ManarMar8
#العشق_المتمرد "عندما يزهر الليمون" #جمان_فريد الجزء122القسم الأخير .. ماشيات بطريقهم للسيارة ويهدرزوا.. دلال:يعني الحفل يوم 20\3 رانيا ابتسمت وقالت:ايه.. شدت دلال يد رانيا:نشوفوك بالفيلو بعد بدلة التخرج يارب.. رانيا بإبتسامه:ع اللي نتمناه يارب.. دلال:اكيد بإذن الله مافيش غيره.. ضحكت رانيا.. وصلوا فالسياره... وقفوا .. لما شافوا باقه ورد ع السيارة.. رانيا:حيي! دلال غمضت عيونها بعصبيه.. بعدين فتحتهم.. خدت الباقه وقعدت تشبحلها بغل.. ومشت بيها طول للمكب.. وين قربت توصله.. عيونها جو ع ضو واقف ع سيارته.. غيرت طريقها طول ومشتله بإندفاع.. وصلت فيه.. "اسمع".. هو كان جاي بيفتح الباب.. وقف.. والتفت.. واتفاجئ ع الآخر.. دلال:خسارة ماكنت نحترم فيك ونقدر فيك..مانحسابش حركات المراهقين هادي تطلع من واحد زيك.. عيب والله عيب...لوحت الباقه عند رجليه وقالت..غير جيت نسيب خالي هانيبال بس كان هدا درت معاك اللازم... ولفت ومشت طول... وخلاته جامد فمكانه من الصدمه.. وصلت فسيارتها وقالت:هدا غير نقربله وحني عيله وحده ومش عارفه شنو..خزييي.. رانيا:الدنيا كلها تتفرج دلال.. دلال:خليهم يتفرجوا بش يعرفوا اني مش راضيه ع القرف اللي ليهم فترة يشوفوا فيه والله اعلم شن ألفوا عليه.. رانيا قعدت تشوفلها كيف منفعله ودموعها معبيات عيونها.. بعدين غيرت عيونها لضو.. لقاته كيف تحرك بسيارته ومشي.. شويه جتهم بنت تجري.. وقفت لما وصلت فيهم وقالت:دلال.. شبحولها.. دلال عرفتها نفسها البنت اللي جابتلها الباقه اللي قبل هادي.. دلال:شني.. البنت:دلال مش هدا اللي عطاني الباقه وقالي وصليهالها واحد تاني شكله مختلف عنه هلبه وعمري ماريته هني.. دلال انصدمت.. رانيا :متأكده؟! البنت:ايه هداكا مازال اطول وهيبة اكثر من هو ... دلال طول التفتت وين ماكان ضو موجود وقالت بصدمه.. "شن درت اني!!؟" ...يتبع...