#السمكة_الذهبية
مجاهد يوسف البشير
_____________
علي الصيرة زول بعيووني وقصيروني خلاس وشغال صياد سمك ومسمنو الصيرة عشان بعيو لكن شديد شدة الحرامي السرق التلفزيون في المسلسلة وغتيت ولتيد وموهط تب في الواطة دي ما بتلاوى كلو كلو ولا بقع اكان منو داك جاء اتدافر معاهو برميهو ، وزول ممهوووول وبالو طويل سلبة بس ، واتعلم طولة البال دي من الصيد وبجي للبحر من نصت نهار عندو كم رماي بجدعن وبقنب فوق القيفة ماسك سنارتو ومرات لمن يقبض سمك كتير بمشي يبيعو ومرات بقسمو للجيران لكن ياها شغلتو وعيشتو كلها من البحر وسبحان الله كلو كلو ما بعدم مرزق رزق جد ومحظوظ ونهائي ما برجع فاضي
يوم قام من النوم عيان ميرود وجسمو كلو مبتب ومهيييرت القومة غالباهو لمن ناغم للضي ولدو اتكل عليهو حتين صنقر في العنقريب وبعد مساااافة حتين قام علي حيلو وراسو موجعو ولافي وعيونو مطششات ومضبلن
الضي ولدو زاتو بعيو زيو كدا قادوهو هو والحسين ود خالو قوادة وصلوهو الشبخانة والمساعد الطبي اداهو حقنة بنسلين وقال ليهو ابلع ليك اسبرو وكافنول اطفال قال ليهو انا شافع؟
قال ليهو ما شافع لكن قصير والكافنول بنفع معاك
المهم الصيرة رقد ليهو تلاتة يوم بوردتو ديك وفكتو بعد تعب لكن عصرتو وعركتو عركة لمن قال كفاي والتلاتة ليالي الفاتن السهراجة طايرة ليهو فوق راسو وكل يوم بهضرب
قام والقاسية شم العافية، وتترب اتنفض وقام مشى علي البحر وبيتو اكان فاضي عشان ما شرك ليهو كم يوم والضي ولدو كل يوم بقول ليهو يابا امش البحر اجر لي رماي ؟
يقول ليهو لا
ومشى هو براهو علي البحر وحكمة الله عندو كم رماي قريب ستة والستة لقاهن فاضيات ولا صيرة ساكت ما فوقن قام رجعن تاني في فجتن ومشى علي السنارة وقبل يجدعها في البحر شاف الرماي القريب منو الخيط حقو انشدا وجرى سحبو بس السمكة اتملصت وجدعو تاني ومع قعدتو كدا قبض والمرة دي جراهو سريع سريع وقبض ليهو سمكة ليها فقرة مرقها برة وجدع الرماي تاني وشالها وبقى مارق بيها من البحر
الايام ديك البحر اكان زايد والموية مالية القيفة ومرق شايل السمكة بيديهو اللتنين من شدة مي كبيرة لمن وصل البيت عندو حركونية اول ما يجيب السمكة بشرط بطنها وجاب سكينو وشرط بيها بطن السمكة وتج في حاجة اتعارضت ليهو زي الحديدة جوة بطن السمكة وزحزح المصارين ودخل يدو مرق ليهو سمكة حقت دهب اصصصفر وناغم للسيدة مرتو قال ليها عايني لقيت شنو في بطن السمكة دي قالت ليهو دا دهب وحظنا غنينا غنينا يا البعيو
قام حدر ليها ما برضى يقولوا ليهو البعيو ، ولمن شافتو زعل قالت سمح غنينا غنينا يا الصيرة
قال ليها والله اخير البعيو تصري العقرب في رقبتك آ المعولقة
وشال السمكة وعندو حليلة فوقها موية جدعها فوقها عشان يغسلها اكان السمكة قعدت تعوم جوة الحلة في الموية
لمن شاف السمكة حية قال ليها جيبي الجردل ألكعي ألكعي وأمليهو موية
السيدة جرت جابت الجردل الربعي ملان موية وشال السمكة ختاها فوقو اكان الجرد الربعي انقلب حق دهب عاين في السيدة قال ليها دا شنو دا ؟
قالت ليهو عان للحلة برضها بقت صفراء
قال ليها هسسسسسسس خشمك عندك نحن اكان كدا وجدنا الكنز قالت ليهو علا اكان تنضم بيهو براك ساكت وانا ياتو يوم خشمي دا نضم لزول بحاجة ؟
قال ليها كدي جيبي الكوز داك وجابتو ليهو دخلو في الجردل الفوقو الموية وطلعو بس ما انقلب دهب
قال ليها السمكة دي ما بتريد الكيزان وللا شنو ؟ كدي جيبي الكورة جابت الكورة قام غرف بيها السمكة والكورة طوالي انقلبت دهب
قام شال الجردل بي مويتو وبسمكتو ودخل جوة الاوضة والسيدة لملمت الحلة والكورة والكوز العفين ما شالتو قالت اصلو مافي كوز نافع
دخلوهن جوة الاوضة والصيرة مرق ومرق معاهو السيدة من الاوضة وقفلها وقال ليها امشي كملي السمكة الكبيرة نضفيها ونجضيها خلينا ناكلها
قالت ليهو سمك شنو الباكلو وبنجضو انا تاني ؟ والله ولا يدي ما بمدها شيلها معاك ساي والبركة في سميكتنا الجوة الجردل دي
الصيرة لفح عمتو ومرق مشى لشيخ الطيب ووراهو الحكاية من طقطق للسلام عليكم وشيخ الطيب قال ليهو خشمك عندك وورحكاكا وريني السميكة دي وساقو معاهو البيت قال ليهو كدي انجرب جيبي لي كورة تاني يا السيدة
قالت ليهم هوي عدتي دي ما تكملوها لي وشيخ الطيب دخل الكورة في الجردل الفوقو السمكة الذهبية ومرقها وما انقلبت دهب اي واحد قعد يعاين فوق التاني
قام الصيرة قال ليهو كدي خليني اوريك انا علمت كيف قبيلك ووراهو واول ما مرق يدو لقوا الكورة انقلبت دهب وشيخ الطيب جرب كم مرة الكورة في فجتها ولمن يدخلها علي الصيرة تنقلب دهب قام قال للسيدة تعالي جربي انتي وبرضو ابت تنقلب قام الشيخ قال ليهو اكان كدي الشغلة دي فيك انت دا يا الصيرة ما السمكة براها
وشال ليهو حلة دهبية من الاتقلبن وفات بيتو واول ما شيخ الطيب وصل بيتو الكورة رجعت في فجتها لا دهبية ولا شتين وشالها وجاء راجع بيها للصيرة
