حمرين و زربية و حطات قدامو مجموعة من المجلات..
الكاتبة: موسيو طارق هادو التيمات د الحفلات لي تيتنظمو هنا.. (هزات مذكرة و ستيلو) ممكن تقوليا التيم لي عجبك و الملاحظات و الاضافات لي بغيتو وانا غانوجد كلشي
طارق: شوفي انا بغيت حفل خيالي بالذهبي و يكون اغلى حفل ممكن يتقام عندكم هنا
الكاتبة جمعات المجلات: فهمت ا موسيو طارق (حلات وحدة و وراتها ليه كان حفل راقي و تخداو ليه بعض الصور)
طارق: هادا عجبني ولكن دخلو تغييرات باش يكون اختلاف
الكاتبة: واخا موسيو ممكن تعطيني معلومات على المدعوين التاريخ الساعة و معلوماتكم الشخصية
طارق عطاها جميع المعلومات عليه كان هدفو يعرض الصور بمكانتو الاجتماعية خصو يتزوج فهاد العمر باش متخادش عليه فكرة ناقصة و فنفس الوقت تيعجبو التحدي و موجد لمريم حياة فالجحيم بمجرد ما توقع على زواجهم..
مريم راجعة من دارهم بطوموبيلتها دايزة من طريق خاوية فيها بنايات حديثة باقي تيتبناو تتحس بالطوموبيل تتخف من السرعة ديالها و تتصدر اصوات حتا وقفات..
مريم ضربات لفولون حتا كلاكصونا و هبطات حلاتها و دخلات عاد عاقت بلي مشات مسافة بلا مترد لبال للمازوط لي كمل و هزات قرعة لما شربات تتدور فراسها حتا بانت ليها طوموبيلة دايزة و بقات تتشير ليها مشات و رجعات بلور لعندها الزاج تحل و طل عليها شاب حروفو كحلين و ملي دوا عرفاتو ماشي من هنا وبلي اجنبي..
الشاب: اش واقع ليك؟
مريم: عافاك تسالا ليا المازوط مرديتش لبال تقدر تمشي تجيبو ليا و ترجع؟
الشاب سد الزاج و ديمارا بالجهد.. بقات تتسب و تعاير فيه عاد عطات بظهرها و رجع سمعات صوت الطوموبيل..
الشاب طل ثاني : تسناي هنا واخا
مريم اشارت براسها حتا مشا و جات تسندات مع طوموبيلتها كان الصهد و لبلاصة مافيها لاربيع لا والو غا لحجر و تراب..
سمعات شي تخشخيش تلفتات لقات نيار واقف فالبلاصة لي كانت الطوموبيلة واقفة فيها كان الدم فيديه تيقطر فلرض و عينيه تيشوفو جيهة طوموبيلة الشاب..
مريم مخلوعة جرات لعندو مشافتش الطوموبيل : اش درتي ليه هو بغا غير يجيب ليا المازوط طوموبيلتي وقفات
نيار بتاسم و الدم ختافا من يدو: اجي معايا
مريم مشات معاه فديك الطريق لخاوية و تيشوف فعينيها حتا وقفو حدا طوموبيلتها..
نيار: واش بصح باغة تتزوجي من داك ال..
مريم بعينيها لي تيلمعو: واش عندك شي حل آخر؟؟
نيار: اه كاين لحل ولكن خصني نسمع منك واش بصح نتي مبغاهش واش هادشي بزز
مريم: اشمن حل عافاك ماقادين على صداع
نيار شدها: معنديش لوقت بزاف خصني نمشي قوليليا واش مبغاهش؟
مريم طاحو دموع من عينيها: نتا معارفنيش ا نيار انا كنت قوية بزاف مكانش طارق قاد يحني ليا راسي من نهار عرفتك وليت ضعيفة بزاف انا ممتيقاش هادشي ممتيقاش
بدات مريم تتبكي و نيار معنقها بقوة و الغضب فعينيه و عروقو خارجين بسبب وجهو الشاحب و الشهب..
مريم تسندات مع الطوموبيل و رجع بتاسم ليها و مشا..
مريم: نيار متدير والو عافاك انا مغنتخلاش عليك واخا نعرف نتزوج طارق
نيار رجع تيتمشا حتا ختافا مع السراب لي مخلفو الصهد مع الطريق.. مريم فيقها صوت الشاب لي هبط من الطوموبيل هاز بوديزة د المازوط..
الشاب مد يدو ليها: انا انطونيو
مريم بغات تسلم تلفتات ل نيار و تفكرات بلي اخر مرة قاسها شي حد كان مصيرو ضربة على راسو.. ملقاتش نيار و سلمات بالزربك..
مريم: متشرفين انا مريم..
انطونيو: بنتي ليا عيانة واش تتبكي
مريم شافت فيه بنظرة تاع نتا جرىء بزاف..
انطونيو: سمحيليا انا غاندير ليك المازوط لطوموبيلتك
مريم تتحك يديها: شكرا بزاف سمحليا
جبدات مريم بسطامها و هيا تترعد و مدات ليه لفلوس..
و ركباات قبل متخلي ليه الفرصة يرفض لفلوس و ديمارات..
انطونيو ستاغرب منها و بغا يمشي بانت ليه ورقة مكمشة طايحة فلرض بغا يعيط ليها ولكن مشات.. حلها لقاها ورقة شراء من سوق تجاري طوييلة كمشها و رجع لاحها.. تمشا خطوات و تفكرها.. شي حاجة جذباتو ليها تحنا هز لورقة.. كانت الحاجة الوحيدة لي ممكن تخليه يرجع يشوفها.. و يكشف سر الحزن فعينيها.. دخل طوموبيلتو و مشا..