BatGirl_01

إيه اللي المفروض تعمله لما تدفن أبوك؟تبكي؟تصرخ؟ تنهار؟ولا تقف وسط الناس كلها وتتصرف كأن الدنيا لسه ماشية عادي؟
          	مراد مكانش عارف الإجابة
          	أو يمكن كان عارف...
          	بس مش قادر يعملها
          	المطر كان بينزل خفيف فوق المقابر
          	والطين في الأرض 
          	وصوت الدعوات بيتردد حواليه
          	"الله يرحمه" "ربنا يصبرك" "البقاء لله"كلمات كتير
          	كلها كانت بتعدي من جنبه كأنها موجهة لحد تاني
          	مش ليه
          	لأن الراجل اللي بينزلوا عليه التراب دلوقتي...
          	مينفعش يكون أبوه مش بالسهولة دي مش بالسرعة دي
          	وقف ثابت
          	شايف كل حاجة وسامع كل حاجة
          	لكن حاسس كأنه بعيد أوي عن المكان
          	كأن اللي بيحصل ده فيلم سخيف حد أجبره يتفرج عليه
          	إيده كانت متكتفة قدام صدره
          	وفكه مقفول بعنف
          	لدرجة إنه حس بألم في سنانه لكنه مكنش مهتم
          	لأن فيه وجع أكبر بكتير كان واكل منه حتة كل تانيه 
          	وجع اسمه الندم
          	آخر مكالمة مردش عليه آخر خناقة آخر مرة ساب أبوه واقف وراه وهو ماشي كل الذكريات دي كانت بتضرب في دماغه واحدة ورا التانية
          	ومع ذلك...
          	محدش شاف حاجة محدش شاف الانهيار اللي بيحصل جواه
          	إلا شخص واحد
          	عمرو
          	الواقف على بعد خطوات منه
          	من ساعة ما وصلوا المقابر
          	وعينه مبتفارقوش
          	
          	مش لأنه خايف عليه ومش لأنه بيحاول يواسيه لكن لأنه كان شايف حاجة غيره مش شايفها
          	شايف شاب واقف على رجليه بالعافية
          	ولو اتساب لوحده دلوقتي...
          	ممكن يقع
          	في لحظة 
          	 مراد رفع عينه من الأرض ولأول مرة من ساعة ما وصل
          	بص ناحية عمرو
          	لقاه واقف وسط الناس
          	هادئ كعادته ملامحه متماسكة لكن عينه كانت عليه
          	عليه هو مش على القبر ولا على الناس ولا على أي حاجة تانية
          	ثواني قليلة
          	واتقابلت نظراتهم
          	مراد حس بضيق مفاجئ
          	كأن النظرة دي كشفت حاجة كان بيحاول يخبيها من الصبح
          	فشد فكه أكتر وبعد عينه بسرعة ورجع يبص للقبر
          	رافض حتى يعترف لنفسه
          	إن وجود عمرو هناك...
          	كان الحاجة الوحيدة اللي مخلياه واقف لحد دلوقتي