Nox_rnd

بما إن الواحد فاضي شوية افتكرت موقف مغبر من أيام الكلية وبعيداً عن كلمة مغبر دي عشان محدش يمسك فيها ويقول من مواليد التسعينات مع كامل الاحترام للجيل العظيم ده يعني
          
          ​في فترة كدة من اندفاع الشباب الحماسي لما كنا فاكرين إننا هنغير الكون ونعدل المايل طلعت في دماغي أنا وكام واحد صحابي واخدين اتيتيود الأبطال المنقذين إننا نلف على باقي الجامعات الحكومية بالذات طبعاً كنا مقتنعين بقمة الجهل والسطحية إنهم أصل الانحراف في المجرّة وإننا إحنا المصلحين الاجتماعيين اللي رايحين ننقذ البشرية ونعدل المايل وما ينفعش طبعاً يطلع عيننا في دراستنا لوحدنا في كليتنا فقلنا نوزع البركة والنهضة على باقي الكليات ونعمل فيها شيوخ وعلامة العصر
          
          ​المهم أخدنا في وشنا ونزلنا ومجهزين نفسنا لكل الأسئلة ومحضرين أعمق الإجابات وعاملين فيها فاهمين كل حاجة واليوم ماشي فل الفل والناس بتسمع لنا وانتعشنا بالدور لحد ما طلع لنا طالب كده ذكي وقالي يا كابتن هو مش في حديث بيقول إذا ابتليتم فاستتروا قلت له مظبوط يا سيدي قالي حلو أوي طب لو أنا عملت ذنب أو مصيبة وعايز أتوب منها وأعرف كفارتها أو محتاج مساعدة عشان أبطلها إزاي هحكي لدكتور نفسي أو شيخ من غير ما أكون فضحت نفسي وخرقت موضوع الستر ده
          
          ​ساعتها أنا وقفت متصنم  لأن التناقض ضرب في دماغي فوراً وبصراحة كدة و من غير تحوير بالرغم إني وقتها كنت في آخر سنة بس هو عيب حد يتلخبط أو يحس بتناقض لا طبعاً عادي جداً ما إحنا بشر ومش أولياء صالحين عارفين كل حاجة من أول وهلة والحيرة والتفكير دول مش نقص إيمان خالص بل بالعكس دي دليل إن العقل شغال وبيفكر والقرآن نفسه شرع لنا السؤال لما الحجة تقفل معانا وقال تعالى فاسألوا أهل الذكر إن كنتم لا تعلمون

عشان بس نقفل الباب دا بالضبة والمفتاح وما حدش ييجي يتلكك تعال نوضح إيه هي شروط الشعر العفيف اللي الشرع أجازه وما فيهوش أي شبهة 
          ​أول شرط وهو الأساس اللي ما فيهوش فصال إن الكلام يكون نضيف ومحترم وما فيهوش أي حركات نص كم يعني ما تجيش تقولي عودها وعيونها وقوامها السحر وما أدري إيش وتعيشني في فيلم إغراء ملوش أي ستين لازمة وتدخلنا في تفاصيل وصور خادشة للحياء هي ملهاش أخت تسأل عليها يا فالح الوصف الغزلي الصريح دا بيخرج الكلام من الدائرة العفيفة للدائرة اللي بتسحل المشاعر وتحرك الشهوات ودا طبعًا مرفوض شكلاً وموضوعًا
          ​ثاني شرط إن موضوع القصيدة نفسه يكون له قيمة وهدف محترم ومفيد يعني كلمة حكمة نصيحة حلوة تزهدنا في الدنيا شوية بدل ما إحنا مقضيينها طمع أو حتى وصف لجمال الطبيعة والورود من غير تحوير وإسفاف إنما توصفلي سهرة في خمارة وتعملي فيها أمير الشعراء وتستنى أصفقلك دا يبقى اسم العك العلمي الشعر حسنه حسن وقبيحه قبيح
          ​ثالث شرط إن الشعر ما يحتويش على أي كفر مجاني أو قلة أدب مع ربنا يعني ما تقعدش تنظر وتفلسف وتتذمر على القدر وتعملي فيها الشاعر الفيلسوف المغضوب عليه ولا تمدح في الظلم والباطل والفواحش ولا تقعد تكذب وتألف قصص ومهرجانات ملهاش أي أساس من الصحة
          ​رابع شرط والأخير إن الشعر دا ما يتحولش لإدمان يشغلك عن حياتك اليومية يعني ما تبقاش طول اليوم قاعد على الكنبة غرقان في كتابة وقراءة الشغف والقصائد وناسي صلاتك وعبادتك وأكلك وشربك وعيالك وتيجي تقول أصل أنا بعبر عن مشاعري يا سيدي عبر بس قوم صل الأول
          ​فالموضوع بسيط ومباشر ومش محتاج افتكاسات الكلام اللي يرتقي بالعقل والأخلاق أهلاً بيه وعلى راسي من فوق أما الكلام اللي يخدش الحياء أو يدعو للغفلة ووجع الدماغ دا يترش عليه مية وملح ونخلص منه

هي ليه الأغاني حرام؟ أو مش الأغاني بالمعنى الحرفي، الموسيقى ليه محرمة؟ وفرقت إيه يا فالح؟ لا فرقت يا عمهم! الأغاني أو الكلمات دي -لو مطبقة الشروط الشرعية وهقولها في بوست تاني - هي مجرد شعر، وركز معايا عشان أقولك أدلة إن الشعر مش محرم أصلاً.
          الفرق العظيم اللي بين الكلام والموسيقى هو نفس الفرق بين واحد بيكلمك بالعقل وواحد تاني جاب طبلة وقعد يدق فوق دماغك!
           مسألة الشعر والكلمات
          الكلام دا يا سيدي وسيلة غلابة للتعبير، إن طلع منه خير فتمام وزي الفل، وإن طلع منه عك يبقى قلة أدب ومينفعش. الشرع عمره ما زعل من الشعر العفيف، بل بالعكس السنة مليانة أدلة تحسسك إن الشعر دا كان الـ Voice Note بتاع زمان.
          ​النبي عليه الصلاة والسلام كان بيسمع شعر عادي جداً وقال في الحديث الصريح: إن من الشعر لحكمة.
          وعندك سيدنا حسان بن ثابت رضي الله عنه كان الشاعر الرسمي للنبي، وبيطلع بالقصائد يدق حصون الكفار والنبي يدعيله ويقوله: اهجهم وجبريل معك!
          يعني الصحابة كانوا بيكتبوا شعر وبيرددوه في السفر والعمل ومحدش قالهم بس يا ابني عيب.
          ​ أصل القصة في الموسيقى نفسها
          العلماء لما قالوا الموسيقى محرمة مش عشان الكلمات الحلوة خالص، إنما عشان التكتكة والآلات والمزيكا نفسها!
          فيه أحاديث صريحة النهي فيها واضح زي الحديث اللي بيقول: ليكونن من أمتي أقوام يستحلون الحر والحرير والخمر والمعازف.
          ​طب ليه المعازف بالذات؟
          العلماء قالوا إن نغمات المزيكا بتعمل للقلب عملية سحل ودغدغة للمشاعر بطريقة غير متسيطر عليها!
          بتفصل الإنسان عن الواقع وبتدخله في مود السرحان والغفلة عن ذكر الله وقراءة القرآن، بتديك لذة لحظية تخليك مش طايق تسمع كلام جاد، وعشان كده صعب يجتمع في قلب واحد حب القرآن وحب الدبدبة والرزع بتاع المعازف.
          ​
          الشعر العفيف دا كلام بيخاطب العقل بالحكمة ودا تمام ومش محرم.
          أما الموسيقى والمعازف بتلعب على الغريزة والمزاج بصوتها المباشر، ودا اللي جه النهي عنه عشان قلبك يفضل فايق ومركز.

أعمق وأشهر خناقة عند المصريين على السوشيال ميديا خناقة هو إحنا عرب ولا أقباط ولا بتنجان مخلل الخناقة التاريخية دي اللي مش بتموت أبداً وتطلع لك فجأة في الكومنتات زي العفريت خصوصاً يوم الجمعة بعد الصلاة تلاقي واحد طالع يزعق وبتقمص دور رمسيس الثاني ويقولك إحنا أصل الحضارة والفرعونية تجري في دمائنا ومفيش بيننا وبين الصحراء أي عمار أو صلة يترد عليه فوراً من الفريق التاني بقمة الحماس سيبك من الفراعنة بدال ما تفتخر بشوية طوب وكفرة وآه بقول كفرة ومش عادي أكفر حد بس فعلياً كلنا المفروض يعني نتفق إنهم كفار نفتخر إن مصر بلد الأنبياء والرسل وذكرت في القرآن يا أخي ده سيدنا يوسف قال لإخوته ادخلوا مصر إن شاء الله آمنين وييجي فريق تالت مسكين واقف في النص مش فاهم حاجة ويقولكم يا جماعة صلوا على النبي إحنا مكس هجين بتنجان ملوش مثيل في المجرة

القرآن الكريم اتعامل مع موضوع الحضارات القديمة وآثارها بمنطق واضح جداً ومفيش فيه أي لف ودوران
          أولاً الآثار دي معمولة ليه وعشان مين
          الفراعنة كانوا بيبنوا المباني الضخمة دي عشان يتخلدوا في الدنيا وكان عندهم اقتناع تام إن الحجارة دي هتحميهم
          جاء القرآن وقالهم بمنتهى البساطة إن كل المباني والقوة دي متنفعتش صاحبها لما لحظة الحقيقة جت
          ربنا بيقول في سورة الشعراء
          وتتخذون مصانع لعلكم تخلدون
          يعني بتدنوا قصور وصروح ضخمة فاكرين إنكم هتعيشوا فيها للأبد
          ثانياً شوفوا الآثار دي بس اتعلموا الدرس
          القرآن ممشيش في سكة اردموا الآثار دي ولا امحوها بالعكس ده أمرنا نمشي في الأرض ونشوفها ونفهم إن مفيش حاجة بتدوم
          ربنا بيقول في سورة الروم
          أولم يسيروا في الأرض فينظروا كيف كان عاقبة الذين من قبلهم كانوا أشد منهم قوة وأثاروا الأرض وعمروها أكثر مما عمروها
          يعني بالبلدي كده الناس دول كانوا أقوى منكم وبنوا وعمروا وأسسوا أكتر منكم بكتير ومع ذلك القوة دي كلها مأنقذتهمش لما خالفوا الحق
          ثالثاً الأهرامات والمعابد شاهدة مش مقتدى بيها
          ربنا قال عن فرعون قومه في سورة يونس
          فاليوم ننجيك ببدنك لتكون لمن خلفك آية
          يعني جسمه وآثاره وكل اللي سابه باقي عشان يكون مجرد عبرة للي يجي بعده مش عشان الناس تروح تتبارك بيه ولا تقوله الحقنا يا فرعون
          فالموضوع ملخصه بسيط جداً
          عايز تتفرج وتتبهر بالهندسة والطب والفلك اللي عملوه اتفضل وافتخر عادي
          لكن تعمل منهم آلهة أو تحن لعقائدهم الشركية وتنسى إنهم في الآخر كانوا بشر أخطؤوا وتكبروا يبقى أنت كده سبت العبرة ومسكت في الحجارة

ألف مبروك لكل الطلاب اللي أديتم اللي عليكم وربنا يعوض تعبكم وتعب أهاليكم خير
          
          بما إن نتيجة الثانوية العامة ظهرت لعل وعسى كلمتين يخففوا عن أي طالب وطالبة حاسس بضيق أو محبط حتى لو كلامنا ده فرق مع شخص واحد بس خليك مقتنع ومؤمن جدا إن النتيجة مش بتاعتنا اللي بتاعنا هو السعي وبس أما النتيجة دي بتاعة ربنا وحده
          
          هتقولي يعني كدا ربنا مش بيحبني عشان ما جبتش المجموع اللي نفسي فيه هقولك لا بالعكس ده أكبر دليل إنه بيحبك جدا ربنا كاتبلك الخير دايما بس انت بني آدم طبيعي متعرفش الخير فين ومكنتش هتروح للمكان والمسار اللي فيه الخير الحقيقي ليك إلا لو جبت المجموع ده بالظبط
          
          يعني أزعل وأحس بالندم لا متحسش بالندم أبدا إلا في حالة واحدة بس لو انت فعلا كنت مقصر طب وهتعرف ازاي إنك مقصرتش أسأل نفسك هل طعت أهلك وقمت بواجباتك تجاه ربك هل ذاكرت واجتهدت وحليت تمارين وعملت اللي عليك لو الإجابة أيوة طب عايز إيه تاني اقعد مع نفسك كدا وفكر بتجرد هل كان في في إيدك أي حاجة تانية تعملها وما عملتهاش لو لا يبقى انت فل ومية مية واحمد ربنا إنه مخيركش واختارلك هو بعلمه ورحمته وتذكر الآية الكريمة اللي بتوضح أصل المفهوم ده تماماً قُلْ لَا أَمْلِكُ لِنَفْسِي نَفْعًا وَلَا ضَرًّا إِلَّا مَا شَاءَ اللَّهُ وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ إِنْ أَنَا إِلَّا نَذِيرٌ وَبَشِيرٌ لِقَوْمٍ يُؤْمِنُونَ الآية دي بتشرحلك الحقيقة المجردة سيد الخلق النبي محمد صلى الله عليه وسلم بكل قدره ومكانته ربنا بيأمره يوضح للناس إنه لا يملك لنفسه نفعاً ولا ضراً إلا بمشيئة الله وإن معرفة الغيب دي حصرياً لله وحده ولو كان البشري بيعلم الغيب كان اختار لنفسه اللي شايفه خير ودفع عن نفسه أي سوء أو ضرر لكن الحقيقة إن تدبير ربنا هو الأكمل لأن علمه محيط بالغيب كله والمكروه الظاهري اللي حصلك ممكن يكون هو عين الخير والنفع اللي انت مش شايفه دلوقتي

الناس اللي بتتعامل مع النص الديني بمنظور مادي محض دايما بيفوتهم مفهوم هندسي خطير جدا وهو مفهوم الحماية الاستباقية أو الوقاية الوقائية العلم الحديث بكل تفوقه بيشتغل بمنطق رد الفعل يعني يستنى لما المصيبة تحصل وبعدين يدور على علاج أما التشريع الإلهي فبيشتغل بمنطق منع الضرر من جذوره قبل ما يتولد أصلا
          
          لما تبص لمنظومة التحريم هتلاقيها متقسمة بدرجات هندسية متناسبة تماما مع حجم الضرر
          
          أولا الكبائر المهلكة
          دي الأشياء اللي ضررها مش مجرد إثم ديني بل بتعمل هلاك مباشر ودمار شامل للفرد والمجتمع
          
          الزنا مش مجرد غلطة أخلاقية ده من أكبر الكبائر لأن العلاقات الجنسية المفتوحة خارج إطار الزواج الشرعي هي السبب الأول والرئيسي في ظهور وانتقال أخطر الأمراض الفيروسية والمرعبة على وجه الأرض وأبرزها مرض الإيدز نقص المناعة المكتسبة اللي بيدمر جهاز المناعة بالكامل وبيسيب الجسم فريسة لأي التهاب بسيط ينهي حياته ده غير أمراض تانية زي الزهري والسيلان والفيروس الحليمي اللي بيسبب السرطانات ده غير الخراب الاجتماعي واختلاط الأنساب وضياع الأطفال
          
          المثلية والشذوذ الجنسي اللي التشريع حرمها وتوعد عليها بأشد العقاب لأنها ممارسة مصادمة للفطرة العضوية والنفسية تماما والعلم والطب المسكوت عنه بيكشف إن السلوكيات دي هي المطبخ الأول لتفشي أشرس الفيروسات والأمراض المعوية والجلدية والتناسلية المرعبة بكتيريا وفيروسات نادرة جدا مش بتنتقل إلا بالطريقة دي ده غير التدمير الكلي للأنسجة والتأثير النفسي والعصبي الكارثي على ممارسيها
          
          القتل وقطع الأرحام والظلم دي كبائر بتدمر النسيج البشري بالكامل وبتحول المجتمع لغابة وتدمر الصحة النفسية للأفراد

اللَّهُمَّ لَكَ الحَمْدُ حَمْداً كَثِيراً طَيِّباً مُبَارَكاً فِيهِ، كَمَا يَنْبَغِي لِجَلَالِ وَجْهِكَ وَلِعَظِيمِ سُلْطَانِكَ، اللَّهُمَّ صَلِّ وَسَلِّمْ وَبَارِكْ عَلَى نَبِيِّنَا مُحَمَّدٍ وَعَلَى آلِهِ وَصَحْبِهِ أَجْمَعِينَ.
          ​اللَّهُمَّ اهْدِنَا فِيمَنْ هَدَيْتَ، وَعَافِنَا فِيمَنْ عَافَيْتَ، وَتَوَلَّنَا فِيمَنْ تَوَلَّيْتَ، وَبَارِكْ لَنَا فِيمَا أَعْطَيْتَ، وَقِنَا وَاصْرِفْ عَنَّا شَرَّ مَا قَضَيْتَ، فَإِنَّكَ تَقْضِي بِالْحَقِّ وَلَا يُقْضَى عَلَيْكَ، إِنَّهُ لَا يَذِلُّ مَنْ وَالَيْتَ، وَلَا يَعِزُّ مَنْ عَادَيْتَ، تَبَارَكْتَ رَبَّنَا وَتَعَالَيْتَ.
          ​اللَّهُمَّ أَصْلِحْ لَنَا دِينَنَا الَّذِي هُوَ عِصْمَةُ أَمْرِنَا، وَأَصْلِحْ لَنَا دُنْيَانَا الَّتِي فِيهَا مَعَاشُنَا، وَأَصْلِحْ لَنَا آخِرَتَنَا الَّتِي فِيهَا مَعَادُنَا، وَاجْعَلِ الحَيَاةَ زِيَادَةً لَنَا فِي كُلِّ خَيْرٍ، وَاجْعَلِ المَوْتَ رَاحَةً لَنَا مِنْ كُلِّ شَرٍّ.
          ​اللَّهُمَّ إِنَّا نَسْأَلُكَ مِنَ الخَيْرِ كُلِّهِ عَاجِلِهِ وَآجِلِهِ، مَا عَلِمْنَا مِنْهُ وَمَا لَمْ نَعْلَمْ، وَنَعُوذُ بِكَ مِنَ الشَّرِّ كُلِّهِ عَاجِلِهِ وَآجِلِهِ، مَا عَلِمْنَا مِنْهُ وَمَا لَمْ نَعْلَمْ. اللَّهُمَّ إِنَّا نَسْأَلُكَ مِنْ خَيْرِ مَا سَأَلَكَ مِنْهُ عَبْدُكَ وَنَبِيُّكَ مُحَمَّدٌ ﷺ، وَنَعُوذُ بِكَ مِنْ شَرِّ مَا عَاذَ بِهِ عَبْدُكَ وَنَبِيُّكَ مُحَمَّدٌ ﷺ.

عَفَتْ لِلْهَوَى بَعْدَ الأَنِيسِ مَنَازِلُ
          وَأَمْسَى بِهَا عَاصِفُ الرِّيحِ يَجْأَرُ
          ​تَلُوذُ بِهَا الأَطْلاَلُ بَعْدَ جَلاَلِهَا
          كَمَا خَطَّ فِي الزَّبُورِ الرَّقِيمَ المَاهِرُ
          ​وَقَفْتُ بِهَا وَالعَيْنُ تَسْكُبُ دَمْعَهَا
          سَكَابًا كَمَا فَاضَتْ صِلاَلٌ وَأَبْحُرُ
          ​أَكَلَ الحَنِينُ سَعَادَةَ أَيَّامِي، وَعَاثَ بِهَا
          حُزْنٌ يَهُدُّ الرَّاسِيَاتِ وَيَقْهَرُ
          ​أُدَاجِي جُوَى الشَّوْقِ العَنِيفِ بِكِتْمَةٍ
          وَفِي صَدْرِيَ المَكْنُونِ نَارٌ تُسَعَّرُ
          ​فَيَا لَيْتَ شِعْرِي هَلْ أُعَاوِدُ عَهْدَهُمْ
          أَمِ العُمْرُ مَمْضِيٌّ وَمَا زَالَ يَقْصُرُ؟
          ​وَهَلْ يَجْمَعُ الدَّهْرُ الشَّتِيتَيْنِ بَعْدَمَا
          تَوَالَى عَلَى المَشُوقِ المُنَى وَالمَقَادِرُ؟

علشان تفهم التاريخ الإسلامي صح وتستوعب المشهد الفكري والديني اللي بنعيشه النهاردة لازم ترجع للبداية خالص وتشوف إزاي الفكرة بتولد فرقة وإزاي الخلاف السياسي الصغير ممكن يتحول مع الوقت لمعتقد ديني يعيش مئات السنين الموضوع مش مجرد أسماء فرق بنسمعها في كتب التاريخ وخلاص ده تاريخ حافل بالصراعات والأفكار اللي شكلت عقول ملايين البشر عبر القرون وفي السطور الجاية دي هتاخد الخريطة الكاملة حكاية كل فرقة اتولدت إزاي ومنين وبدأت بكلام مين ووصلت لإيه وإيه الخلل اللي وقعت فيه ورد الشرع والعقل عليه وأماكن وجودهم فين دلوقتي في عالمنا عشان تبقى شايف الصورة كاملة ومجمعة