HalaAli939640
جنت ليّه الاهل انت وجنتلي البيت
وبس انت الجنت بالدنيا عاجبني
وجنت انت التذوّب قلبي لو عدّيت
وأطيحن لو عيونك مرّه تنظرني
جم مرّه الوكت يجرحني متأذيت
بس زعلك عليه الجان يألمني
بشر غيرك أبد بكليبي ما حطيّت
وكل واحد بعد بالدنيا ما همني
جنت بعيني ليلى وجنت جوليت
وجنت آنه قيس وروميو بذنّي
وصرت كبالي عبله ووالله لو مرّيت
اصيرن عنتره وابن امه اليكظني
شجاك تغيرت وبروحي ما خليت
بس حسره ودمع وجروح أذتني
وشجاك تغيّرت صدكني ما ظنيت
تنساني بسهوله وتبتعد عني
أشتريت محبّتك بالغالي كلّي شلون
فلس ونص محبتك هسه باعتني
يا ذنب الجنيته وكلي انه شسويت
حتى انت بعذابي لوحدي تتركني
جنت آنه الحبيب الما يزيحه الكون
واحد هسّه زاحه شلون فهمني
تمشي كبالي تضحك منشرح وياه
ما عندك قصد كل قصدك تغثني
مو صوجك ابد لا بيه كل الصوج
قلبي بهل المواقف هوّه اليحطني
صح آنه انجرح بس الجرح استاذ
قاسي بشرحه لكن درسه علمني
تعلمت ابقى صادق بالعشك للدوم
ومنه اصنع تجارب خبره تكسبني
روح خطيه انت ولا تظن بيوم
تعرف شنهو حُب وتمسي متهنّي
ما تكدر تحب تايه تظل حيران
وقلبك ما يدك فد يوم صدكنّي
وما تعرف بعد محبوب مثلي يصير
واذا واحد يصح لك مثلي عاتبني