manal_mohamed_tawfiq
البداية كانت لما لقيت أختي اشترت رواية، وأنا أصلًا من عشاق الروايات، بس اتفاجئت إنها مكتوبة بالعامية، لأني مكنتش متوقعة أصلًا إن في روايات بتتكتب بالعامية! وكانت دي أول مرة أكتشف فيها الموضوع ده.
بدأت أول فصل، ولقيت نفسي بانجذب للتاني والتالت، لحد ما بقيت منتظمة عليها كل يوم لمدة شهر، لأني كنت عاملة لنفسي نظام دراسي، وللتسلية كنت بخصص ساعة قبل النوم لقراءة الرواية.
وبجد، كانت من أحلى اللحظات اللي بحس بيها في يومي. بقيت مستنية اليوم يخلص عشان أقعد أقرأ، لحد ما يغلبني النعاس وأنام.
الرواية كانت بتوصل المشاعر والأحاسيس بطريقة جميلة وبسيطة جدًا، لدرجة إني كنت بحس كأني أنا البطلة. وعجبني قد إيه الرواية مصرية، سهلة، وقريبة من الواقع، ومش درامية بشكل مبالغ فيه، بالعكس، كانت واقعية لدرجة إني في وقت من الأوقات شكيت إنها قصة حقيقية، خصوصًا إن البطلة كانت بنفس اسم الكاتبة!
وقلت بيني وبين نفسي: "يا ترى دي فرح فعلًا؟ وكانت بشعرها وبعدين تحجبت؟" 😂
وفضلت أبحث عنها أونلاين كتير جدًا، لحد ما وصلت لها بالعافية بعد معاناة 😂، وكلمتها وشكرتها من قلبي، وقلتلها قد إيه هي تستحق كل كلمة حلوة وكل تشجيع على تعبها ومجهودها في كتاباتها.
manal_mohamed_tawfiq
وموضوع الرواية مكنش واقف عندي أنا بس.
بقيت أستغل وقت الفسحة، اللي مبيعديش ربع ساعة أو نص ساعة، وأقعد أقرأ الرواية والكل حواليا. ومع الوقت بقوا مستنيين الوقت ده كل يوم عشان يسمعوا معايا.
ولو حد غاب، كان بييجي تاني يوم يقرأ بنفسه اللي فاته. وحتى اللي مكنش بيشارك في السماع، مجرد ما الكل اتكلم عنها، بدأ يهتم بيها.
وفي الآخر قررت أسلفها لبنت، ولما تخلصها أسلفها لبنت تانية، وهكذا. والأجمل إن في ناس أصلًا مكنتش بتقرأ روايات خالص، لكنهم انجذبوا للرواية، وكانت "الحب بالشوكلاتة" أول رواية يقرؤوها في حياتهم.
وكمان عجبني جدًا طابع لبس الحجاب للبطلة في النهاية، لدرجة إن في زميلات ليا اتأثروا بيها وبدأوا يفكروا في الحجاب.
بجد، الكاتبة تستحق كل الدعم والتشجيع ❤️.
وأنا فخورة جدًا إني وصلتلك في الآخر، وقدرت أكلمك، وإنك بقيتي صديقة ليا رغم فرق السن البسيط بينا. بس عفويتك، وطيبة قلبك، وروحك الجميلة خلوني أحبك أوي وأحب أشجعك إنك تبدأي من جديد، ونرجع نشهر روايتك من تاني ونوصلها لناس أكتر تستحق تقرأها.
وأتمنى بجد إن الغلاف الجديد يكون عجبك، وإنه يكون بداية موفقة لروايات جاية بإذن الله.
أنا واثقة فيكي وفي كل كتاباتك، وواثقة إن كل حاجة هتكتبيها هتقدر تلمسني وتعجبني زي ما عملت "الحب بالشوكلاتة" بالظبط. 🤍🍫