Marmora0017

بيقولولك لو مريت ب ناس وحشة في حياتك اكيد ربنا شايل ليك العوض الاحسن في المستقبل
          بس مقالوش ليك انك وقتها هتبقى فقدت الثقه في كل الناس وحتى العوض الحلو دا انت هتبقى توكسيك معاه ومش هتبقى قادر تصدق اصلا ان فعلاً في شخص ممكن يحبك من قلبه وشايفك حلو في كل حالاتك ويستحمل عيوبك !؟
          مش هتبقى مصدق ان في شخص ممكن تحكيله اسرارك ومش يفضحك بيها وتحكيله كل ألامك والماضي اللي كسرك ومش يعايرك بيها وتعرفه كل نقاط ضعفك ومش يوجعك بيها
          مش هتبقى مصدق انه يبقى ملجألك في وقت حزنك ولما كل الدنيا تقفل في وشك يبقى حضنه هو بيتك
          مش هتبقى مصدق ان في شخص مستعد يتعب ويضحي بكل الناس وكل حاجه في حياته عشان بس يفضل جنبك ومعاك العمر كله
          مش هتبقى مصدق ان في حد متقبل وجودك زي ما انت ومش عاوز منك تبذل اي مجهود في تغيير نفسك ومكتفي بيك
          يعني ايه حد وجوده بالنسبالك أمان؟ هتعرف ازاي تحس بالامان مع شخص غريب عنك وانت كل حياتك خوف وقلق من قبله ،هتفضل طول عمرك خايف وشاكك انه هيجيله يوم ويبقى زيه زي اللي فاتوا في حياتك زي صحابك واخواتك واهلك وكل اللي انت حبيتهم وخذلوك ..
          يعني ايه حد حابب يسمعك حتى في اتفه المواضيع وحابب يشاركك كل اهتمامتك بدون ما يزهق !
          متصدقش كلامهم كل دا كدب ومش حقيقي ومفيش الشخص دا وعمره ما هيجي
          اصل كل دا مجرد وهم في الافلام والمسلسلات ازاي يعني هيتحول لواقع دا مستحيل!!!؟

"صمتٌ، وبرودٌ، وانعزال..هكذا يُحمى ما تبقى من الروح"
          قالولي هتبقي أقوى مع كل مشكله وصدمة بتتعرضي ليها بس مقالوش اني هبقى باردة اكتر واكتر وحنيتي هتتحول لقسوة ملهاش حدود وقدرة التخلي والتخطي عندي هتبقى اول حل بلجأله و بكل بسهولة بعمل سكيب لأهم ناس في حياتي عادي مبقاش فارق معايا اي حد واي حاجه وثقتي هتنعدم في الكل وهحب الانعزال والوحدة جداً وهكره التجمعات وهكره الخروج عموماً ..بس بردو النسخه دي احلى بكتير من النسخه القديمه مبقتش بستغرب او بندهش من تحول انسان كويس لإنسان وحش ولا انه اصلا كان وحش بس ممثل شاطر

بيقولوا البنوته وهي صغيرة سقف طموحاتها ومتطلباتها من شريك حياتها بتبقى بسيطه وعايزه تتجوز عشان تلبس فستان وتفرح وسط اهلها وصحابها وسهل اي حد يبان كويس يكسب قلبها وبينضحك عليها بسرعه عشان كدا فرص جوازك وانتي صغيرة اكتر من وانتي كبيرة
          اما بقى وانتي كبيرة بقى عندك طموحات اكبر واكتر ومتطلباتك بقت مختلفة تماماً ومش مجرد عايزه واحد كويس ومحترم لا بقيتي تركزي في ادق التفاصيل وصعب حد يكسب قلبك بسهوله وصعب حد يخدعك وغالباً بقيتي شايفة ان الجواز دا اخر طموحاتك اصلا وبقى بالنسبالك مش هدف ولا انجاز انما مجرد اضافة حلوة لحياتك وبداية مغامرات جديدة عليكي يعني مش بداية حياتك ولا نهاية حياتك ، مبقتيش عايزه تتجوزي عشان يبقى اسمك متجوزه زي صحابك او بنت عمتك او بنت اخت مرات خالك او خايفة تعنسي ومش فارق معاكي مين هيلبس بدلة العريس لا بقيتي عايزه تتجوزي عشان عايزه تكملي حياتك مع الشخص دا وبس بدون اي اسباب تانيه ضاغطه عليكي...
          حاسة ان فعلاً ان البنت تتجوز وهي كبيرة احسن بكتير من لما تتجوز وهي لسه في مرحلة المراهقة

-مبقاش فارق معايا غير راحتي
          =والعشرة؟
          -يعني العشرة تهون عليهم عادي وانا مفروض عليا اصونها؟!
          =متبقاش بياع كدا مش حته موقف اللي يخليك تبعد 
          -انا بياع !! لا دا انا عبيط ومغفل وبصراحه اللي بعمله دا كان لازم يحصل من زمان ،انا كدا كدا مكنتش شبهم ولا هما شبهي وجيت على نفسي كتير عشان خاطرهم واديتهم من وقتي وطاقتي ونفسيتي باظت بسببهم
          =دا انت شايل جواك ومعبي بقى ،اومال مبتحكيش وتعاتب وتحل مشاكلك وزعلك معاهم ليه
          -جربت كتير بس صعب تعاتب حد مبيعترفش بغلطه ،حد بيقلب عليك كل الكلام وبعد ما كنت المفروض بتعاتبه عشان زعلان منه بقيت انت اللي مطلوب منك تعتذر وتترجاه يسامحك 
          =فـقررت تبعد من سكات احسنلك وتريح دماغك !
          -ايوه خلاص بقى وبعدين هعاتب على ايه ولا ايه ولا ايه في حاجات ممكن اكون مسامح فيها بس مش قادر ولا عارف انساها وهفضل افتكرها كل ما اشوفهم واكرههم غصب عني اكتر واكتر ،انا عايز ابدأ من جديد حياة تانية اكون فيها مع نفسي مش عايز ولا اهل ولا قرايب ولا صحاب هتكون معاملتي سطحية جداً مع كله 
          =مش صح خالص علفكرة لما تكون مقطوع من شجرة كدا وقت ما تحتاج حد جنبك متلاقيش
          -طب ايه رأيك انهم لما كانوا في حياتي بردو مكنتش بلاقي حد جنبي وقت زعلي معدتش فارقة بقى
          =ازاي تعيش لوحدك من غير ما يكون عندك حد تحكيله همك وتحكيله اسرارك وتشاركه تفاصيلك 
          -اسراري؟! تصدق كنت فاكر فعلاً انها هتبقى اسرار لحد ما قولتلهم وآمنتهم عليها ولقيتهم بيفضحوني ويحكوها للغريب قبل القريب ويتريقوا عليا
          =مش عارف اقولك ايه بصراحه بس مش شرط عشان كذا حد كنت تعرفهم مكنوش كويسين يبقى كل الناس كدا ..ربنا هيعوضك عنهم بالاحسن منهم
          -لا شكرا مش عاوز ،انا كدا مرتاح وزي الفل
          =مرتاح ايه بس دا انت مكتئب خالص
          -ياعم لا كويس والله في احسن حال الحمدلله

-تعرفي يا حور
          =ايه يا حبيبي
          -اوقات كتير بفكر مع نفسي وبقول ياريتني ما كلمت اي بنت قبلك ولا ضيعت معاهم وقتي ومشاعري ياريتني صبرت عشان لما الاقيكي مكونش فاقد الشغف بالشكل دا
          =مكنتش هتلاقيني
          -ازاي
          =كل تفصيلة بتحصل في الدنيا دي ضمن ترتيبات ربنا ..جرب ارجع بالزمن كدا وغير حدث صغنن قد كدا هتلاقي الحاضر والمستقبل اختلفوا تماماً ..يعني لو مكنتش عرفتهم مكنتش هتحضر فرح الاكس على اساس انها كانت صاحبتك ومكنتش هتدلق عليا البيبسي بالغلط ومكنتش ههزأك وفي النهاية مكنتش هبقى قاعده معاك دلوقتي بنتفرج على فيلم في بيتنا
          -فهمتك بس انا عندي وجهه نظر مختلفة 
          =ايه هي
          -ان مهما اتغيرت الاحداث ومهما اتغيرت الازمنة ومهما عرفت ناس وحتى لو كنت خطبت او اتجوزت واحده غيرك بردو مكتوبلي اني ابقى معاكي في يوم من الايام ،يعني لو مكنتش عرفتهم انتي بردو نصيبي بس هتختلف الترتيبات لوصولي ليكي مش اكتر 
          =اه دا فيلم تؤام روحي مش كدا ؟!
          -بالظبط
          =مش عارفة احدد هل دا فعلاً صح ولا لأ الموضوع معقد بالنسبالي واكبر مني بصراحه بس الاكيد ان ربنا وحده اللي يعلم بالترتيبات دي
          -معاكي حق اهي كلها عبارة عن فرضيات مننا سيبك من الكلام دا انا اسف دوشتك ولخبطتك معايا 
          =اسف على ايه بس ياعم سيف انا بحب اسمعك ونقعد نفكر سوا وكدا
          -طب حيث كدا قومي معايا نعمل عشا واكملك في المطبخ بقى باقي الحورات اللي بفكر فيها 
          =اشطا يلا بينا

-بس بس
          =؟!
          -بس بس
          =انا؟
          -ايوه هو في غيرك!
          =استغربت بصراحه اصل ولا مره بصيتيلي
          -الحوجة صعبة بقى
          =ايه؟
          -مش انت كنت اتقدمتلي
          =ايوه مرتين واترفضت وقالولي انك شايفة مستقبلك الدراسي اهم في الفترة دي
          -لا الكلام دا كان في بداية الترم
          =يعني ايه
          -جرب اتقدملي تالت الفترة دي وهوافق عادي
          =اشمعنا ..اها فهمت انتي شكلك بدأتي امتحانات صح؟
          -اه 
          =يعني اكتشفتي دلوقتي ان الست مكانها بيت جوزها بلا تعليم بلا هم صح؟
          -بالظبط عليك نور
          =ايه يضمنلي بقى انك مش هتسيبيني بعد ما تخلصي امتحاناتك!
          -احم اي دا عرفت ازاي
          =نعم ياختي!!
          -بهزر لا لا متقلقش هسيبك في الترم الجاي ان شاء الله
          =وترجعيلي في ايام الامتحانات؟
          -بالظبط
          =طب ممكن تقوليلي لازمته ايه ما انا كدا كدا لما اتجوزك مش هوافق انك تشتغلي
          -طب وربنا لو كنت وافقت اصلاً كنت هسيبك
          =اصلاً
          -بص الشهاده مهمه عشان لو احتاجت اني اشتغل بعد ما اتطلق منك او حصل اي ظروف في حياتنا واضطريت اساعدك في مصاريف البيت او لو بعد الشر جالك سكته قلبيه ومُت اقدر وقتها اشتغل واصرف على نفسي 
          =ماشي ياختي

متوافقيش على اي حد لمجرد انه بيحبك 
          ماهو انتي كدا كدا تتحبي لأنك عسولة وقلبك طيب وروحك حلوة واسلوبك لطيف ومهذب
          وعموماً طموح الراجل في فتاة احلامه مبتكونش اوفر بزياده ولا كتير زي ما احنا البنات بنبقى عايزين كل حاجه وعكسها
          عيزاه كيوت ولطيف وفي نفس الوقت شرس وقوي
          عيزاه طويل ومعضل وفي نفس الوقت ميكونش بيج رامي لا يبقى في المعقول وطبيعي
          عيزاه هادي وعنده طاقة صبر وفي نفس الوقت عصبي حبتين علشان بحب كل ما استفزه يتعصب الشعور دا لذيذ
          عيزاه مؤدب بس في نفس الوقت باد بوي معايا
          عيزاه مش من النوع المتحكم بزياده واللي يخنقني ويمنعني عن اهلي وصحابي والجو دا بس يكون هو اللي مسيطر بردو 
          عيزاه اوبن مايند بس في نفس الوقت غيور 
          كلنا عايزين التشكيلة دي وزياده كمان 
          كدا كدا اكيد مش هنلاقي حد كامل فيه كل الصفات اللي عايزينها لكن بلاش نتنازل اوي ونرضى بحد اقل من طموحتنا لمجرد انه بيحبنا 
          لازم نفكر بالعقل شوية مش كل حاجه نمشي ورا مشاعرنا لأنها كدا كدا بتكون مشاعر مؤقته بتختفي مع قلة الاهتمام ومع الصدمات 

انتي مش "رغاية" انتي بس مش مع الشخص الصح
          انتي مش "فضولية" انتي بس مش مع الشخص الصح
          انتي مش "نكدية" انتي بس مش مع الشخص الصح
          انتي مش "عيوطة" انتي بس مش مع الشخص الصح
          انتي مش "عصبية" انتي بس مش مع الشخص الصح
          انتي مش "باردة" انتي بس مش مع الشخص الصح
          انتي مش "مسترجلة" انتي بس مش مع الشخص الصح
          انتي مش "خوافة" انتي بس مش مع الشخص الصح
          قبل ما تفكري تحاولي تحسني من نفسك علشانه شوفي تصرفاته وشوفي هو ازاي و ليه اصلا بينتقدك ..في كل الحالات هتكتشفي لما تبعدي عنه ويقابلك الشخص الصح اللي مش بيعيب فيكي اصل لو بيحبك بجد غصب عنه بيشوفك ملاك حتى لو غلطانه يقولك لا كلهم غلط وانتي صح الصح وتوب التوب والكنتلوب كمان ،هتفهمي وقتها ان اللي كنتي معاه دا كان شبشب 

-انا زهقت 
          =......
          -انا بكلمك علفكرة !
          =......
          -هو انت ازاي كدا بجد انا قربت انسى شكل حياتي الطبيعية واهلي وصحابي و...
          =عايزه مني ايه يعني مش فاهم
          -طلقني يا نوح طلقني بقى انا بجد اتخنقت 
          =على اساس اني مبسوط اوي بوجودك ! انا مخنوق اكتر منك ومستحمل الوضع دا بالعافيه 
          -لا ما انا مش هقعد معاك اكتر من كدا 
          =مش بإرادتك وبعدين انتي بتتكلمي كأني ماسك فيكي مثلا او اني السبب في الوضع اللي احنا فيه 
          -اومال مين السبب هو مين اللي قال نتفق الاتفاق المنيل دا ،مش انت ؟!!!
          =مكنش في حل غيره لو كان قدامك اي حلول تانيه ما كنتي تقولي ياختي ولا شاطرة تفضلي تشتكي وبس
          -اشتكي براحتي انت هتتحكم فيا ولا ايه 
          =ياستي اعملي اللي تعمليه بس متقرفنيش واتفضلي اقعدي في اي اوضه بعيد عني ما الشقة واسعه اهي علطول قاعده جنبي ليه!
          -المكان غريب عني ف طبيعي اكون خايفة شوية 
          =مش فاهم معلش مكان ايه اللي غريب وخايفة من ايه المفروض تخافي مني اصلا انما اللي بيحصل دا غريب
          -اخاف منك ليه يعني انا اه مش طايقاك بس على الاقل راجل وبتعرف تتصرف في المواقف الصعبة ف دا اللي مطمني مش اكتر
          =تخافي مني علشان انا راجل وانتي ست رغم اني اشك في كدا يعني بس عموماً محسوبة على البشرية انثى وقاعدين لوحدنا في بيت واحد مقفول علينا ف المفروض تتكسفي وتقلقي ولا انتي من نوع متعوده دايماً ولا ايه نظامك ؟!!!
          -انت عبيط ولا ايه ما احنا متجوزين وبعدين قولنا هنبقى الفترة دي زي الاخوات وبنا اتفاق 
          =متقوليش كلمه متجوزين بس علشان مش قادر اصدق اني اتجوزتك اصلا
          -اه عارفة انك مكنتش تحلم توصلي
          =لا انا اقصد انك مش my type 
          -نعم ياخويا!!
          =انا مثلا بحب البنات اللي بشرتهم سمرا شوية وانتي بيضا وبحب البنات اللي شعرهم غامق وناعم وانتي شعرك مش مفهوم شبه سلك المواعين وبحب ال.....
          -هششش اسكت يابني انت هتحكيلي مواصفات فتاة احلامك كلها ! ..لا بقولك ايه اللي موجود تحمد ربنا عليه وتنسى الاحلام بتاعتك دي نهائي
          =وانتي مالك ياستي انا حر وبعدين هو ايه اللي موجود هو انتي مطولة معايا ؟!!!
          -الوقت اللي هتنيل اقعده معاك لازم تحترم وجودي 
          =بت انتي متقرفنيش احنا ماضيين لبعض اننا هنبقى اخوات وبس ف متظيطيش فيها بقى وتعمليلي فيها زوجه بجد

وبعدين يا دنيا في الهم اللي مبيخلصش دا
          ألغوا رحلتي التعليمية انا خلاص اكتفيت لحد كدا اخر سنتين جامعه دول مش مهمين مش لازم اكمل انا ولا حابة اكون استرونج ولا اندبندت ولا زفت وومن حتى 
          انا عايزه انااام وبس