فهد

أخبارك فهود؟ عاد وينك مختفي 
          أنا كل ما ضاقت فيني الدنيا دخلت حسابك احسه يخفف عني بطريقة ما مدري كيف اوصل الشعور بس فيه طاقة معينة مريحة don't stop talking pls ❤️

@ FxOo7_   اقصد ذي القصه مالت عيال عمك ولا انت مجرد كاتبها وهي مو لك اتمنه فهمت

الاسبوع الجاي اخلص اختبارات ❤️
          من عيد الفطر وانا اختبر 
          
          بنحاشششش ابو ظبي 
          وبعدها بروح برج العرب ثم بروح كافيه فزاع 
          ثم ارجع أصوم عرفه واعيد عيد الاضحى 
          
          ثم ارجع اختبر ❤️ حسبي الله عليك من تخصص

باسل يقولي عندك عيال عم اسمهم مازن ويزن ؟ قلت ايوه ليش 
          قال جاني بالقسم واحد منهم اول ماشفته 
          كانه مثل زولك وبعدها انتبهت انه مثل قبيلتك و ياخي ماقويت اصمل فيه
          
          
          الحين اي احد نفس قبيلتي بتتعامل معاه بلطف حتى وهو غلطااااان مافهمت ؟ 
          لا لا مستحيل يحتاج مهنيه يارب ما يدرون عنه 
          
          
          ثم كمل وقال يوم قريت الاسم زين وركزت إلا هو يصير ولد عمك او انه تشابه بالصدفه 
          المشكله طلعوا عيال عمك منجد 
          والله تعاونت معاه لانه مرتاع مره 
          
          ولد عمي !!!! 
          ولد اخو نايف 
          ولد عمي متعب تخيلوا 
          ياراسي كانوا مبزره ماعندهم سالفه وش صاير بالدنيا 
          
          
          بعد العصر حسيت نفسي حرمه 
          اخذت قهوه وحلا ورحت بيت جدي عشان اقهر جدتي 
          
          لان هي تسوي فيني كذا 
          وعاد هي تحب احفادها ماترضى عليهم 
          
          
          لقيتها تقرا أذكارها بالحوش 
          قلت ماشاءالله تعرفين ربك 
          قالت اقطع واخس
          جانا جدي جاي من المسجد قال سبحي خليه بحاله
          قالت انت ما سمعت شقال ؟ 
          قلت هذا وانا جايب لس ياجده قهوه وحلا 
          وقمت اصب قهوه واقطع حلا 
          
          إلا جات العامله قالت هذا ماما 
          قال جدتي والله اني داريه 
          قلت وش هذا !!! 
          
          
          تخيلوا جاي ابي اسوي مشكله والمشكله جتني أنا 
          عامله جدتي تقول انت اللي قصصت الورد والزرع وحفرت ؟ 
          انصدمت وش تقول ذي 
           الهرجه ان الصباح جدتي تتمشى بالحوش وشافت الارض محفره وفيه احد كانه حافر كل خطوتين حفره 
          صرت أنا المتهم 
          على العموم ذي مو سالفتي 
          بعد ماخلصنا النقاش بالزرع
          رجعت لموضوعي وقلت ياربي الله يكفينا الشر مدري شصار على مازن ويزن  طمنوني عنهم ؟ 
          ومن هنا بدأ الموضوع 
          وما احكي لكم القهر وكذبتني ويوم تاكدت وطلعت صدق 
          رجعت قالت انت من علمك ؟؟؟ الظاهر انك معاهم وانت ساس البلاء 
          
          اقسم بالله حماره وبس 
          وبعدها عصبت ان جدي هاجد قالت انت عندك علم ؟؟؟؟ 
          وقلبت عليه 
          وكان الوضع ضحككككك والحياه سعيده 
          
          بس اللي خرب علي من؟ 
          فيصل 
          حسبي الله عليه فجاه فوق راسي 
          وعلمته جدتي كل شيء 
          لف علي وقال ابو شوشه ما يدري ان إفشاء اسرار العمل غلطططط؟ 
          قالت جدتي منهو منهوووو
          
          قلت بخاطري ياربي اجحد ولا اقول الصدق ؟ 
          
          تكلمت و قلت هو علمني انهم جو قسمه بس ماقالي وش مهببين 
          
          طنشني الحيوان مارد علي 
          وقال لعجوز النار يا امي ذا واحد سربوت متوظف بالغلط 
          
          وهنا بدأت هوشه بيني وبين فيصل ودوب قضيت ورجعت بيتي 
          حسبي الله عليه الشايب ذا يهبى مهووس اقسم بالله 
          ولا كيف عرف

نحزن أنا وإياد 
          
          كتب رساله قال نام عندي 
          وعلى طول كتبت أنا ذا ماعنده مشاكل بالثقه ؟ 
          على طول ينام عند العرب 
          إلا هو يكتب معاي صح شيء حلو بس مره استغربت انه عادي على طول 
          
          
          
          
          أنا وياه عندنا مشاكل بالثقه شوي وبالميانه 
          يعني لو اننا مكانه 
          يمكن ماراح نتقبل إلا بعد سنتين
          اياد يقدر يخليها سنه 
          أنا اقل شيء سنتين عشان ارقد عند احد لازم يكون مقرب جدًا 
          
          وهذا كذا عادي 
          
          
          راسي صدع من محادثتي مع اياد 
          قلت كيفه شدخلني خلاص 
          
          بس على حظي عزمني على الغداء 
          وانا اتجهت لبيته 
          وانفتح الشباك إلا ام اياد تقول اياد مو موجود 
          قلت شلون عزمني الغداء
          وبعدها دق اياد يهاوشني يقول ياحمار امي تهاوشني بسببك قمت صرفتها وقلت أنا عازمه في مطعم 
          قلت طيب وين المكان 
          قال ياحمار مافي مطعم فيه شقه 
          
          
          اخ يافهاوتي طلع قايل تعال شقتي وانا رايح بيته
          
          
          يوم جيت 
          اللي فتح لي مين؟ واضحه 
          انصدمت ابك للحين موجود 
          وبعد يضحك يقول اياد انهار من فهاوتك 
          
          وانا اقز اياد اكيد عطاه أبديت عن فهاوتي 
          
          واياد صب شاهي قاله تسلم ياروحي !!!!! 
          
          فجاه أشوف رساله بالجوال 
          عيونك شوي وتطلع ياحبيبي ماتعرف الذرابه انت تبيه يقولي تسلم ياكلب عشان ترتاح ؟ 
          
          بالله فيه عيال يقولون لبعض ياروحي كذا 
          
          قلت لا تلومني احنا ما نقولها للمعارف والناس السطحيه 
          وانتم توكم معارف 
          هو ليش كذا مندفع 
          
          قام اياد فجاه وسحبني الغرفه 
          قال انت صاحي ولا مجنون معاااااااارف ايش 
          اقولك نام معاي 
          
          ورفع صوته فضحنا 
          
          قلت طيب وط صوتك 
          
          بعدها جاء صمت جلسنا نناظر بعض ومن الصدمه صفقته 
          لان استوعبت وش كان قصده
          
          
          ليتني قعدت على تفكير النوم اللي هو النعاس الموته الصغرى ولا فهمت ليتني❤️

ياخي سبحان الله ربي بيرزقك من حيث لا تحتسب 
          
          تخيلوا آخر مره عطاني نايف فلوس كان رمضان 2025 
          وكان مبلغ 15 الف معاي 
          هو عطاني 13 وانا من قبل معاي ألفين 
          على العموم من عقبها ما جاني ولا ريال 
          وكنت عارف من يوم شفته عطاني كذا مبلغ يعني بيسحب علي 
          هو كذا يعطيني مبلغ ويسحب علي لين ربي يفرجها 
          
          إلى يومكم هذا معاد عطاني شيء وكنت كيف عايش ؟ 
          على المكافأة تخيلوا ! 
          طول الفتره ذي لمحت بس مره وحده اني ابي فلوس ولا عطاني 
          ماتشوفوني انجنيت يوم ضاعت كارتير برمضان ؟ لان حتى ساعه جديده هالسنه ماشريت 
          قسم بالله بس ثوب 
          بنجن 
          لو نايف فقير بقول عادي امر الله 
          لكن عنده 
          على العموم عديت فوق السنه 
          وكان بحسابي اقل من 100 ريال 
          
          لكن قلت طفح الكيل يافهد 
           دوبنا ما طلعنا من أبريل ووراي لنهايه شهر 5 
          وش اسوي بعمري ؟ 
          وجلست أتذكر أنا كيف دبرت نفسي العام بس ماتذكرت 
          أنا عندي ناس لو اطلبهم مايقولون لا بس أنا ما احب 
          
          رحت لنايف وطلبته تدرون وش صار
          اخ  
          حولي مبلغ محترم 
          ما امداني فرحت واشوى اني ما صرفته 
          قال ذا راتب السواق والعماله عطهم 
          أنا مشغول 
          
          
          طيب احسبني معاهم عامل سواق اي شيء ؟ 
          هو وده ازن عليه 
          بس أنا ما ازن ولا اترجاه 
          اطلبه بشكل عابر 
          إذا عطاني اهلًا وسهلًا إذا لا خلاص 
          
          اذكر من يومي بالمدرسه حتى فسحه ما اطلب 
          اول ما عشت معاه كنت دوبي جاي من بيت جدي ابو امي عند خوالي وهناك تعاملهم ماش 
          فـ جيت عند نايف وانا متردد اطلب شيء 
          انتظره يعطيني من نفسه عشان ما احط نفسي بموقف شين 
          وهو فهمها اني يعنني ما اشوفك شيء ولا راح أطلبك 
          
          وانا وقتها اشوفه مثلهم وانه متعمد يسوي لي سكب 
          
          وكلن ماشي على اللي براسه 
          وصححنا المفاهيم متاخر بعد ما انعطبت العلاقه 
          
          حولت رواتبهم ورحت انام 
          
          اليوم صحيت جايني مبلغ  اول عقد ايجار 
          وباسل محول لي فلوس بدون سبب ولا طلبته 
          
          طبعًا فرحت للعماره
          ولكن باسل لا 
          يعني ليش يعطيني كذا 
          
          قال هديه تفوقك
          قلت باقي ماخلص الترم
          قال خلصت اول شوط ذي هديه ولو رجعتها بزعل
          
          رجعت للعماره وقمت ومسكت خط لانها بعيد ورحت اشيك
          لو شديت حيلي يمكن راح ااثثها له 
          
          الله يسعده عامل العزبه هو اللي اشرف على العماره واهتم فيها لين جو ناس يستأجرون اليوم 
          كنت ناسيها ومهملها ومكانها بعيد في خلا 
          يوم جيت اليوم اشوف المكان بدأ يصير مأهول وحلو وامطار ورايق مره الموقع وجنبه محطه 
           قبل كم سنه كنت اشوف المكان خايس

ذاكرت من الصباح عشان الحق اخلص 
          واقدر افضى لباسل
          ولما قررت اتصل عليه طلع عنده مصيبه بالمركز وقضيه زفت لان احد المشاركين فيها عضو بالشرطة 
          
          عاد علمني الهرجه باختصار وقال انه استأذنهم عشان يرد علي 
          الحُب افعااااال
          
          قلت لا بس كنت بسمع صوتك وأبيك تدعي لي عندي اختبار قال لا توصي
          
          
           تعنيت وفضيت نفسي واخرتها هو اللي انشغل
          ويوم شفته مشغول صرفته اني بس بسمع صوته وكذا يعنني 
          وانا كذاب وهو يدري اني كذاب وسلك لي 
          احب التفاهم بينا ❤️
          
          يلا بسم اطلب عشاء واتكي اتابع بدون هدف ثم انام 
          
          يااااه يالوناسه ❤️ من قال حياه الأعزب شينه

قابلت صاحب اياد الجديد مواليد 2007 
          طبعًا ماراح اتخطى انه دوبه خريج ثانوي 
          كل ما جبت طاريه قلت مواليد 2007 
          على العموم 
          جاب اخوه معاه 
           بنجن بنجن احسبه يوم كتب لإياد عادي اجيب اخوي 
          توقعت اخوه بزر وكذا يعني مظطر يجيبه 
          كثير يجيبون اخوانهم الصغار 
          لكن هو جاب اخوه الكبير!!!! وتحسبون بس كذا ؟ لا لاااااا
          اخوه مشهور بالتيك
          تعرفون ذوليك اللي يصورون على اغاني يتميلحون 
          هو واحد منهم ويسوي فلوقات مع اخوياه يعنني 
          وعايش بالرياض ولابس تقويم 
          ماقدر اوضح اكثر حفاظًا على الخصوصية 
          المهم انصدمت الولد من قبيله غير متوقعه 
          مو حجازي خير شر 
          ماقدر اقولها عشان ماتعرفون من هو اخوه 
          هو مو شيء غريب دامه سعودي 
          بس تعرفون ما جاء ببالي فهمتوا ؟ 
          
          بس للحين مافهمت اخوه جاي ليش 
          المهم زين انه جابه 
          الولد سامج 
          قعدت اسولف مع اخوه 
          
          بس برضو مافهمت ليش هو في ديرتنا واخوه بالرياض 
          
          وشكل عايلتهم كلها بالرياض إلا هو 
          الصدق ما سالت بس اتوقع يعني 
          
          المهم كان لقاء بايخ الحسنه الوحيده اخوه 
          مزيون وسوالفه حلوه 
          وش يبي الواحد اكثر يالله من فضلك 
          قلت لو جيت اي مكان معاه واخوه فيه نادني 
          غيره لا 
          قال على اساس بناديك لو غير هالشيء مثلًا وش ابي فيك 
          قلت حسبي الله على طول 
          قال عاد من لقى أحبابه نسى اصحابه 
          
          
           خل يكلمني بس وبقول مشغول مع باسل مو فاضي لك

ياااه وصلنا مرحله ناكل ثوم ❤️❤️❤️
          هو مو شيء محرومين منه 
          ولكن نتحاشاه 
          لان شدراني متى ابوسه ولا يبوسني 
          لازم اهتمام طول الوقت 
          
          لكن خلاص لمتى

ما امزح من العصر كذا قابلت اياد 
          ماوقف سوالفنا إلا اذان المغرب 
          ولا كنا ناوين نكمل 
          
          والان صلينا واستراحه محارب لان فجاه بطني اوجعني
          وضلوعي مدري كيف اشرح 
          احس جسمي مهلوك 
          وهو راح يجيب مسكن 
          يقول أنا اسميه مسكن خالي 
          هو اللي علمنا عليه احنا وامي وخالاتي وخوالي وكلنا ناخذه إذا حسينا بالم 
          
          طبعًا الحيوان قلت اخ بطني واحس كل شيء يوجعني حتى ظهري
          قال كيف آخر وضعيه لكم وكم الوقت
          
          حبيبي اياد ممكن نخفف ميانه ؟ مستحيل