အဝေးကြီးကရေးတဲ့စာပါ ဟေသာ
ဒါကြောင့် ဖတ်ပါ။

အသက်ရှည်ရှည် နေရတာကို
ကြိုက်လား ဟေသာ။ 
ငါတော့ မကြိုက်ပါဘူး။

အသက်ရှည်ရတယ်ဆိုတာ
ကိုယ့်ကို နာကျင်လေးလံစေတဲ့
အရာတွေကို ပွေ့ပိုက်ရင်း
ခရီးအရှည်ကြီး ထွက်ရတာပဲလေ။

ငါတော့ လုပ်ချင်ရာတွေလုပ်ပြီး 
အသက်လေးဆယ်လောက်မှာ
ငါ့ကိုယ်ငါ ဆူဆိုက်လုပ်ပစ်မယ်။ 
ငါ့ကို မုန်းတဲ့လူတွေ ပျော်ပါစေ။
ကုသိုလ်ရတာပေါ့။ 

ငါ့ကို သတိမရတဲ့လူတွေ
မေ့ထားတဲ့လူတွေအတွက်
နောင်တပေါ့။
ငါ သေကိုသေပစ်ဦးမယ်။

အသက်ကလေးရယ်တဲ့ 
မ ရှည် စေ လို ပါ ဘူး ကွယ် ။

အသက်ရှည်ရတာကို
မကြိုက်နဲ့ဟေသာ။ 
အဲဒါ လူကျပ်တဲ့ ဘပ်စ်ကားကြီးကို ၊ 
ဂိတ်စ ဂိတ်ဆုံး စီးရတာ။ 
မနိုင်တဲ့ ဂိမ်းကို
အကြိမ်ကြိမ် ဆော့ရတာ။ 
မမီတဲ့ ရထားကို
ဈေးကြီးပေးပြီး လက်မှတ်တွေ
အကြိမ်ကြိမ် ဝယ်ရတာ။ 
ငါတော့ လူလည်ဖြစ်သွားပြီ။
သေဖို့ ရွေးလိုက်ပြီ။ 
ယုံစမ်းပါ။ ငါက လူလည်။

စီးကရက် သောက်ပါဟေသာ။
သူက အသက်တိုစေတယ်။
ငါတို့ အကြာကြီး
ဝေးမနေရတော့ဘူးပေါ့။
တစ်စုံတစ်ခုကို စွဲလမ်းရင်း
သေသွားတာမျိုးပေါ့။
မိုက်သားပဲ။

- စစ်ငြိမ်း