jimin_s-_-s
پەنجەرەکە کراوەیە بەڵام باکە هێندە ساردە تەنانەت گەرمیی هەناسەشم دەبەستێت
سەیرە لێرە هیچ شتێک ناجوڵێت تەنها چراکەی سەر مێزەکە نەبێت کە لەگەڵ سێبەرەکاندا ڕادەسقێت
من لێرەم لە ناوەڕاستی ژوورێکدا کە دیوارەکانی هێواش هێواش لێم نزیک دەبنەوە
بەڵام من هاوار ناکەم چونکە دەمێکە فێربووم هاوار دەنگێکی بێهودەیە لە جیهانێکی کەڕدا
چرای سەر مێزەکە کەمکەمە دەمرێت و منیش چاو ناپۆشم
با تاریکییەکە بێت و ئەم جەستە ماندووە لە خۆیدا نوقم بکات
پێنووسەکەم لە نێوان پەنجە سڕبووەکانمدا قورس بووە وەک ئەوەی بیەوێت بڵێت چیتر هیچ شتێک شایەنی نووسین نییە
ئاوێنە کۆنەکە لە دوورەوە سەیری هێڵەکانی دەموچاوم دەکات
ئەویش ماندووە لە نیشاندانی ڕوخسارێک کە ڕۆحی تێدا نەماوە
سەیر دەکەم مرۆڤەکان لە دەرەوە هێشتا ڕادەکەن بەدوای هیوایەکی ساختەدا وێڵن
پێکەنینی ئەوان وەک ژاوەژاوێکی بێ مانا دێتە بەر گوێم
من لێرە لەم گۆشە تاریکەدا ئاشتییەکم دۆزیوەتەوە کە لە هیچ کوێی تر نییە
ئاشتییەک لە ڕەنگی خۆڵەمێش لە تامی دۆڕان لە بێدەنگیی قبوڵکردن
با دەرگاکە قفڵ بێت و با کەس لەم تەنیاییە قووڵەم نەدات
من چیتر چاوەڕێی بەیانییەک ناکەم کە ڕووناکی بهێنێت
شەو لێرە درێژ دەبێتەوە و منیش بە بێدەنگی تێکەڵی دەبم
ئەمە ئەو جێگەیەیە کە تێیدا چیتر هیچ ئازارێک نامجوڵێنێت
من بە تەواوی لێرەم و بە تەواوییش ون بووم
jimin_s-_-s
کاتژمێرە دیوارەکە چیتر چرکە نادات ئەویش تێگەیشتووە کە لێرە پێوانەکردنی کات بێمانایە
من لە نێوان چوار دیوارێکدا دانیشتووم کە ڕەنگەکانیان هێواش هێواش بەرەو کاڵبوونەوە دەچن
وەک ئەوەی ژوورەکەش بیەوێت ناسنامەی خۆی ون بکات ڕێک وەک من
دەست دەبەم بۆ کۆنترین برینی ناخم بەڵام هیچ ئازارێک هەست پێناکەم
ئەمە ترسناکترین قۆناغی تەنیاییە کاتێک تەنانەت ئازارەکانیشت سڕ دەبن و چیتر ناتوانن بتگریێنن
من بوومەتە تەماشاکەرێکی بێ لایەن بۆ خاپووربوونی خۆم
سەیری ڕووخانی باڵەخانەی ڕۆحم دەکەم و تەنانەت سەرێکیش ڕاناوەشێنم
پێڵاوی گەشتیارەکان لە دەرەوە دەنگی دێت ئەوان هەمیشە بەرەو شوێنێک دەڕۆن
بەڵام من لەو جێگەیەم کە پێی دەڵێن کۆتایی ڕێگاکە
لێرە نە جێگەیەک هەیە بۆی بڕۆیت و نە هۆکارێک هەیە بۆ گەڕانەوە
من نیشتەجێی هەمیشەیی ئەم وێرانەیەم شوێنێک کە تێیدا تەنانەت یادگارییەکانیش چیتر دەنگیان نییە
با نائومێدی بە تەواوی باڵی بەسەر ئەم ژوورەدا بکێشێت من پێشوازی لێدەکەم
ئەم بێهیواییە قووڵە وەک زەریایەکی ڕەش و ئارام وایە
ئەگەرچی تێیدا نوقم دەبیت و دەخنکێیت بەڵام لانیکەم هیچ شەپۆلێک نییە کە لە دەروونت بدات و ئارامیت لێ تێکبدات
من لێرە پاڵکەوتووم لەژێر قورسیی ئەم بێدەنگییەدا و ڕێگە دەدەم خۆڵەمێشی کات بە تەواوی دامپۆشێت
jimin_s-_-s
.
پیاسەکردن لە ناو ئەم تاریکییەدا پێویستی بە قاچ نییە من بە بیرکردنەوەکانم لە ناویدا نوقم دەبم
سەیر دەکەم تەنانەت دڵۆپە بارانەکانی سەر شووشەی پەنجەرەکەش شۆڕ دەبنەوە وەک ئەوەی ماندوو بن لە فڕین
هەموو شتێک مەیلی کەوتنی هەیە منیش لارییم نییە لەم بەربوونەوە بێدەنگە
زەوی کێشکردنێکی سەیر دەکات بۆ جەستەیەک کە چیتر هێزی ڕاوەستانی نەماوە
کتێبەکان لەسەر ڕەفەکە تۆزیان لێ نیشتووە لاپەڕەکانیان وشک بوونەتەوە وەک لێوەکانی من
ئەوانیش چیرۆکی مرۆڤگەلێک دەگێڕنەوە کە ڕۆژێک پێیان وابوو دەتوانن جیهان بگۆڕن
بەڵام لە کۆتاییدا هەموو دێڕەکان بە یەک خاڵی ڕەش کۆتاییان دێت
منیش ئەو خاڵە ڕەشەم کە لە کۆتایی ڕستەیەکی درێژ و ماندووکەردا دانیشتووە
گوێم لە دەنگی باکەیە لە دەرەوە هاوار دەکات و لە دەرگاکە دەدات
بەڵام من وەک بەردێکی سارد نە دەلەرزم و نە دەرگای بۆ دەکەمەوە
با لە دەرەوە جەنگ بێت با شارەکان بڕوخێن با هیوای مرۆڤەکان بسووتێت
لێرە لەم حوجرە بێدەنگەدا کات هێندە خاوە تەنانەت مەرگیش پەلەی نییە بۆ هاتن
من چیتر سکاڵا لەم تەنیاییە ناکەم چونکە سکاڵاکردن جۆرێکە لە چاوەڕوانی
منیش چاوەڕوانییەکم لە ناخدا نەهێشتووەتەوە تا کاتی پێ بکوژم
ئەم بێدەنگییە قورسە ئەم ڕەنگە خۆڵەمێشییەی چواردەورم باشترین دیارییەکە کە جیهان پێشکەشی کردبێتم
من لەم گۆڕستانە بچووکەی ژوورەکەمدا پاشایەکی بێبەرگ و بێدەسەڵاتم کە تەنها فەرمانڕوایی بەسەر سێبەرەکانی خۆیدا دەکات
