Men_naRamadan
*ازيكم يا بنات *
*أتمنى تكونوا بخير دايمًا*
*البوست ده حابة أنشره على كل حساباتي الخاصة بالكتب والروايات ، وتحديدًا مكتبة نور والواتباد*
*وأتمنى تقروه بقلب مفتوح ومن غير تجاهل.*
أنا مش شيخ ، ولا بدّعي إن عندي علم كبير بالدين
بس بحاول ، وبجاهد نفسي ، وربنا المستعان علينا كلنا.
إحنا كبنات ، الإسلام فرض علينا الحجاب والستر ،
مش انتقاصًا مننا ، بالعكس… تكريمًا لينا.
لأننا غاليين ، ولأن الجوهرة الحقيقية مش بتتحط في أي مكان ، ولا تبقى متاحة لكل العيون.
فخليني أسألك بهدوء:
ليه أكون عارفة قيمتي ، وفي نفس الوقت أمشي ورا الموضة حتى لو على حساب ديني؟
يا بنتي اللي لابسة حجاب ونص شعرك باين…
إنتِ جميلة ، والله جميلة من غير ما خصلة شعر تظهر.
إحنا كلنا عارفين إن شعرك ناعم ، ولونه حلو ، وربنا باركك ،
بس ليه نخلي كل طريق نمشي فيه شاهد علينا؟
الحجاب فُرض علشان يغطي الشعر ، مش يبرز جزء منه.
وبرضه موضوع “نص حجاب” في الأفراح…
يعني إيه؟
هو الحجاب بيتقسم؟
نلبس نص طاعة ونسيب نصها؟
الفرح يوم ، لكن رضا ربنا عمره ما كان مؤقت.
والحفاظ على الحجاب مش معناه حرمان ،
معناه اختيار واعي إننا نرضي ربنا قبل أي حاجة.
نيجي لموضوع الرقبة…
الرقبة حكمها من حكم الشعر ،
مش حاجة ثانوية ولا تفصيلة بسيطة.
والحجاب المفروض يبدأ من الذقن ،
مش يسيب مساحات مفتوحة كأنها “شبابيك”.
وبردو اللي مغطية شعرها لكن مظهرة الودان والحلق…
استفدنا إيه؟
الحجاب مش مجرد قماشة ،
هو مفهوم ، وسترة ، وحدود.
يا بنات إحنا غاليين في الإسلام ،
بلاش نرخص نفسنا بإيدينا.
الإسلام الدين الوحيد اللي حفظ للمرأة كرامتها ،
وخلّى سترها قوة مش ضعف.
وأحب أقول في الآخر:
أنا مش منتقبة ولا مختمرة ،
بس محجبة ، وبحاول ألتزم ، وبغلط وبقوم ،
والكلام ده قبل ما يكون ليكم هو موجه لنفسي.
ربنا يهدينا جميعًا لما يحبه ويرضاه
ناقشوني يا بنات عادي
https://57125854068603.sarhne.com
