OlaAzmi
في ناس كتير حلوين لقعدة ساعتين وبس .
في ناس مرايات بيضا للطرقات يلي بتحجز فيها حد الشباك ، لأحاديثك النقية ، للحكيات يلي صعب تفكر مرتين قبل ماتقولها ،لعفويتك ،لحدسك.
في ناس للشغل والجدية والعقلانية وتحقيق الذات والنجاح.
في ناس مافيك تحبهم لبعدين ،لازمك معهم كذا موقف وكذا مقياس لتطمنهم ع أمان ال "بعدين" معك .
في ناس مضطر تحط حواجز معينة معهم لتقدر تعاشرهم مدة طويلة، وفي ناس هنن الحواجز لأي محاولة لطف منك.
في ناس بخلوك تحس إنك بتعرفهم من ألف سنة .
في ناس بالبدايات قراب وبالنهايات أغراب .
في ناس بتشاركك حالك وجروحك وقلبك وبتضل مهما فرقتكم الحياة خيرة الناس .
في ناس عشرتهم بتغيرهم وبيتطبعو فيك وبصيرو يحبوك .
في ناس من موقف بينقلبو أعز الأصحاب ،وفي ناس شايلهم لغدرات الزمن لأنهم دهبك المخبى.
في ناس مُتعبين وبيستنذفو طاقتك وضايع فيهم خيرك.
في ناس ودودة ،هنية وفيها تحسسك بمحبتها ،وفي ناس تعتر بسوادها الفرح لختير وصار مشلول.
في ناس مناح وبحبوك طالما ماحدا قارن بينك وبينهم وميّزك عنهم.
وفي ناس بيعرفوك عالي كتير بس مابيقبلو تشوف حالك عليهم ،
في ناس دبقة بس تحبك ، وفي ناس رزقة بتتمنى إنها تدبقك ،
في ناس مابتتكرر عظيمة ولا ممكن تنساها ،وفي ناس بتكررك وبتزيفك وما بينغفر أذاها .
وكتير كتير الدنيا بتمشيك وبتغيرك بكل أنواع وأصناف الناس.
