doniaRmadn
صمت للحظات، ثم تابع وهو ينظر إليها بحب:
— أنا أول ما شفت المكان ده، شفتك إنتِ في الأول، وحسيت بروحك فيه... اشتريته من كام يوم، بس مكنش في نيتي أعرفك عنه حاجة غير لما أتأكد من مشاعرك نحيتي... مكنتش عايز أضغط عليكِ زيادة، عشان أنا لسه مش واثق إذا كنتِ حاسة من ناحيتي بحاجة ولا لأ.
ابتلع ريقه، ثم رفع يده وتحسس وجهها بنعومة، وقال بنظرة تفيض بالحب:
— أنا من أول مرة شفتك فيها وأنا وقعت فيكِ يا هناء... إنتِ الوحيدة اللي مشفتش فيكِ شهوة... أنا قبل كده، أي واحدة كانت بتدخل حياتي، عمري ما فكرت فيها غير إننا هنقضي وقت لطيف وبس... لكن إنتِ مختلفة... أنا شايفك بتكمليني... إنتِ الوحيدة اللي طلعتي الشخص الكويس اللي جوايا.
ظلت هناء تنظر إليه بعينين امتلأتا بالدموع من شدة الفرح... لم تجد الكلمات المناسبة لترد بها على ذلك الكلام الذي خرج من شفتيه، وانساب إلى قلبها كالحب، ليجرف معه كل شيء كان موجودًا قبله.
نظر إليها ياسين باستغراب، وقال:
— إنتِ هتعيطي؟
ثم تغيرت ملامحه إلى الخوف، وأكمل:
— بتعيطي ليه... أنا ضغط عليكِ، صح؟
هزت هناء رأسها بالنفي، والدموع تنساب من عينيها، ثم همست وهي تقترب منه لاحتضانه بلهفة:
— لا.
ثم احتضنته بقوة، وقالت:
— ده أنا عمري ما فرحت في حياتي كده يا ياسين.
تنهد هو براحة، ثم أغمض عينيه وبادلها العناق بقوة، وقال:
— وأنا مش عايز غير فرحتك دي والله يا قلب ياسين.
فصلت هناء العناق، فنظر إليها ياسين برجاء يشوبه الحب، وقال:
— تتجوزيني يا هناء... أنا أول مرة طلبتك من باباكِ عشان خفت ترفضيني، كنت عايز فرصة أحببك فيا... بس دلوقتي لازم أسألك... إنتِ هتقبلي تبقى معايا ولا لأ؟
ثم تابع وهو ينظر إليها بثبات:
— أنا راضي بكلامك اللي قولتيه من شوية، مش عايز أكتر منه دلوقتي... وأنا عارف، مع الوقت، هخليكِ تحبيني زي ما أنا حبيتك.
تحسست هناء وجنته بحنان، وهمست وهي تتطلع إلى عينيه:
— أنا مش لسه هحبك يا ياسين... أنا حبيتك، ومتأكدة إني عمري ما حبيت حد قبلك... إنت كنت صح.
https://www.wattpad.com/story/405913906?utm_source=android&utm_medium=whatsapp&utm_content=share_writing&wp_page=create&wp_uname=fatmataha22
