NAGAM.

          وظل گلبي بأمل ترجَع والاگيك
          وگلت خله بأمل ما احچي خله
          محضرتلك لَحِن ما سامعه العود
          مثل الريح تعزف على الگذله
          وطلع كل الرِسَمته أوهام بأوهام
          ارسم عالظلام بقلم كحله
          ترس راسي الثلج واتأمل تعود
          وبعد ماظل وقت وانطيك مُهله
          بدلةة عرسي أمس خلصت تفصال
          من شيب الزلف فصلت بدله
          وبعد ذاك انتظاري وحب السنين
          ماريدك تجي لأحلامي فارس
          وصلي الموت عاد احضن التشييع
          تره بدونك يظل يكسر الواهس 
          وأظن حقي.. السفينه تموت بالماي
          وهَم تمشي بجنازتها النوارس. 

          خذني يمك بعد ما ضَل كل عذر لاتعتذر
          ليل عمري وعمرك مخلص بعد مابيه صبر
          خل نلم احلامنه ونرسم صورهن
          گبل لا ياخذهن بدربه الفجر
          خل نلم الباقيات سنيني وسنينك نسويهن عمُر
          وهنه ميكفن عمر
          ونبدي من جده وجديد بواهس سنين الصغر
          ولو وازانه الكبر
          خلي تمشي ايامنه بخطوة العاقل من عثر مره ورجع يمشي حذِر
          خل نعيش الحُب ستر
          خل نظم ارواحنه بيناتنه لا نشتهر
          وافتخر بيهَ ويه روحك وأنه وي روحي أضل بيك افتخر
          
          لـ جبار رشيد.