S

بَس سَـلِّم عليـة وشوف رَدي شلون
          مـا أرد السَلام أشمُرلك عيوني ..

أبچـي گبال بيتَـك جَـاهل 
          وخسران بَـأكثر لعبة يـلعبها ،
          أول مـرَّة أشوف أيـدين تتـرك 
          أيد اليحبها ..

حـاول تـراجع قـرارك
          بعد كٌل هـذا الدمـار ؟
          منين إلك هذا البـرود 
          واني بين ضلوعي نـار !،
          جَـاي أحس بـروحي ضَـايع 
          لأن مـا گادتـني إيـديك ..
          ظنوني مـا قنعن عفتني 
          وكُلهن يـدورن عليك ، 
          انـي أعـدَّك شي حقيقي
          ومـا يـروح بـغلطة وحـدة
          وجهَك أول شي أرسمَـه 
          من أحُط راسي على المُخدة ..

دُخـان المصوفر فَـترة ويروح
          بَـس العود الأخضر يعمي دُخانَّـه
          بنُص البَـحر هينـة يموتـلك قُبطان
          كُلهَـا تصير عدهَـا چـفوف سفانَّـة
          بس كُلي الشراع شلون لو راح ؟
          نملخ هدومنَـا ومانـترس مُكانَـه . 

الحُب من طرف واحـد چَـان
          بس حَسيت بـمَشاعر بينَـك وبيني ،
          عبَّـالي إهتمـامي الـبيك
          مُمكن يـگدر يخَـليك
          تبَـادلني الشعور الچَـان مَـاليني
          وأَنغشيت ..
          الحُـب الشفتَـه بـعيونَـك
          إنعكاس الحُب الـبعيني .

مَشهد غيابَـك خَـرابـة
          وصوتي مَبحوح شيصيح !
          الشَـوارع كلها مسكونـة 
          وصفير وصوت ريـح ،
          والهَيـاكل والجَـماجم ملحمَـة 
          والنَـاس ميتَـة و وحدي أعثر وأطيح ،
          ولو خَـبر منَّـك يجيني ؟
          النَـاس تعدل من جديد ،
          الضوء يبين مِن بعيد ، مُطر ينزل ،
          شَمس تضحكلي ،
          مَشـانق تنصُب مَرجوحـة 
          لـ أطفال الشَهيد
          الوَرد يطلع بـالجَـماجم
          لو تجيني .

ومثل كُل لـيلة أنتظُر خَـليتني ..

اني عبَّـالي تحبني ،
          مِن چِـنت تـحچيلي كُلشي ..

شلون أتـلاحَـك الـبالروح يتكسَّر ؟
          وأنَـا خَـوَّاف من صغري ،
          ما أتـلاحگ المَاعون مِن يطيح 
          أغمض عيوني واتكتَّـر 
          بِـچيَت، وفوگ ما تتصور ؟
          تصـوَّر .

الدنيَـا مو دنيَـا عشك يَـبن الحَلال 
          لا تخلينَـا بمَحبتَـك ننجُبر ،
          إنتَ أبن العَـافية وأبن الدَلال
          واحنَـا ولد الموت ربَـانـة الفُقر ،
          بينَـا وبينَك فَرق كُلش چِبير
          وما نگول أسباب كُل هذا الفَرق
          وما نكمل السَالفة لـحَد الأخيـر 
          من الأساس ويَـاك مَسدودة الطُرق ،
          ويَـاك ما نرهَم وما ترهَم مُـحَال !
          ويانَـا ما تگدر تدوم وتستمر
          ويَـاهو گلَك بالسَهل درب الوصَال ؟
          وأنت تدري دروبنَـا موَرثَـة جَمر !.