امل بلا حدود❤

الحلقة1💜

رهف..نايضه جريي دوشة ولبسة بسرعه سروال اسود وبلوزة سودا عليهم كووت طويل باللون البيج شوز ابيض وشاح اسود
نازلة تجري من الدروج خط
عفاف(ام رهف)بشوية الطيحي تتكسري
رهف..ماما فاتني الوقت تأخرت على موعد المستشفى من اول يوم شني بيقولو عليا مهملة من بدايتها
عفاف..ميقولو شي غير انتي استهدي بالله وقعمزي افطري
رهف..لا أله إلا الله محمد رسول الله هي باااي وخدت بوسه من امها
عفاف..باهي كولي حاجه
رهف..طلعت تجري  ومن بعيد قالت ..لالا مش جعانه ادعلي بس
عفاف..ربي يفتحها في وجهك وين ما تمشي
ركبت عفاف سيارتها واتجهت للمستشفى وطبعا مش عارفه راسها من رجلاها لان كانت في امريكا حوالي 7 سنين تقرا برا
__________________________________
رهف..مواليد 94( 26سنه) بنت طيوبة لأبعد الحدود لدرجة يقولو علاها هبلة متحبش تزعل حد منها ولاتزعل من حد مهما كانت الاسباب ..مواصفاتها متوسطة الطول شعرها اشقر وعيونها زرق بيضه ضعيفه لاكن مش هلبا عندها اخت وحدة مواليد99 سناء شقرا زي اختهامخطوبه  لاكن مسمومه ولسانها طويل عكس رهف
امها عفاف وبوها محمد قاضي صارم هلبا عصبي وميحبش الغلط لاكن حنون على بناته
__________________________________
وصلت رهف فتحت الباب وخطفت الشنطه وخشت جريي
الكل يشبحلها باستغراب كيف تجري
وصلت عند لاستعلامات لو سمحتي انى اليوم اولي يوم في المستشفى وعندي موعد مع الدكتور اشرف
الاستعلامات ..هوا مشغول توا عنده حاله استنيه شويه
رهف..ممكن نعرف وين مكتبه
الاستعلامات..اخر مكتب في الدور الرابع
رهف..اوكى ثانكس ومشت تجري
الاستعلامات..هادي بتعالج هيا هبله تبي من يعالجها لاحول ولا قوة الا بالله
_____________________________________
سناء..ايوا حبيبي
مهيمن..الو
سناء..كيف الحال وين الغيبات
مهيمن..والله شغل لفوق راسي تعرفي الوضع
سناء..ربي يعينك
مهيمن..امين شني جوكم في ليبيا تعودتو
سناء..اهوو انى مزال نبي نرجع امريكا بابا ميبيش ورهف معنده حتى هيا تبي خدمتها هنى
مهيمن..عندها الحق شهادتها متبيش الضيعها
سناء..تقدر تخدم في امريكا عرضو علاها اكتر من شغل في اكتر من مكان هيا رفضت تبي هنى
مهيمن..اختك من النوع الوطني
سناء..بكل تعرف
_________________________________________
رهف واقفه قدام غرفة الدكتور اشرف وتحرك في رجلها بتوتر
شويه وجى الدكتور لغرفته بفتح الباب
رهف..اهها لو سمحت انتا الدكتور اشرف
اشرف..اي اني تفضلي اي خدمه
رهف..انى رهف حنبدا خدمه في المستشفى هادا وعطوني موعد معاك
اشرف..اي دكرتك انتي خريجة امريكا
رهف..اي
اشرف..خشي للمكتب هي خلينا نتفاهمو
خشت رهف ووراها اشرف وسكر الباب
اشرف قعمز في كرسيه ..قعمزي متقعديش واقفه
رهف..قعمزة شكرا
اشرف..تعرفي انك تأخرتي هلبا على الموعد صح؟لدرجة خديت حالة وانتي ماجيتيش
رهف..اسفه دكتور مش حتتكرر
اشرف..اكيد مش حتتكرر لان وقتها مش حيقعدلك مكان هنى
رهف..حاضر
اشرف..تو خليني نفهمك النظام هنى انتي زيك زي اي دكتورة هنى شهادتك مترفعكش عليهم
رهف..اي عارفه دكتور
اشرف..كويس انتي من اليوم تحت التدريب فلهذا حتكوني مساعدتي وعملك يبدا من اللحظه هادي
رهف..ابتسمت ..يعني انى خلاص حنخدم هنى
اشرف..مبدئيا اي وتوا تقدري تطلعي تنسقي مع الإدارة
رهف..اوكى ثانك يو دوكتور وطلعت جري من المكتب
اشرف..شد الوراق امتعه يشوف فيهم ..خاينا نشوفوك توا شني يا خريجة برا قام التليفون جيبيلي قهوة
اشرف..رئيس دكاترة المستشفى كبير عمره43سنه مواصفاته طويل شعره فيه شيب عيونه سود مش ابيض ومش اسمر لاكن شخصيه وهيبه كل الدكاترة ميقدروش يفوتو كلمته مزال في حاجات تانيه حنعرفوها مع بعض بعدين
_________________________________________
ركبة رهف لأعلى طابق غرفة المدير دخلتها الممرضه
رهف..السلام عليكم
المدير..وعليكم السلام انتي رهف الدكتورة الجديدة
رهف..اي
المدير مد يده سلم علاها انى مروان مدير المستشفى هادي
رهف..تشرفت بمعرفتك استاذ
مروان..درتي موعد مع رئيس الدكاتره الدكتور اشرف ولا
براءة..اي
مروان..كويس معناها هرفتي طبيعة شغلك تقدري تاخدي جدول مواعيدك وتبدي من اليوم
رهف..اوكى حاضر استاذ بلاذن وطلعت
مروان..يحك في شعره طرف البنت
________________________________________
نزلت براءة ومشت معاها ممرضه ورتها مكتبها كان قريب من مكتب الدكتور اشرف
حطت رهف يدها ع الباب بتفتحه
الدكتور اشرف..رهف
رهف..وقفت نعم دكتور
اشرف..اول حالة حتجي توا بتساعدي فاها استعدي
براءة..حاضر دكتور
كمل اشرف طريقه وخشت رهف لبست البالطو بإبتسامه لانها طول عمرها تحلم بيه قعمزت على مكتبها تراجع في جداول المواعيد وقائمة المرضى اللي يشرف هلى حالتهم اشرف
____________________________________
مدخل المستشفى دوشة صايره لان في وحده جايه تعيط وتبكي متبيش تخش
مهما حاولو معاها مقدروش يدخلوها طلبو الدكتور اشرف انه يجي واشرف بعت لرهف نفس الشي لان قاللها حتشارك في اول حاله بتخش
نزل اشرف
المرا(ايناس)..حولوووووو منبيش نخشش ابعدو علياا
قرب متها ممرض بيوقفها بدت تعيط بأعلى صوتها لااااا ابعددد متمسنيشش وكإن جتها حاله
نزل  اشرف شاف ايناس مقعمزة علارض حاول معاها لاكن تعيط والدف مبتش تخليه رهف تشوف في الموقف وساكته
قدمت خطوتين جهتها البنت توخر
رهف..بصوت مسموع لو سمحتو ممكن تبعدو شويه
الكل انتبهولها
رهف..بعدو رجاءا
بعدو كلهم ومن بينهم اشرف اللي مصدوم فاها
نزلت رهف لوطا لمستو البنت
رهف بهدوء..ممكن تنوضي معاي نخشو داخل
ايناس..تشبحلها لأ بهستيريا لالا مش حنخش دار انى لا
رهف..مش حتخشي دار نوعدك تمشي معاي لغرفتي نتكلمو شويه لو محبيتيش الوضع تطلعي مفيش حد حيجبرك
ايناس..لا يشدونيي
رهف..مفيش حد يشدك شوفي اشرتلها على الشرطه والامن مغيش حد يقدر يجي هنى هيا توا نوضي معاي بشويه ساعدتها ناضت وخشت معاها وحده وحدة وسط انبهار الكل كيف قدرت تقنعها
اشرف..بدايه حلوة ومشى
خشت رهف غرفتها ودخلت معاها ايناس اللي تحك غي يدها بهستيريا
رهف..تعالي توا تقدري تقعمزي هنى قعمزتها على كرسي مددتها
وحاولت تخلاها تتكلم  بأي طريقه لاكن مفيش استجابه
ايناس..انتي شني تبي مني علاش تسألي فيا
رهف..انى بنساعدك
ايناس..كيف بتساعديني بتحميني منهم
رهف..اي اكيد انتي بس قوليلي شني صاير معاك وانى نوعدك نساعدك مهما كلفني الموضوع
ايناس..انى كنت نركب في باص لما نروح من المدرسه 😭
رهف ..اوكى تقدري تتكلمي على راحتك متخافيش
ايناس..هوا يروح بيا كل يوم نحسه يحاول يفتح معاي مواضيع ويحب يخليني اهر وحدة لاكن انى منبيش نقول لللللا لا روح بيا بكري
في يوم اصر انه يروح بيا اخر وحدة حطينا البنات كلهم حوشهم بعدين مشى بيا ع اساس بنروحو خش بيا من طريق طويلة وغريبه هيا زي المزرعه وانى نعرفها مش بعيده علينا
قتله وين رافعني قالي بناخد بنزينه من الحوش معبي بيدون لان السيارة بتوقف
انى صدقته وصلنا لمكان نزل وقالي انزلي قتله لا منبيش ننزل امشي بروحك فتح الباب ونزلني غصب دخلني ل زي الاستراحه حاوت نهرب او نعيط لاكن مفيش حد يسمع كانت الحوازة كبيرة هلبا والحوش جاي في الوسط مستحيل حد من برا يسمع
هوا شدني ودخلني للدار وسكر الباب مخلانيش نطلع ع قد ما حاولت شربني اميه غصب بعدين معاش حسيت بروحي ابدا نشوف ونسمع في كل شي لاكن نقدرش نتحرك هوا 😭😭😭هوا    هوااااا
رهف..تمام اهدي هوا شني
ايناس.. نضت لقيت روحي طايحه والدنيا كلها دم جنبي حسيت روحي مش قادرة نتحرك هوا اغتصبني انى مش نظيفه
رهف..اشششش لا انتي نظيفه هوا مش نظيف بعدين شني صار
ايناس..😭😭
رهف..ايناس خليك واتقه انى بنساعدك لاكن انتي لازم تقوليلي كل التفاصيل اللي صارت معاك
ايناس..بعدين نضت قالي اركبي في السيارة بكلل برود كإنه مش دايرتلي شي ركبت في السيارة وانى مش قادرة نوقف حطني قدام الحوش ومشى
اول ماخشيت لقيت ماما تستنى فيا وخايفه
حاولت نحكيلها شن صار بابا سمع وظربني
رهف..سكرة عيونها تحاول متبكيش لان ضروري تحسسها بالقوة
ايناس..بعدين..هوا كلم بابا وهددنا قال انا لو يطلع الموضوع حيقتلنا قال نحرق حوشكم وانتم فيه وبابا يعرفه هوا اسمه مجدي.. بمجرد ماذكرت اسمه بدت تهلوس
رهف..ظاغطه على ايدها وتحاول تهداها يعني انتم مرفعتوش فيه شكوى
ايناس..لا منقدروش بال خاف منه وخاف على سمعتنا
رهف..والمدرسه معاش مشيتيلها
ايناس..لا مستحيل نمشي هوا غادي
رهف..من حوالي امتى صار معاك الشي هادا
ايناس..تلاته شهور
رهف..شوفي يا ايناس انتي بتقعدي معانا هنى باهي
ايناس..لالا لالا نخاف نبي نر ح نبي امي
رهف..مفيش شي حيخوفك هنى انى جنبك مستحيل اي حد يقربك  انتي تبي تبري ولا؟
ايناس..اي
رهف..اوتقي فيا وانى بإذن الله حنكون معاك خطوة خطوة لعند تبري نهائيا لاكن انتي لازم تساعديني وتحكياي كل شي يصيرلك
ايناس..هزة راسها ب أي
رهف..توا تعالي معاي نرفعك لدارك ارتاحي بعدين نكملوا
خدت رهف ايناس لدارها
ورجعت كتبتب ملفها
ومشت للدكتور اشرف
رهف..طق طق طق
اشرف..تفضل
رهف..فتحت الباب
اشرف..تعالي رهف
خشت رهف عطاته الملف ..دكتور هادا ملف الحاله
اشرف..الاسم
رهف..ايناس
اشرف..العمر
رهف..17
اشرف.. نوع الحالة
رهف..سكرة عيونها  ..اغتصاب
اشرف..أمتى صارت الحادثه 
رهف..من تلاته شهور
اشرف..خديتي منها الاعراض اللي تصير معاها اضطراب نوم هلوسه
رهف..لا دكتور تعبت هلبا مقدرتش نضغط علاها اكتر من هكي
اشرف..تمام تقدري تطلعي واهتمي ب الحالة هادي لانها هيا اختبارك  اللي حيخليك غي المستشفى هادي او يفصلك منها
رهف..حاضر دكتور وطلعت
اشرف..بداية كويسه خلينا نشوفو الجاي معاك

مني البطل
اكتبو توقعاتكم في التعليقات

قصة ايناس قصه حقيقه صايرة مع بنت حكتلي علاها شخصيا

روايات ميني💜
رايكم

من اكتر الروايات اللي قريبة على قلبي لانها تحكي قصص صايرة لناس في الحقيقه لاكن ملقوش حد معاهم بسبب تخلف المجتمعات.......