فقرة أسئلة وأجوبة مع الكتاب الليبين😍❤❤

الحلقة الأولى "الكاتبة نور الشريف😍❤"

السلام عليكم انا مرام المسماري من البيضاء وبديت في فقرات أسئلة واجوبة مع كتاب ليبين معروفين واول حلقة حتكون مع الكاتبة المبدعة الصغيرة نور الشريف وكان حوار جدا جميل وكانت نور قمة في الذوق والاحترام وردودها كانو جدا محترمة وراقية ، وهيا نبدوو في الحلقة وحطولي اسم الكاتب الي حابين تكون الحلقة الجاية معاه☺🔥♥....

انا-السلام عليكم نور♥

نور:وعليكم السلام مرام❤.

انا-نور اليوم حبيت نسألك شوية أسئلة من بعض متابعينك وقراء رواياتك في الفيس فاضية توا او لا عشان نسألك؟؟♥

نور:اي حببيبتي عادي...فاضية اي تفضلي❤.

انا-اوكي هيا نبدو💛

نور:على بركة الله❤❤.

انا-اول سؤال ، نور من وين انتي وشن اسمك الحقيقي؟؟

نور:من مدينة اجدابيا ❤..واسمي الحقيقي نور الهدى بس معروفة بنور الشريف او نور المغربي❤.

انا-حلوو💛 ، نور من امتى تكتبي في الروايات؟؟

نور:من لما كان عمري 11 سنة وكنت من عمر التسع سنوات نحب نقرا لاجاثا و ويليام فولكنر وبديت ننشر في رواياتي في بداية 2019 في الواتس والامينو وحاليا ليا4 اشهر ننشر في الفيس♥

انا-مشالله💛 ، نور بما انه جبتي سيرة المنتديات ف كم منتدى عندك يعني باسمك انتي وكيف بديتي في الشئ هذا من الأول؟؟

نور:عندي 5 منتديات واول واحد فيه سوريين وعراقين واردنين وفلسطينن وهلبا من دول غير ليبية وتقريبا2 او 1% بس ليبين والثاني للكيبوب وهكي والثالث والرابع كلهن ليبين واغلبهن مغربيين وسوريين وهكي وبدايتي كانت عن طريق خوي كان يعرف البرنامج وعنده منتدى خاص بيه ف علمني كيف نشتغل عليه وقعدت نتقدم ونتعلم ونكتسب في أفكار وتكبر خبرتي في البرنامج أكثر واكثر لين دخلت للوحة الصدارة الي هيا صانع محتوى وخذيت ثغرة خاصة بيا وقدرت منها ننشئ منتديات ونوسع حلمي أكثر وضفت ميزات تانية من عندي والحمد الله حاليا اكبر منتدى ليا فيه مايقارب ال67k واكثر منتدى تعبت فيه بس الرقم كان قياسي في وقت قياسي وحصلت ع عدة جوائز من وكالة امينو للمنتديات وشارات هلبا ك نجم حصري وشخصية مشهورة وصانع محتوى وهكي يعني❤.

انا-مشالله ربي يزيدك نور ونشوفك في مكان مليح♥ ، نور كم رواية كتبتي من عمر ال11 سنة لتوا؟؟

نور:الحق اول رواية ليا كانت بعنوان "اصابة قلب" كانت تحكي عن بنت انغدرت وتعرضت لعدت صدمات من صديقاتها واقربائها وزوجها وانتقمت منهم بانها تهاجر لدولة ثانية وتاخذ ثروة وكل املاك زوجها وتاخذ بنتها وتهرب مع عشيقها المزيف ومش حنحكي عليها أكثر لانه ناوية نرجع نكتبها وانزلها ف منبيش تحرق الاحداث❤وكاتبة 9 روايات حاليا وحدة موقوفة لفترة زمنية طويلة ووحدة قيد التنفيذ❤.

انا-مشالله ربي يبارك ونستنو فيك في رواية اصابة قلب هاهه راه تنسيها😁♥ ، شن قصة الضجة والهجوم الي تواجهي فيه ع قصة الشراكة بينك انتي وحسن الجامعي؟؟

نور:ههه لا مش ناسيتها انشالله❤....الحق الهجوم والضجة هذي معرفتش ليش يعني هيا مجرد شراكة عمل لا اكثر ولا اقل بس هكي الليبين يحبو النوطرة😂😂❤.

انا-صدقتتيي واللهي😂😂😂 ، نور مش ناوية تبدي في عمل جديد بعد وقفتي رواية انتهاك عرض طفلة ؟؟

نور:الحق في عمل قريبا بس مش حنبدا انزل إلا لما نكتب ع الاقل 7 حلقات عشان يكون التنزيل يومي وحيكون العمل بعنوان"اتفاق دمر حياتي" وحيكون عمل قوي وفيه نوع من الرومنسية في البداية بس برضو الحاجات الحلوة متدومش❤.

انا-حلوو شوقتيني نقراها حاولي تسرعي فيها😅 ، نور بما أنه أخوك مشهور في الانستا ف ليش متحكيش عليه وليش ميدعمكش في الانستا وهوا عنده فوق ال60k؟؟

نور:انشالله❤... اي خوي معروف بس منقولش في اسمه عشان قصص الهجوم والمشاكل وبرضو بيبدو يمشو لحساب خوي ويديرو ف مشاكل وهكي ف محبيتش ندخل اي حد من عيلتي في القصص هذين وبرضو خوي كان بينشرلي بس نا عارضت عشان الاسباب هذين وبعض الاسباب التانية❤.

انا-اي حلوو نور♥ ، وصلنا للنهاية خلاص انتهت كل الاسئلة وخليت شوية أسئلة ع جنب عشان الجزء التاني لو وصل المنشور هذا 100 تصويت ونشالله موفقة يارب ونشوفك في مكان عالي ومليح وتوصليي للي في بالك نور☺♥♥

نور:حبيبتي تسلميلي يارب كلك ذوق والله❤.

انا-الله يسلمك نارو♥ ، نتلاقو في الجزء التاني انشالله♥

نور:لنا لقاء بإذن الله❤تشرفت بمعرفتك مرام وربي يحفظك واستمري في محتواك الحلو والممتتع وبالتوفيق يارب❤.

انا-زاد الشرف بيك♥ ، نشالله يارب☺♥

وصلنا لنهاية فقرة اسالة واجوبة مع الكاتبة الصغيرة نور الشريف نشالله يكون عجبكم الحوار وعجبتكم الأسئلة الي اخترتها واكتبو أسئلة حابين نسالها لنور في الجزء الثاني ، والسلام عليكم ودمتم سالمين♥,